ទីបំផុត! គណៈរដ្ឋមន្រ្តីថៃអនុម័តជាផ្លូវការថ្នាំផលិតពីស្មៅប្រមាត់មនុស្ស ក្នុងការព្យាបាលអ្នកជំងឺកូវីដ-១៩
ថៃ៖ គណៈរដ្ឋមន្ត្រីថៃ នៅថ្ងៃអង្គារសប្តាហ៍នេះ បានអនុម័តអោយប្រើប្រាស់ថ្នាំផលិតពីស្មៅប្រមាត់មនុស្ស ក្នុងការព្យាបាលអ្នកជំងឺកូវីដ១៩ ក្រោយនាយកដ្ឋានកែតម្រូវរបស់ថៃបានរាយការណ៍ពីជោគជ័យ ដែលបានព្យាបាលទណ្ឌិតឆ្លងកូវីដ១៩នៅក្នុងពន្ធនាគារ ។
អ្នកនាំពាក្យរងរបស់រដ្ឋាភិបាលថៃ លោកស្រី Rachada Dhnadirek បាននិយាយថា ស្មៅប្រមាត់មនុស្សមានផ្ទុកសារធាតុ andrographolide ជាសារធាតុដែលអាចការពារកោសិកាពីវីរុស ។ លោកស្រីបន្ថែមថា នាយករដ្ឋានកែតម្រូវរបស់ថៃបានយកទៅព្យាបាលទណ្ឌិតប្រហែលជា១ម៉ឺន១ពាន់៨រយនាក់ដែលឆ្លងជំងឺកូវីដ១៩ លោកស្រីថា ៩៩.០២%នៃពួកគេបានជាសះស្បើយ ។
ស្របពេលជាមួយគ្នានោះដែរ ក្រសួងអប់រំជាន់ខ្ពស់ វិទ្យាសាស្ត្រ ស្រាវជ្រាវ និងនវានុវត្ត បានគូសបញ្ជាក់ថា អ្នកជំងឺគួរប្រើឱសថផលិតពីស្មៅប្រមាត់មនុស្សទម្ងន់១៨០មីលីក្រាមក្នុងមួយថ្ងៃ ឬ៦០មីលីក្រាមក្នុងមួយពេល ៕ ប្រភព៖ Bangkok Post
