តារា​សម្តែង​និង​អ្នក​ចំរៀង​ដើម​កំណើត​​ចិន សញ្ជាតិ​កាណាដា លោក​Kris Wu Yifan រង​​ការ​ចោទប្រកាន់​ថា​រូប​លោក​​​បាន​ប្រព្រឹត្តបទល្មើស​បំពាន​​ផ្លូវភេទ​ជាបន្តបន្ទាប់ ដោយ​​​លោក​បាន​ចាប់​រំលោភ​នារី​វ័យ​ក្មេង​អស់​ជាច្រើននាក់។ លោកបាន បដិសេធ​ដោយ​ហៅ​អ្នក​ចោទ​ប្រកាន់​ទាំងនោះ ថា​ជា​មនុស្ស​កុហក ​ហើយ​និយាយ​ថា​រូប​លោក​​នឹង​ចូល​ពន្ធធនាគារដោយ​ខ្លួនឯង​ប្រសិន​បើ​ការ​អះអាង​ប្រឆាំង​នឹង​រូបលោក​គឺ​ជា​ការ​ពិត​។

យោង​តាម​របាយការណ៍​តាមប្រព័ន្ធអនឡាញ ​បាន​បង្ហាញ​ថា​លោក​“ Wu Yifa បាន​បញ្ឆោត​ស្ត្រី​វ័យក្មេង​ជាច្រើន​នាក់​ម្តង​ហើយ​ម្តង​ទៀត​ឱ្យ​រួម​ភេទជាមួយលោក​” ។ លោក Wu ត្រូវ​បាន​ចោទ​ប្រកាន់​ដោយ​ កញ្ញា Du Meizhu ដែល​ជា​អ្នក​មាន​អ្នកតាមដានច្រើន លើ​អ៊ីនធឺណិតម្នាក់​ ហើយបាន​អះ​អាង​ថា ខ្លួន​ជា​មិត្ត​ស្រីរ​បស់ Krisផងដែរ។នាងបាន​ចោទលោក Kris ពីបទ​ល្បួង​ក្មេងស្រី​មិន​ទាន់​គ្រប់​អាយុ​ឱ្យ​រួមភេទ​ជា​មួយ​លោក ​ក្រោមហេតុផល​ថា​គាត់​កំពុង​ជ្រើស​រើស​តារា​សម្តែង​ស្រី ។

កន្លង​មក​ កញ្ញា Du បាន​ប្រាប់​សារព័ត៏មាន​ថា​ លោក Kris បាន​ប្រើ​វិធី​ផ្សេងៗ​ដើម្បី​​ទាក់ទង​និងល្បួង​ក្មេងស្រី​វ័យ​ក្មេង​ទាំងនោះហើយ​ ចំនួន​ជន​រង​គ្រោះ​រួម​ទាំង​ខ្លួន​នាង​ផង​ដែរ​នោះ​ គឺ​លើស​ពី​ ៨​ នាក់​ ដែល​ក្នុង​នោះ​ពីរ​នាក់​ជា​អនីតិជន​។

កញ្ញា Du បាន​និយាយ​ថា​នាង​បាន​ស្គាល់​លោក​Wu ​នៅ​ពេល​នាង​មាន​អាយុ ​១៧​ ឆ្នាំ​ដោយនាង ​បាន​បន្ត​ថា​ នាង​ត្រូវ​បាន​គេ​អញ្ជើញ​ឱ្យ​ទៅ​ផ្ទះរ​បស់​គាត់​រួម​ជា​មួយ​ក្មេង​ស្រី​ដទៃ​ទៀត​ ដែល​ពួក​គេ​ត្រូវ​បាន​គេ​បង្ខំ​ឱ្យ​ផឹក​ស្រា ហើយពេល​នាង​ភ្ញាក់ឡើង​គឺនាង នៅលើគ្រែលោក Kris ទៅហើយ។

កញ្ញា​ Nini Ye បាន​យំអស់​រាប់​ម៉ោង​កាល​ពី​​សប្តាហ៍មុន​ នៅពេល​នាង​ដឹង​ថាតារា​ចម្រៀង​និង​ជា​តារាសម្ដែង​​ដើមកំណើត​ ​ចិន​ សញ្ជាតិកាណាដា​រូបនេះ​​ ត្រូវ​បាន​ប៉ូលីស​ ប៉េកាំង​ឃាត់​ខ្លួន​ពីបទ​រំលោភ​សេពសន្ថវៈ​។

យុវតីខាងលើមកពីខេត្ត​ Shenzhen មាន​អាយុ ​១៧ ឆ្នាំ​បាននិយាយ​ថា​ «យុវវ័យ​ខ្ញុំ ១០ ឆ្នាំ​បាន​បាត់​បង់​ទៅហើយ។​ ខ្ញុំ​នឹង​មិន​ចូល​ចិត្តឬ គាំទ្រ​តារា​ផ្សេងទៀត អស់​មួយ​ជីវិត​របស់ខ្ញុំ​ទៀត​ទេ»។

Nini គឺ​ជា​សមាជិក​ម្នាក់នៃក្លិបអ្នក​គាំទ្រ​ លោក Kris នៅ ប្រទេស​ចិន​ដែលបាន​តាមគាំទ្រ តារា​រ៉េប​ចម្រៀង​ខាងលើ ចាប់​តាំង​ពីគាត់​បាន​បង្ហាញ​ខ្លួន​ជាសមាជិក​ក្រុម Exo ក្នុង​ឆ្នាំ ​២០១២ ។

នាង​បាន​ចំណាយ​ពេល​រាប់​មិន​អស់​ដើម្បី ​តាម​ដាន​គាត់​ទាំង​ក្នុងនិង​ក្រៅ​បណ្តាញ​សង្គម នាងក៏បាន​ស្តាប់​ចម្រៀងពី​អាល់ប៊ុម​របស់​គាត់​ហើយ​ចំណាយ​លុយ​ឲ្យ​អស់​ពី​លទ្ធភាពដែល​ នាង​អាច​ធ្វើ​បានលើ​ផលិតផល​និង​ការផ្សាយ​ពាណិជ្ជកម្ម​ដែល​មាន​ លោក Kris ដើម្បីបង្ហាញពីការ​គាំទ្រ ​ទៅលើ​រូបលោក Kris។

សារព័ត៏​មាន​ Business insiders បាន ​និយាយថា​ ករណី​របស់​ Wu Yifan មានវ័យ​ ៣០ឆ្នាំ​ គឺ​ជា​ចំណុច​របត់មួយ​ នៅ​ក្នុង​ការ​បង្ក្រាបរបស់​ប៉ូលីស​ជាមួយ​ក្រុម​តារាដែល​​បាន​ចាប់​ផ្តើម​កាលពីខែ​មិថុនានេះ​​ ដើម្បី​ពង្រឹង ​និង​ពិនិត្យ​ក្រុមភ្នាក់ងារ​​គ្រប់គ្រងតារា​ក្លឹប​អ្នក​គាំទ្រ​ និងវេទិកា​ប្រព័ន្ធ​ផ្សព្វផ្សាយ​សង្គម​ ដែល​បាន​ក្លាយ​ជាមាន​ឥទ្ធិពល​យ៉ាងខ្លាំង​ ក្នុង​ចំណោម​យុវជន​ក្មេងៗ​ក្នុង​រយះ​ពេលប៉ុន្មាន​ឆ្នាំ​ចុង​ក្រោយនេះ​។

ចាប់​តាំង​ពី​ពេល​នោះ​មក​ អ្នក​ឃ្លាំមើល​តាម​អ៊ីនធឺណេត​ គណ​កម្មាការ​​កិច្ចការ​​អង្កេត​លើ​ប្រព័ន្ធ​អ៊ីនធឺណែត (The Cyberspace Affairs Commission) លុប​ចោល​នូវ​ « សារ​ដែល​អាច​បង្ក​គ្រោះថ្នាក់​» ជាង ​១៥០,០០០ ​និង​បាន​បិទ​គណនីលើ​បណ្តាញ​សង្គម​ជាង​ ៤០០០ ។

Chen Chun អ្នក​ស្រាវជ្រាវ​នៅ​សាកល​វិទ្យាល័យ​ ស៊ុន​យ៉ាតសេន​នៅ​ក្វាងចូវ​ បាន​និយាយ​ថា​វប្បធម៌​អ្នក​គាំទ្រ​នា​ពេល​បច្ចុប្បន្ន​នេះ​ អាច​មាន​តាំង​ពី​ឆ្នាំ​ ២០០៤ ។ យោង​តាម​លោក​ Chen​ បាតុភូតនៃ​ការគាំទ្រតារាយ៉ាងងប់ងល់ ​ត្រូវ​បាន​បង្កើត​ឡើង​ដោយ​ការ​កើន​ឡើង​នៃ​ ក្រុម​តន្ត្រី​បុរស​នៅ​កូរ៉េ​ខាងត្បូង​ និងជប៉ុន​ វត្តមាន​កម្មវិធី​ទូរទស្សន៍​ និង​ការ​រីក​លូតលាស់​យ៉ាងឆាប់រហ័សនៃ​អ៊ីនធឺណិត​របស់​ចិន​។

អាជ្ញាធរ​និង​ប្រព័ន្ធ​ផ្សព្វផ្សាយ​រដ្ឋ​ បាន​រិះគន់​កាន់​តែ​ខ្លាំង​ឡើង​អំពី​អាកប្ប​កិរិយា​ដែល​មានទំនោរ ​លើក​ទឹកចិត្ត​ឲ្យ​អ្ន​កគាំទ្រ​ចំណាយ​ទ្រព្យ​សម្បត្តិ​របស់​ពួកគេ​ ដើម្បីគាំទ្រតារាដែលជា និមិត្តរូបរបស់ពួកគេ។

ចាប់​តាំង​ពីមាន​ការ​ឃុំខ្លួន​លោក​ Wu  ក្រុមហ៊ុន​អន្តរជាតិ​ជាច្រើន បាន​លុប​ចោល​កិច្ចព្រមព្រៀង​ឧបត្ថម្ភ​ជា​មួយ​រូបលោក ។ហើយ  ​ បណ្តាញសង្គម​ Tencent ​និង​ Weibo​ បាន​បិទ​ក្រុម​អ្នកគាំទ្រ​នៅលើ​ប្រព័ន្ធ​ផ្សព្វផ្សាយ​សង្គម​ ដែលជា​អ្នក​គាំទ្រ​របស់​គាត់​។ ហើយក៏មាន​អ្នកគាំទ្រ​មួយ​​ចំនួន​បាន​និយាយ ថា​ពួកគេ​ជឿ​ជាក់​លើ​លោក​ Wu ហើយ​នឹង​រង់​ចាំ​ការ​ដោះ​លែង​រូបលោក​។ អ្នក​គាំទ្រ​ជ្រុល​និយម​ខ្លះ​ថែមទាំង​ និយាយ​ថា​ពួកគេ​មាន​គម្រោង​បំបែក​ពន្ធនាគារ​ ដើម្បី​ដោះ​លែង​លោក​ Wu​ទៀតផង ។

ប្រភព៖ SCMP