លោក ដូណាល់ ត្រាំ រិះគន់សាជាថ្មីលើលោក ចូ បៃដិន ជុំវិញការបរាជ័យដែលបណ្តោយអោយអាហ្វហ្គានីស្ថានធ្លាក់ទៅក្នុងកណ្តាប់ដៃក្រុមតាលីបង់
អាមេរិក៖ អតីតប្រធានាធិបតីអាមេរិក លោក ដូណាល់ ត្រាំ បានធ្វើការវាយប្រហារលើអ្នកស្នងតំណែងរបស់លោក គឺលោក ចូ បៃដិន ពាក់ព័ន្ធនឹងការដកកងទ័ពអាមេរិកចេញពីអាហ្វហ្គានីស្ថាន ដែលលោកហៅថា ជារឿងអាម៉ាស់មុខបំផុតនៃគោលនយោបាយការបរទេសនៅក្នុងប្រវត្តិសាស្ត្រសហរដ្ឋអាមេរិក។
នៅក្នុងការជួបជុំអ្នកគាំទ្ររបស់ខ្លួននៅជិត Cullman រដ្ឋ Alabama លោក ដូណាល់ ត្រាំ បាននិយាយថា ការចាកចេញដ៏វឹកវររបស់លោក បៃដិន ពីអាហ្វហ្គានីស្ថាន គឺបង្ហាញពីការភ្ញាក់ផ្អើលបំផុតនៃអសមត្ថភាពរបស់មេដឹកនាំប្រទេសមួយ។ លោក ត្រាំ បន្ថែមថា នេះមិនមែនជាការដកទ័ពទេ… នេះគឺជាការចុះចាញ់ទាំងស្រុង… យើងអាចចាកចេញដោយកិត្តិយស… យើងគួរចាកចេញដោយកិត្តិយស… ផ្ទុយទៅវិញ យើងទទួលបានលទ្ធផលផ្ទុយពីកិត្តិយស។
សូមបញ្ជាក់ថា មេដឹកនាំតាលីបង់កំពុងត្រៀមបង្កើតរដ្ឋាភិបាលថ្មីមួយ ក្រោយកម្លាំងទ័ពរបស់ពួកគេកាន់កាប់ប្រទេសអាហ្វហ្គានីស្ថាន ស្របពេលកម្លាំងទ័ពដឹកនាំដោយអាមេរិកបានដកចេញ បន្ទាប់ពីបំពេញបេសកកម្មរយៈពេល២០ឆ្នាំ។ ជុំវិញបញ្ហានេះ លោក ចូ បៃដិន បានរិះគន់កងទ័ពអាហ្វហ្គានីស្ថានចំពោះការបដិសេធប្រយុទ្ធ និងបានថ្កោលទោសរដ្ឋាភិបាលក្រុងកាប៊ុល ដែលត្រូវបានបណ្តេញចេញ និងប្រកាសថា លោកទទួលកិច្ចព្រមព្រៀងដកទ័ពដ៏អាក្រក់ពីលោក ត្រាំ៕ ប្រភព៖ Reuters
