ប្រធានក្រុមអង់គ្លេស Harry Kane និយាយទៅកាន់អ្នកដែលនៅពី​ក្រោយការរំលោភបំពាន​ប្រកាន់ជាតិ​សាសន៍​របស់មិត្តរួមក្រុម Marcus Rashford, Jadon Sancho និង Bukayo Saka ថា “អ្នកមិន​មែន​ជាអ្នកគាំទ្រអង់គ្លេសទេហើយយើងក៏មិនចង់បានអ្នកដែរ” ។ នេះបើតាមការចុះផ្សាយរបស់ BBC Sport នៅថ្ងៃទី១៣ នេះ ។

កីឡាករទាំងបីបានខកខានក្នុងការស៊ុតបាល់ប៉េណាល់ទី ដែលបាននាំអោយក្រុម​ជម្រើស​ជាតិអ៊ីតាលី យកឈ្នះក្នុងលទ្ធផល ៣-២ នៅវគ្គផ្តាច់ព្រ័ត្រ Euro ២០២០ កាលពីថ្ងៃអាទិត្យ។

Harry Kane បាននិយាយថា“ ពួកគេសមនឹងទទួលបានការគាំទ្រ​ មិនមែនជាការរំលោភបំពាន​ប្រកាន់​ពូជសាសន៍នោះទេ” ។ខ្សែប្រយុទ្ធរបស់ក្រុមមាន់ខ្នាយមាស Tottenham រូបនេះបានបន្ថែមលើបណ្តាញសង្គមធ្វី Twitter ថា៖ «ក្មេងប្រុស ៣ នាក់ដែលអស្ចារ្យពេញមួយរដូវក្ដៅ មានសេចក្តីក្លាហានក្នុងការបោះជំហាន និងទទួល​យក​បទ​ពិសោធន៍ថ្មី សម្រាប់អភិវឌ្ឍន៍សមត្ថភាព ។ ប្រសិនបើអ្នក ធ្វើបាបអ្នកណា​ម្នាក់នៅ​លើ​បណ្តាញ​សង្គម​​ អ្នកមិនមែនជាអ្នកគាំទ្រអង់គ្លេសទេហើយយើងក៏មិនចង់បានអ្នកដែរ៕