ស.រ.អា៖ កងកម្លាំងអាហ្វហ្គានីស្ថាន មានទំនួលខុសត្រូវការពារប្រទេស ខណៈតាលីបង់ចូលកាន់កាប់បន្ថែមទៀត
រដ្ឋាភិបាលសហរដ្ឋអាមេរិកអះអាងថាកងកម្លាំងយោធាអាហ្វហ្គានីស្ថានមានទំនួលខុសត្រូវការពារប្រទេសដោយខ្លួនឯង ខណៈពេលដែលក្រុមឧទ្ទាមតាលីបង់ចូលកាន់កាប់ទីរួមខេត្តអាហ្វហ្គានីស្ថានទី៦កាលពីថ្ងៃចន្ទនេះ ជាមួយនឹងទីប្រជុំ និងច្រកពាណិជ្ជកម្មមួយចំនួននៅតាមព្រំដែន។
ក្នុងរយៈពេលប៉ុន្មានខែចុងក្រោយនេះ ក្រុមតាលីបង់បានបង្កើនការវាយលុកដណ្ដើមការគ្រប់គ្រងប្រទេសអាហ្វហ្គានីស្ថាន និងដើម្បីផ្ដួលរំលំរដ្ឋាភិបាលក្រុងកាប៊ុល បន្ទាប់ការដកខ្លួនកងទ័ពអន្តរជាតិដឹកនាំដោយអាមេរិក។
កាលពីថ្ងៃចន្ទ តាលីបង់បានចូលកាន់កាប់ទីក្រុង Aybak ដែលជាទីរួមប្រជុំជនរបស់ខេត្ត Samangan ភាគខាងត្បូងប្រទេសអាហ្វហ្គានីស្ថាន បន្ទាប់ពីការឡោមព័ទ្ធជិតមួយសប្ដាហ៍។ ដោយមិនមានជំនួយពីក្រុងកាប៊ុល កងកម្លាំងមូលដ្ឋានបានភៀសខ្លួនចេញពីទីក្រុងនេះ ហើយក្រុមតាលីបង់បានចូលកាន់កាប់ដោយមិនចាំបាច់មានការប្រយុទ្ធគ្នា។
ទីក្រុង Aybak គឺក្នុងចំណោមទីរួមខេត្តអាហ្វហ្គានីស្ថានចំនួនប្រាំមួយដែលធ្លាក់ចូលក្នុងដៃរបស់ក្រុមតាលីបង់ក្នុងរយៈពេលដ៏ខ្លី ដោយទីក្រុងទី១ទើបតែដួលរលំកាលពីថ្ងៃសុក្រសប្ដាហ៍មុន ហើយទីក្រុងបួនផ្សេងទៀតបានដួលរលំនៅចុងសប្ដាហ៍។
អ្នកនាំពាក្យក្រសួងការពារជាតិអាមេរិកលោក John Kirby និយាយថាសហរដ្ឋអាមេរិកមានការព្រួយបារម្ភអំពីការចូលកាន់កាប់ទាំងនេះ ប៉ុន្តែនៅជឿជាក់ថាកងកម្លាំងយោធាអាហ្វហ្គានីស្ថានមានសមត្ថភាពគ្រប់គ្រាន់ក្នុងការប្រយុទ្ធជាមួយក្រុមឧទ្ទាម។
លោក Kirby និយាយថា៖ «ទាំងនេះគឺជាកម្លាំងយោធារបស់ពួកគេ ទាំងនេះគឺជាទីរួមខេត្តរបស់ពួកគេ ប្រជាជនរបស់ពួកគេ ដែលពួកគេត្រូវការពារ ហើយវាពិតជានឹងឈានភាពជាអ្នកដឹកនាំ ដែលពួកគេមានឆន្ទៈចង់បញ្ចេញនៅទីនេះក្នុងពេលពិសេសនេះ»។
នៅពេលត្រូវអ្នកសារព័ត៌មានសួរថាតើយោធាអាមេរិកអាចធ្វើអ្វីបានប្រសិនបើកងកម្លាំងសន្តិសុខអាហ្វហ្គានីស្ថានមិនអាចទប់ទល់នឹងក្រុមតាលីបង់ លោក Kirby ឆ្លើយ៖ «មិនអាចធ្វើអ្វីបានច្រើនទេ»។
ប្រធានាធិបតីអាមេរិកលោកចូ បៃដិន បានបង្ហាញជំហរយ៉ាងច្បាស់ថាបេសកកម្មយោធាអាមេរិកនៅអាហ្វហ្គានីស្ថាននឹងត្រូវបញ្ចប់នៅថ្ងៃទី ៣១ ខែសីហា ដោយលើកឡើងថាប្រជាជនអាហ្វហ្គានីស្ថានត្រូវតែសម្រេចចិត្តអំពីអនាគតរបស់ពួកគេខ្លួនឯង ហើយលោកបានប្ដេជ្ញាមិនបញ្ជូនជនជាតិអាមេរិកមួយជំនាន់ថ្មីទៀតឱ្យទៅចូលរួមក្នុងសង្គ្រាមរយៈពេល២០ឆ្នាំនេះទេ។
ក្នុងលក្ខខណ្ឌមិនបញ្ចេញអត្តសញ្ញាណ មន្ត្រីសហរដ្ឋអាមេរិកមួយរួប បានប្រាប់សារព័ត៌មាន Reuters ថា ខណៈពេលដែលយោធាអាមេរិកបានប្រាប់លោកបៃដិនរួចហើយថាទីរួមខេត្តជាច្រើននឹងដួលរលំប្រសិនបើមានការដកខ្លួនកងទ័ពអន្តជាតិ ពួកគេមានការភ្ញាក់ផ្អើលចំពោះល្បឿននៃការដួលរលំទីក្រុងទាំងនេះ។
ក្នុងរយៈពេលដែលក្រុមតាលីបង់ចូលកាន់កាប់ទីក្រុងទាំងនេះ អាមេរិកបានធ្វើការវាយប្រហារតាមអាកាសមិនលើសពីដប់ដង ដោយក្នុងមួយករណីពួកគេគ្រាន់តែធ្វើការវាយប្រហារលើកន្លែងស្ដុកឧបករណ៍ប៉ុណ្ណោះ។
ការកើនឡើងការវាយលុករបស់តាលីបង់បានធ្វើឱ្យមានការរិះគន់ការដកកងទ័ពអន្តជាតិចេញពីអាហ្វហ្គានីស្ថាន។ រដ្ឋមន្ត្រីក្រសួងការពារជាតិអង់គ្លេសលោក Ben Wallace បានប្រាប់សារព័ត៌មាន The Daily Mail ថាកិច្ចព្រមព្រៀងរវាងអាមេរិកនិងតាលីបង់កាលពីឆ្នាំមុនគឺជា «កិច្ចព្រមព្រៀងរលួយ»។
កាលពីឆ្នាំមុនសហរដ្ឋអាមេរិកក្រោមការដឹកនាំរបស់អតីតប្រធានាធិបតីលោកដូណាល់ ត្រាំ បានធ្វើការចរចាជាមួយក្រុមតាលីបង់ហើយបានយល់ព្រមដកកងទ័ពចេញពីអាហ្វហ្គានីស្ថានត្រឹមខែឧសភា ២០២១។ លោកបៃដិន មានជំហរដូចលោកត្រាំក្នុងការដកទាហានចេញពីអាហ្វហ្គានីស្ថាន ប៉ុន្តែបានពន្យារពេលរហូតដល់ខែសីហា។
លោក Wallace បាននិយាយថារដ្ឋាភិបាលអង់គ្លេសបានព្យាយាមបញ្ចុះបញ្ចូលសមាជិកអង្គការណាតូផ្សេងទៀតឱ្យរក្សាកងទ័ពពួកគេនៅក្នុងអាហ្វហ្គានីស្ថាន នៅពេលអាមេរិកបានចាកចេញ ប៉ុន្តែផែនការនេះមិនបានទទួលការគាំទ្រទេ។
លោក Wallace បាននិយាយថា៖ «ប្រទេសខ្លះនិយាយថាពួកគេចាប់អារម្មណ៍ ប៉ុន្តែសភារបស់ពួកគេមិនព្រមទេ។ វាបានបង្ហាញយ៉ាងឆាប់រហ័សថាបើគ្មានសហរដ្ឋអាមេរិកជាប្រទេសក្របខ័ណ្ឌនោះទេ ជម្រើសទាំងនេះត្រូវបានបិទ»។
រដ្ឋមន្ត្រីក្រសួងការពារជាតិអាល្លឺម៉ង់បានច្រានចោលការអំពាវនាវឱ្យទាហានរបស់ខ្លួនវិលត្រឡប់ទៅអាហ្វហ្គានីស្ថានវិញ បន្ទាប់ពីក្រុមតាលីបង់ចូលកាន់កាប់ទីក្រុង Kunduz ដែលជាមូលដ្ឋានកងទ័ពអាល្លឺម៉ង់អស់រយៈពេលជាងមួយទសវត្ស។
យ៉ាងណាមិញ គ្រួសារជាច្រើនបានភៀសខ្លួនចេញពីទីក្រុងកាន់កាប់ដោយតាលីបង់ ទៅកាន់ទីក្រុងកាប៊ុល។ ក្រុមតាលីបង់បានចាប់ផ្ដើមធ្វើកំណែនមន្ត្រី ទាហានរដ្ឋាភិបាល និងប្រជាជនមានទំនាក់ទំនងជាមួយមន្ត្រីឬទាហាន ដើម្បីចុះឈ្មោះ «ប័ណ្ណអភ័យឯកសិទ្ធិ»។ តាលីបង់បានព្រមានថាប្រសិនបើមានអ្នកជួយរដ្ឋាភិបាលនៅពេលអនាគត ពួកគេនឹងត្រូវបានសម្លាប់ភ្លាមៗ៕
ប្រភព៖ Reuters
