ការប៉ះទង្គិចផ្ទុះឡើងនៅភាគខាងជើងអាហ្វហ្គានីស្ថាន ខណៈកងកម្លាំងប្រឆាំងតាលីបង់ប្រមូលផ្ដុំជាចលនាតស៊ូ
កាលពីថ្ងៃសុក្រសប្ដាហ៌មុន ក្រុមចលនាតស៊ូបានប៉ះទង្គិចជាមួយតាលីបង់ហើយបានវាយដណ្ដើមស្រុកចំនួនបី ខណៈពេលដែលកងកម្លាំងប្រឆាំងតាលីបង់ជាច្រើនបានប្រមូលផ្ដុំគ្នាជាចលនាតស៊ូនៅតំបន់ជ្រលងភ្នំនៅភាគខាងជើងប្រទេសអាហ្វហ្គានីស្ថាន។
វីដេអូជាច្រើនបង្ហោះលើបណ្ដាញសង្គមជាច្រើនបង្ហាញអំពីការប្រយុទ្ធនៅខេត្ត Baghlan រវាងក្រុមតាលីបង់ និងក្រុមប្រឆាំង ដែលមានមូលដ្ឋាននៅជ្រលងភ្នំ Panjshir ជាប់ខេត្តនោះ។ ក្រោយមកគេមានការបង្ហោះវីដេអូបង្ហាញពីក្បួនរថយន្តយោធាផលិតដោយអាមេរិក ប៉ុន្តែមានទង់របស់តាលីបង់កំពុងធ្វើដំណើរទៅកាន់ជ្រលងភ្នំ Panjshir។
នៅតំបន់ផ្សេងទៀតនៃប្រទេសអាហ្វហ្គានីស្ថាន កងជីវពលតាមមូលដ្ឋាននានាក៏បានចាប់ផ្ដើមប្រឆាំងការគ្រប់គ្រងរបស់តាលីបង់។
នេះគឺជាការប៉ះទង្គិចលើកដំបូងនៅអាហ្វហ្គានីស្ថានតាំងពីពេលដែលក្រុមតាលីបង់ចូលកាន់កាប់ក្រុងកាប៊ុលកាលពីថ្ងៃទី១៥ខែនេះ។
ខណៈពេលដែលកងទ័ពនិងកងកម្លាំងសន្តិសុខអាហ្វហ្គានីស្ថានភាគច្រើនបានដួលរលំ គេសង្កេតឃើញថាមានបំណែកមួយកងទ័ពបានធ្វើការដកថយចូលជ្រលងភ្នំ Panjshir នៅខាងជើងប្រទេស ដោយប្ដេជ្ញាថានឹងបន្តការប្រយុទ្ធចេញពីខេត្តតែមួយគត់ដែលមិនរងឥទ្ធិពលពីតាលីបង់។
មេដឹកនាំចលនាតស៊ូរួមមានរដ្ឋមន្ត្រីការពារជាតិនៃរដ្ឋាភិបាលដែលដួលរលំលោកប៊ីសមីឡា ខាន ម៉ូហាម៉ាឌី និងលោកអនុប្រធានាធិបតីអាំរុឡា សាឡេះ ដែលអះអាងថាលោកជាមេដឹកនាំស្របច្បាប់ បន្ទាប់ពីលោកប្រធានាធិបតីអាស្រាហ្វ ហ្គានី បោះបង់ចោលភារកិច្ចហើយភៀសខ្លួនចេញពីប្រទេសនៅថ្ងៃទី ១៥ ខែសីហា។
មេដឹកនាំទាំងពីរនេះគឺពឹងផ្អែកលើកងកម្លាំងគ្រប់គ្រងដោយលោកអាមេដ ម៉ាស៊ូដ ជាកូនប្រុសរបស់មេបញ្ជាការដ៏ល្បីល្បាញគឺលោកអាមេដ សា ម៉ាស៊ូដ ដែលកាលពីទសវត្សឆ្នាំ ១៩៩០ បានការពារខេត្ត Panjshir ពីការឈ្លានពានរបស់សហភាពសូវៀត និងតាលីបង់ មុនពេលលោកត្រូវបានធ្វើឃាតដោយក្រុមអាល់កៃដាកាលពីឆ្នាំ ២០០១។ ឥឡូវនេះចលនាតស៊ូបានអះអាងថាលោកម៉ាស៊ូដគ្រប់គ្រងទាហានយ៉ាងហោចណាស់ ៩០០០ ភាគច្រើនជាទាហានកងកុម្ម៉ង់ដូ និងទាហានកងជីវពលមូលដ្ឋាន ដែលមិនព្រមទទួលយកការចុះចាញ់។
ខណៈពេលដែលកងកម្លាំងដែលបានវាយលុកនៅខេត្តBaghlanគឺជាសម្ព័ន្ធមិត្តរបស់លោកម៉ាស៊ូដ កងកម្លាំងនេះបានវាយប្រហារក្រុមតាលីបង់ដោយខ្លួនឯងដោយមិនពាក់ព័ន្ធកងកម្លាំងរបស់លោកម៉ាស៊ូដ។ កាលពីថ្ងៃអាទិត្យលោកម៉ាស៊ូដសង្ឃឹមថានឹងអាចធ្វើការចរចាដោយសន្តិវិធីជាមួយតាលីបង់ ប៉ុន្តែកងកម្លាំងរបស់លោកត្រៀមខ្លួនជាស្រេចសម្រាប់ការប្រយុទ្ធគ្នា។
លោកម៉ាស៊ូដបានប្រាប់សារព័ត៌មាន Reuters តាមទូរស័ព្ទថា៖ «យើងចង់ធ្វើឱ្យតាលីបង់ដឹងថាផ្លូវតែមួយគត់ឆ្ពោះទៅមុខគឺតាមរយៈការចរចា»។ លោកបន្តថា៖ «យើងមិនចង់ឱ្យសង្គ្រាមផ្ទុះឡើងទេ»។
លោកម៉ាស៊ូដបានអំពាវនាវឱ្យមានរដ្ឋាភិបាលដែលមានមូលដ្ឋានទូលំទូលាយនៅក្នុងទីក្រុងកាប៊ុលតំណាងឱ្យក្រុមជនជាតិផ្សេងៗគ្នារបស់អាហ្វហ្គានីស្ថាន ហើយបាននិយាយថារបបផ្ដាច់ការ មិនគួរត្រូវបានទទួលស្គាល់ដោយសហគមន៍អន្តរជាតិឡើយ។
មន្ត្រីការបរទេសរបស់លោកម៉ាស៊ូដ គឺលោកអាលី ណាហ្សារីបាននិយាយថា៖ «លក្ខខណ្ឌសម្រាប់កិច្ចព្រមព្រៀងសន្តិភាពជាមួយតាលីបង់គឺការធ្វើវិមជ្ឈការ សម្រាប់ប្រព័ន្ធអភិបាលកិច្ចដែលធានាយុត្តិធម៌សង្គម សមភាព សិទ្ធិ និងសេរីភាពសម្រាប់ទាំងអស់គ្នា»។
បើទោះជាមានជំហរយ៉ាងមិនចង់មានសង្គ្រាមក៏ដោយ លោកម៉ាស៊ូដបានធ្វើការស្នើជំនួយអាវុធពីអាមេរិក ក្នុងអត្ថបទវិចារណកថាមួយចុះផ្សាយកាលពីថ្ងៃព្រហស្បតិ៍ក្នុងកាសែត The Washington Post។ អ្នកវិភាគមួយចំនួនបានគិតថាចលនាតស៊ូទាំងនេះនឹងមិនអាចតតាំងនឹងតាលីបង់បានរយៈពេលវែងទេ បើគ្មានជំនួយពីខាងក្រៅ។
ទន្ទឹមនឹងនេះក្រុមតាលីបង់គឺកំពុងចរចាជាមួយសមាជិកនៃរដ្ឋាភិបាលដួលរលំនៅទីក្រុងកាប៊ុល ដើម្បីធ្វើសម្រេចរចនាសម្ព័ន្ធនៃរដ្ឋាភិបាលថ្មី។ សហរដ្ឋអាមេរិក និងបណ្ដាប្រទេសលោកខាងលិចបានព្រមានតាលីបង់ថាការគ្រប់គ្រងផ្ដាច់ការនិយមនឹងពន្យារសង្គ្រាមស៊ីវិលអាហ្វហ្គានីស្ថាន ហើយរដ្ឋាភិបាលបែបនេះនឹងមិនត្រូវបានទទួលស្គាល់ទេ៕
ប្រភព៖ Aljazeera
