ឃាតកម្មប្រធានាធិបតី ធ្វើឱ្យហៃទីធ្លាក់ចូលក្នុងគំហុកនៃវិបត្តិនយោបាយធ្ងន់ធ្ងរ
ព័រអូប្រាំង៖ ខណៈពេលគេមិនទាន់ដឹងនៅឡើយថានរណានៅពីក្រោយការធ្វើឃាតលោកប្រធានាធិបតី បន្ទុកថ្មីមួយទៀតបានបង្ករជារឿងឈឺក្បាលដល់ប្រជាជនហៃទី បន្ថែមភាពស្មុគស្មាញកាន់តែខ្លាំងឡើងលើសំណុំរឿងស៊ើបអង្កេតឃាតកម្ម និងកម្ដៅលើបញ្ហាប្រទេសដែលគ្មានអ្នកកាន់ចង្កូតច្បាស់លាស់ ក្រោយអ្នកនយោបាយដល់ទៅបីរូបអះអាងថាខ្លួនជាអ្នកដឹកនាំរដ្ឋាភិបាលស្របច្បាប់។
បញ្ហាប្រឈមកើនឡើងប្រឆាំងនឹងនាយករដ្ឋមន្រ្តីបណ្តោះអាសន្នលោក Claude Joseph ដែលកំពុងគ្រប់គ្រងប្រទេសហៃទីដោយមានការគាំទ្រពីកម្លាំងប៉ូលីស និងយោធាទាំងខ្វះធនធាន។ លោកបានសន្យាថានឹងធ្វើការជាមួយក្រុមប្រឆាំង និងសម្ព័ន្ធមិត្តរបស់លោកប្រធានាធិបតី Jovenel Moise ដែលត្រូវបានគេធ្វើឃាតក្នុងការវាយប្រហារមួយនៅគេហដ្ឋានរបស់លោកកាលពីថ្ងៃពុធ សប្ដាហ៍មុន។ ប៉ុន្តែមកទល់ពេលនេះ គេមិនទាន់ឃើញជំហានណាមួយជាក់លាក់ ត្រូវបានបោះនៅឡើយទេ។
ក្រុមចម្រុះនៃគណបក្សប្រឆាំងធំៗឈ្មោះថា Democratic and Popular Sector នៅថ្ងៃអង្គារប្រាប់ថា ស្ថានភាពប្រទេសដែលខ្វះមេដឹកនាំ មិនត្រូវបន្តទៀតទេ ដោយបង្ហាញពីសំណើរបស់ខ្លួនបង្កើតអាជ្ញាធរសីលធម៌ឯករាជ្យ (Independent Moral Authority) ដែលចូលរួមពីភាគីផ្សេងៗគ្នារួមមានខាងសកម្មជនសិទ្ធិមនុស្ស មេដឹកនាំសាសនា និងអ្នកសិក្សា។
ទន្ទឹមនឹងនេះដែរ លោក Ariel Henry ដែលត្រូវបានលោក Moise តែងតាំងជានាយករដ្ឋមន្រ្តីមួយថ្ងៃមុនពេលប្រធានាធិបតីរូបនេះត្រូវបានគេសម្លាប់នោះ បាននិយាយថា លោកគឺជានាយករដ្ឋមន្រ្តីដែលត្រឹមត្រូវស្របតាមច្បាប់។ អ្នកនយោបាយរូបនេះ មានការគាំទ្រពីក្រុមអ្នកនយោបាយល្បីៗឈ្មោះមួយក្រុម ដែលគេស្គាល់ថាជាសម្ព័ន្ធមិត្តរបស់លោក Moise ដែលថ្មីៗនេះបានជ្រើសរើសលោក Joseph Lambert ជាប្រធានាធិបតីបណ្តោះអាសន្ន។ យ៉ាងណាមិញ ពិធីស្បថចូលកាន់ដំណែងរបស់លោក Lambert ត្រូវបានលុបចោលវិញ។
យោងតាមក្រុមប្រឹក្សាសន្តិសុខជាតិនៃសេតវិមាន លោក Joseph លោក Henry និងលោក Lambert បានជួបគ្នាកាលពីថ្ងៃអាទិត្យជាមួយគណៈប្រតិភូអាមេរិកដែលរួមមានអ្នកតំណាងមកពីក្រសួងយុត្តិធម៌ និងក្រសួងសន្តិសុខមាតុភូមិ ក្នុងដំណើរទស្សនៈកិច្ចទៅប្រទេសហៃទីដើម្បីជួយជំរុញដល់កិច្ចព្រមព្រៀងនយោបាយដែលអាចឱ្យប្រទេសនេះរៀបចំការបោះឆ្នោតដោយសេរី និងយុត្តិធម៌។
លេខាធិការសារព័ត៌មានសេតវិមានលោកស្រី Jen Psaki បាននិយាយថា គណៈប្រតិភូបានទទួលសំណើសុំជំនួយបន្ថែម ប៉ុន្តែលោកស្រីមិនបានផ្តល់ព័ត៌មានលម្អិតទេ។ លោកស្រីបានបន្ថែមទៀតថា សំណើរបស់ហៃទីសម្រាប់ជំនួយយោធាអាមេរិក នៅតែស្ថិតក្រោម «ការត្រួតពិនិត្យ» ហើយភាពមិនប្រាកដប្រជាផ្នែកនយោបាយនៅលើមូលដ្ឋានគឺជាកត្តាស្មុគស្មាញមួយសម្រាប់រដ្ឋបាលរបស់ខ្លួនថ្លឹងថ្លែងពីរបៀបជួយ។
ប្រទេសហៃទីក៏កំពុងស្វែងរកជំនួយសន្តិសុខពីអ.ស.ប. ក៏ប៉ុន្តែអ្នកនាំពាក្យរងលោក Farhan Haq បាននិយាយថា សំណើនេះកំពុងស្ថិតនៅក្រោមការត្រួតពិនិត្យនៅឡើយ។
អស្ថិរភាពនយោបាយកាន់តែអាក្រក់ទៅៗ ស្របពេលដែលអាជ្ញាធរហៃទីបន្តស៊ើបអង្កេតលើការធ្វើឃាតក្រោមជំនួយពីរដ្ឋាភិបាលកូឡុំប៊ី។ អតីតទាហានកូឡុំប៊ីចំនួន ២៦ នាក់ត្រូវបានគេសង្ស័យលើការវាយប្រហារ ហើយ ២៣ នាក់ត្រូវបានចាប់ខ្លួនរួមជាមួយជនជាតិហៃទី ៣ នាក់។
ប៉ូលីសហៃទីក៏បានចាប់ខ្លួនបុរសជនជាតិហៃទីម្នាក់ដែលត្រូវបានគេចាត់ទុកថាជាជនសង្ស័យសំខាន់ផងដែរ គឺលោក Christian Emmanuel Sanon អាយុ ៦២ ឆ្នាំជាគ្រូពេទ្យ គ្រូគង្វាល និងជាអ្នកជំនួញនៅរដ្ឋ Florida ដែលធ្លាប់បានបង្ហាញពីបំណងដឹកនាំប្រទេសរបស់លោកនៅក្នុងយូធូប ហើយបានថ្កោលទោសមេដឹកនាំប្រទេសនេះថាជាមនុស្សពុករលួយ។
លោក Leon Charles ប្រធានអគ្គស្នងការនគរបាលជាតិហៃទី បាននិយាយថា លោក Sanon បានធ្វើការជាមួយអ្នកដែលឃុបឃិតធ្វើឃាតកម្មរូបលោក Moise ហើយថាអ្នកសម្លាប់លោកប្រធានាធិបតី កំពុងការពារវេជ្ជបណ្ឌិតរូបនេះ។ យ៉ាងណាមិញ អ្នកជំនួញ និងជាគ្រូគង្វាលដូចគ្នាម្នាក់នៅរដ្ឋ Florida ដែលស្គាល់លោក Sanon បាននិយាយថា លោកមិនជឿថាគ្រូគង្វាលរូបនេះមានជាប់ទាក់ទងនឹងសំណុំរឿងឃាតកម្មនេះទេ ដោយហេតុថាលោក Sanon គឺជាមនុស្សដែលជឿព្រះយ៉ាងខ្ជាប់ខ្ជួន។
លោក Andre Michel មេដឹកនាំសម្ព័ន្ធគណបក្សនយោបាយប្រឆាំងបាននិយាយថា៖ «ខ្ញុំមិនដឹងថាបុរស(លោក Sanon) នេះ គឺជានរណានោះទេ»។ លោកបានចោទប្រកាន់រដ្ឋាភិបាលបណ្ដោះអាសន្នបច្ចុប្បន្នថា បានធ្វើការជាមួយមេដឹកនាំក្រុមទំនើង និងពួកពាណិជ្ជករពុករលួយ។
លោក Michel បាននិយាយថាអ្វីដែលលោកខ្លាចបំផុតគឺគ្មានជំនួយពីសហរដ្ឋអាមេរិក និងអង្គការសហប្រជាជាតិ ដើម្បីរក្សាសន្តិភាព ហើយលោកទទូចសុំឱ្យមេដឹកនាំនយោបាយឱ្យធ្វើការជាមួយគ្នាដើម្បីដោះស្រាយបញ្ហា។
ប្រភព៖ CNA
