អ៊ីរ៉ង់៖ការព្រួយបារម្ភចំពោះការផលិតលោហៈអ៊ុយរ៉ាន្យោមរបស់ពួកគេ គឺ «មិនចាំបាច់»
កាលពីថ្ងៃពុធនេះ អ្នកនាំពាក្យក្រសួងការបរទេសអ៊ីរ៉ង់បាននិយាយថាការសម្រេចផលិតលោហៈអ៊ុយរ៉ាន្យោមក្នុងកម្រិតរហូតទៅដល់ ២០% គឺក្នុងគោលបំណងសន្តិភាពទេ ហើយការព្រួយបារម្ភគឺ «មិនចាំបាច់ទេ» រួចបានបន្ថែមថាក្រុងតេហេរ៉ង់នឹងផ្លាស់ប្តូរជំហាននុយក្លេអ៊ែររបស់ខ្លួនភ្លាមៗ នៅពេលសហរដ្ឋអាមេរិកដកទណ្ឌកម្មចេញ។
អ្នកនាំពាក្យក្រសួងការបរទេសអ៊ីរ៉ង់លោក Saeed Khatibzadeh បាននិយាយថា៖ «ផ្ទុយពីការអះអាងរបស់អាមេរិក និងមហាអំណាចអឺរ៉ុប វិធានការនេះ (ការផលិតលោហៈអ៊ុយរ៉ាន្យោម) គឺធ្វើឡើងសម្រាប់គោលបំណងសន្តិភាពតែប៉ុណ្ណោះ ហើយវានៅត្រូវប្រើនៅរ៉េអាក់ទ័រស្រាវជ្រាវតេហេរ៉ង់»។
កាលពីថ្ងៃអង្គារ ភ្នាក់ងារឃ្លាំមើលនុយក្លេអ៊ែររបស់អង្គការសហប្រជាជាតិបានរាយការណ៍ថាអ៊ីរ៉ងចាប់ផ្ដើមផលិតអ៊ុយរ៉ាន្យោមជាលោហៈ ដែលជាជំហានដ៏ធំមួយឆ្ពោះទៅរកការបង្កើតអាវុធនុយក្លេអ៊ែរ។ ការធ្វើបែបនេះ បានទាក់ទាញការរិះគន់ពីអាមេរិក អាល្លឺម៉ង់ បារាំង និងអង់គ្លេសថាអាចធ្វើស្មុគស្មាញ ឬអាចបំផ្លាញការចរចានុយក្លេអ៊ែរ។ មហាអំណាចពិភពលោក កំពុងចរចាជាមួយអ៊ីរ៉ង់តាំងពីខែមេសាមកដើម្បីស្ដារកិច្ចព្រមព្រៀងនុយក្លេអ៊ែរ ២០១៥ ដែលដាក់បម្រាមលើកម្មវិធីនុយក្លេអ៊ែររបស់អ៊ីរ៉ង់ជាថ្នូរនឹងការដកទណ្ឌកម្ម។
កាលពីឆ្នាំ ២០១៨ អាមេរិកបានដកខ្លួនចេញពីកិច្ចព្រមព្រៀងនេះ ហើយតាំងពីពេលនោះមក ក្រុងវ៉ាស៊ីនតោនបានដាក់ទណ្ឌកម្មលើអ៊ីរ៉ង់ ធ្វើឱ្យក្រុងតេហេរ៉ង់ចាប់ផ្ដើមរំលោភលក្ខខណ្ឌនៃកិច្ចព្រមព្រៀង។
លោក Khatibzadeh បាននិយាយថា៖ «វិធានការណ៍នេះមិនផ្ទុយនឹងកាតព្វកិច្ចរបស់ប្រទេសអ៊ីរ៉ង់ចំពោះការមិនផលិតអាវុធនុយក្លេអ៊ែរ និងការគោរពកិច្ចព្រមព្រៀង២០១៥ ហើយក្រុងតេហេរ៉ង់ត្រៀមនឹងផ្លាស់ប្ដូរជំហានរបស់ខ្លួននៅពេលមានការដកទណ្ឌកម្ម»។
ក្រុងតេហេរ៉ង់បានផលិតលោហៈអ៊ុយរ៉ាន្យោមក្នុងបរិមាណតិចតួច និងភាពសុទ្ធមានលកន្ខណៈទាបកាលពីដើមឆ្នាំនេះ។ នេះគឺជាការរំលោភលក្ខខណ្ឌនៃកិច្ចព្រមព្រៀង ដែលហាមឃាត់ការងារទាក់ទងអ៊ុយរ៉ាន្យោមជាលោហៈ ដែលអាចប្រើសម្រាប់ផលិតស្នូលនៃគ្រាប់បែកនុយក្លេអ៊ែរ។ អ៊ីរ៉ង់តែងតែបដិសេធថាខ្លួនមិនផលិតអាវុធនុយក្លេអ៊ែរទេ៕ សុខ វេងឈាង
