អូស្ត្រាលីត្រៀមបង្កើតទិដ្ឋការថ្មីសម្រាប់ពលករចំណាកស្រុមកមកធ្វើការក្នុងវិស័យកសិកម្ម
ប្រទេសអូស្រ្តាលីកំពុងត្រៀមបើកដំណើរការទិដ្ឋាការថ្មីដែលបង្កើតដើម្បីបង្កើនចំនួនជនបរទេសមកធ្វើការនៅកសិដ្ឋានអូស្ត្រាលី។
ក្នុងការធ្វើកិច្ចព្រមព្រៀងភាពជាដៃគូសម្រាប់ទិដ្ឋាការថ្មីនេះ រដ្ឋមន្ត្រីក្រសួងកសិកម្មលោក David Littleproud បាននិយាយថា រដ្ឋាភិបាលនឹងផ្តោតលើប្រទេសដែលមានកិច្ចព្រមព្រៀងទ្វេភាគីជាយូរមកហើយដូចជាប្រទេសហ្វីលីពីន ថៃ សិង្ហបុរី វៀតណាម កូរ៉េខាងត្បូង ព្រមទាំងសមាជិកដទៃទៀតនៃសមាគមប្រជាជាតិអាស៊ីអាគ្នេយ៍ (អាស៊ាន) ។
ទិដ្ឋាការថ្មីនេះនឹងផ្តល់ជូនដល់កម្មករ និងនិយោជិតទូទាំងវិស័យកសិកម្ម វិស័យជលផល និងព្រៃឈើ។ ទិដ្ឋការសម្រាប់វិស័យកសិកម្មនៅអូស្រ្តាលីជាវិធីសាស្រ្តព្យាយាមផ្តល់នូវដំណោះស្រាយរយៈពេលវែងចំពោះកង្វះកម្លាំងពលកម្មនៅក្នុងវិស័យកសិកម្មដែលមានប្រហែល ៣ ភាគរយទិន្នផលសរុបរបស់ប្រទេសអូស្រ្តាលី។
វិធីសាស្រ្តថ្មីនេះនឹងអនុញ្ញាតអោយពលករចំណាកស្រុកធ្វើការនៅប្រទេសអូស្ត្រាលីរយៈពេល ៣ ឆ្នាំដោយមានតម្រូវការវិលត្រឡប់ទៅប្រទេសកំណើតវិញរយៈពេល ៣ ខែជារៀងរាល់ឆ្នាំ។ ប្រសិនបើជនចំណាកស្រុកដែលមកធ្វើការនៅប្រទេសអូស្រ្តាលីយល់ព្រមធ្វើការនៅក្នុងវិស័យដែលបានអនុញ្ញាតលើសពីបីឆ្នាំ ពួកគេក៏អាចដាក់ពាក្យសុំស្នាក់នៅអចិន្ត្រៃយ៍បានដែរ។
តាមតួលេខស្ទង់មតិផ្ទាល់របស់សហព័ន្ធកសិករអូស្រ្តាលីកសិករប្រហែល ៨០ ភាគរយបានជួបប្រទះការលំបាកខ្លាំងក្នុងការស្វែងរកកម្មករ។ ទិដ្ឋការនេះក៏ធ្វើអោយមានការព្រួយបារម្ភនឹងការកែងកម្លាំងពលករកម្មករដោយនិយោជិកដែលអាចនឹងផ្តល់ប្រាក់ទាបជាងតម្លៃទីផ្សារដោយសារកំណើននៃជនចំណាកស្រុមមកប្រទេសអូស្រ្តាលីផងដែរ។
ប្រធានសហព័ន្ធកសិករអូស្រ្តាលីលោក Fiona Simson បាននិយាយថា៖ «អ្វីដែលត្រូវការគឺទិដ្ឋាការដែលអាចបត់បែនបាន និងអាចអោយពួកគេចល័តបានដើម្បីអាចអោយកម្មករផ្លាស់ប្តូរពីកសិដ្ឋានមួយទៅកសិដ្ឋានមួយ»។ លោកបាននិយាយបន្ថែមថា កសិដ្ឋានលក្ខណៈគ្រួសារតូចៗជាច្រើនមិនអាចផ្តល់ការងារទៅកម្មករដែលត្រូវការក្រោមទិដ្ឋាការជាក់លាក់បាននោះទេ។
ទោះយ៉ាងណាអ្នកស្រាវជ្រាវវិស័យកសិកម្មខ្លះជឿជាក់ថា ទិដ្ឋាការដែលផ្តោតសំខាន់លើបណ្តាប្រទេសអាស៊ីគឺមិនផ្អែកតែទៅលើលទ្ធភាពនៃចំនួនពលករចំណាកស្រុកតាមបណ្តាប្រទេសនីមួយៗនេះទេ។ នៅក្នុងរបាយការណ៍ឆ្នាំ ២០១៨ អ្នកជំនាញខាងវិស័យកសិកម្មលោក Joanna Howe សាស្រ្តាចារ្យនៅសាកលវិទ្យាល័យ Adelaide បានសរសេរថា និយោជិកទំនោរជ្រើសរើសកម្មករផ្អែកលើការយល់ឃើញថាកម្មករទាំងនោះងាយស្រួលគ្រប់គ្រងនិងមានតម្លៃពលកម្មទាប ។
