មន្ត្រីអាហ្វហ្គានីស្ថាន ជួបជាមួយតាលីបង់នៅប្រទេសកាតា ខណៈពេលដែលការប្រយុទ្ធគ្នាកើនឡើង
កាលពីថ្ងៃសៅរ៍ ទី១៧ កក្កដា តំណាងរដ្ឋាភិបាលអាហ្វហ្គានីស្ថាន និងក្រុមឧទ្ទាមតាលីបង់បានធ្វើការជួបពិភាក្សានៅក្រុងដូហា ប្រទេសកាតា ខណៈពេលដែលអំពើហិង្សា និងការប្រយុទ្ធគ្នាបានឡើងក្នុងប្រទេសពួកគេ បន្ទាប់ពីការដកខ្លួនកងទ័ពបរទេស។
ភាគីទាំងពីរបានធ្វើការចរចាសន្តិភាព ដោយមិនទៀងទាត់ជាច្រើនខែមកហើយនៅរាជធានីរបស់ប្រទេសកាតា ប៉ុន្តែសំទុះនៃការចរចាបានធ្លាក់ចុះបន្ទាប់ពីក្រុមតាលីបង់បានទទួលការជោគជ័យក្នុងការវាយដណ្ដើមដែនដីពីរដ្ឋាភិបាល។
មន្ត្រីជាន់ខ្ពស់ជាច្រើនរួមទាំង អតីតប្រមុខរដ្ឋាភិបាលអាហ្វហ្គានីស្ថានលោក Abdullah Abdullah ដែលបច្ចុប្បន្នជាប្រធានឧត្ដមក្រុមប្រឹក្សាសម្រាប់ការផ្សះផ្សាជាតិបានប្រមូលផ្ដុំនៅសណ្ឋាគារមួយកាលពីថ្ងៃសៅរ៍បន្ទាប់ពីអធិដ្ឋានពេលព្រឹក។ ពួកគេត្រូវបានចូលរួមដោយអ្នកចរចាមកពីការិយាល័យនយោបាយតាលីបង់ប្រចាំកាតា។
«(ពួកយើង) គួរតែចាត់វិធានការដើម្បីបន្តដំណើរការសន្តិភាព ដើម្បីទប់ស្កាត់ការសម្លាប់ប្រជាជន» លោក Abdullah បាននិយាយបែបនេះហើយបន្តទៀតថា៖ «ពីព្រោះយើងមិនអាចបង់ថ្លៃឈាមនេះបានទេ ហើយយើងក៏មិនអាចរួចផុតពីការទទួលខុសត្រូវដែរ»។
លោក Mullah Abdul Ghani Baradar ដែលជាមេដឹកនាំមួយរូប និងជាអ្នកចរចារបស់តាលីបង់ បានបង្ហាញការសោកស្ដាយចំពោះកង្វះការរីកចម្រើន។ លោកបាននិយាយថា៖ «ប៉ុន្តែនៅតែមានក្តីសង្ឃឹម ហើយតាលីបង់នឹងប្រឹងប្រែងធ្វើកិច្ចចរចាដើម្បីទទួលបានលទ្ធផលវិជ្ជមាន»។
កង្វះការរីកចម្រើនពីការចរចាមុនៗ បានដាក់សម្ពាធយ៉ាងខ្លាំងទៅលើភាគីទាំង២ឱ្យឈានដល់កិច្ចព្រមព្រៀងសន្តិភាព ខណៈពេលដែលអាមេរិកបានប្ដេជ្ញាដកទាហានចេញពីអាហ្វហ្គានីស្ថានទាំងស្រុងត្រឹមដំណាច់ខែកញ្ញា។
ស្របពេលនឹងការប្ដេជ្ញានេះ តាលីបង់បានធ្វើការអះអាងថាពួកគេបានចូលកាន់កាប់ ៨៥% នៃផ្ទៃដីប្រទេសអាហ្វហ្គានីស្ថាន ប៉ុន្តែក្រុមអ្នកឃ្លាំមើលបានប៉ាន់ស្មានថាតាលីបង់ចូលកាន់កាប់ជាងពាក់កណ្ដាលនៃផ្ទៃដីអាហ្វហ្គានីស្ថាន។
នៅក្នុងការប៉ះទង្គិចចុងក្រោយបង្អស់នៃការប្រយុទ្ធគ្នាប្រជាជនប្រមាណ ១២.០០០ គ្រួសារនៅខេត្តភាគខាងជើងប្រទេសត្រូវបានភៀសខ្លួនចេញពីផ្ទះរបស់ពួកគេនៅពេលដែលការប្រយុទ្ធគ្នានៅតែបន្តកើតមាន។
នៅខេត្ត Kandahar ភាគខាងត្បូងប្រទេសការប្រយុទ្ធគ្នាបានកើតមានឡើង ហើយក្រុមតាលីបង់នៅដើមសប្ដាហ៍នេះបានដណ្ដើមកាន់កាប់តំបន់ Spin Boldak ដែលជាតំបន់ជាប់ព្រំដែនប៉ាគីស្ថាន ប៉ុន្តែរដ្ឋាភិបាលអាហ្វហ្គានីស្ថានបាននិយាយកាលពីថ្ងៃសុក្រថាខ្លួនបានចូលគ្រប់គ្រងច្រកព្រំដែននេះឡើងវិញ។
មន្ត្រីនៅព្រំដែនប៉ាគីស្ថាន បាននិយាយថាការឆ្លងកាត់បានបើកឡើងវិញនៅថ្ងៃសៅរ៍ ដែលអនុញ្ញាតឱ្យជនជាតិអាហ្វហ្កានរាប់រយនាក់ ដែលជាប់នៅក្នុងប្រទេសប៉ាគីស្ថានក្នុងអំឡុងពេលនៃការប្រយុទ្ធគ្នា ត្រឡប់ទៅប្រទេសពួកគេវិញ។
ទីភ្នាក់ងារមនុស្សធម៌របស់អង្គការសហប្រជាជាតិ បានឱ្យដឹងថាប្រជាជនជាង ២,០០០ នាក់ត្រូវបានផ្លាស់ទីលំនៅនៅក្នុងខេត្តKandahar ក្នុងខែនេះ។
ទីភ្នាក់ងារជនភៀសខ្លួនអង្គការសហប្រជាជាតិ បានប៉ាន់ស្មានថាមានជនជាតិអាហ្វហ្គានីស្ថានចំនួន ២៧០,០០០ នាក់ត្រូវបានផ្លាស់ប្តូរទីលំនៅចាប់តាំងពីខែមករា ដែលបាននាំយកចំនួនប្រជាជនដែលត្រូវបានបង្ខំឱ្យចាកចេញពីលំនៅឋានកើនដល់ទៅជាង ៣.៥ លាននាក់៕
