សមាគមទេសចរណ៍ស្នើអោយរាជរដ្ឋាភិបាល និងក្រសួងទេសចរណ៍ដាក់វិស័យនេះទៅក្នុងវិស័យសេវាកម្ម ដើម្បីទទួលបានកម្ចីផ្សេងៗក្នុងស្តាវិស័យនេះឡើងវិញ (Video Inside)
ភ្នំពេញ៖ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបញ្ជាក់ថា សមាគមទេសចរណ៍បានស្នើអោយរាជរដ្ឋាភិបាល និងក្រសួងទេសចរណ៍ដាក់វិស័យនេះ ទៅក្នុងវិស័យសេវាកម្ម ដើម្បីទទួលបានកម្ចីផ្សេងៗក្នុងស្តាវិស័យនេះឡើងវិញ ពីព្រោះអ្នករកស៊ីផ្នែកនេះ មានតែសេវាកម្មសុទ្ធសាធ អត់មានផលិតផលយកទៅលក់នោះទេ។
លោកស្រី ឆាយ ស៊ីវលីន បានលើកឡើងថា ខ្ញុំសូមស្នើអោយរាជរដ្ឋាភិបាលដាក់វិស័យទេសចរណ៍ទៅក្នុងវិស័យសេវាកម្មផង ពីព្រោះយើងតែងឃើញមានវិធានការជួយដល់វិស័យឯកជន ហើយក៏ឃើញមានការផ្ដល់កម្ចីផ្សេងៗ ដែលមានលក្ខណៈបន្ធូរបន្ថយការប្រាក់ និងកសាងឯកសារនានា ហើយនៅក្នុងនោះ មិនឃើញមានវិស័យទេសចរណ៍ទេ ចឹងចង់ឲ្យពិនិត្យឡើងវិញលើវិស័យទេសចរណ៍នេះ។ លោកស្រីបន្តថា ទីភ្នាក់ងារទេសចរណ៍អត់មានផលិតផល មាស ពេជ្រយកទៅលក់នោះទេ គឺគាត់លក់តែសេវាកម្មសុទ្ធសាធ គឺគាត់នាំទេសចរមកដើរកម្សាន្តតាមរមណីយដ្ឋាន តាមតំបន់បេតិកភណ្ឌជាតិនានា ដូច្នេះសូមអោយដាក់បញ្ចូលនៅក្នុងវិស័យអាទិភាពផង ពីព្រោះវិស័យកំពុងប៉ះពាល់ផ្ទាល់តែម្ដង។ លោកស្រី ឆាយ ស៊ីវលីន បានសំណូមពរឱ្យទម្លាក់កម្ចីពិសេសណាមួយអោយទីភ្នាក់ងារទេសចរណ៍ និងក្រុមហ៊ុនទេសចរណ៍ ដើម្បីអោយពួកគាត់បានចិញ្ចឹមអ្នកជំនាញ ព្រោះវិស័យទេសចរណ៍នេះចាំបាច់ត្រូវតែអ្នកមានអ្នកជំនាញដើម្បីប្រកួតប្រជែង។ លោកស្រីបន្ថែមថា អ្នកជំនាញនៅអាស៊ាន ក៏ដូចជាពិភពលោក គេមានជំនាញខ្លាំងណាស់ ដូច្នេះកម្ពុជាយើងត្រូវតែមានអ្នកជំនាញដែលមានបទពិសោធន៍។
លោកស្រីអះអាងថា យើងត្រូវតែរក្សាពួកគាត់ទុក ឬចិញ្ចឹមពួកគាត់ បើយើងមិនចិញ្ចឹមគាត់ទេ គាត់ត្រូវការប្រាក់ដើម្បីចិញ្ចឹមជីវភាពគ្រួសារ ហើយពួកគាត់នឹងទៅរកការងារផ្សេងៗ ធ្វើឲ្យយើងបារម្ភនៅពេលដែលស្ថានស្ថានការណ៍ធូរស្រាល យើងមិនអាចហៅពួកគាត់មកធ្វើការវិញបាន។ ជុំវិញបញ្ហានេះដែរ ឯកឧត្តម ជុក ជំនោ អ្នកនាំពាក្យក្រសួងទេសចរណ៍បានបញ្ជាក់ថា នៅថ្ងៃទី០២ ខែកញ្ញា ខាងមុខនេះ នឹងមានកិច្ចប្រជុំមួយជាមួយក្រសួងសេដ្ឋកិច្ច ដើម្បីពិនិត្យទៅលើឯកសារទាក់ទងជាមួយនឹងការបើកអោយដំណើរការទេសចរណ៍ឡើងវិញ ដូច្នេះនៅក្នុងកិច្ចប្រជុំនោះ អាចនឹងមានការជជែកគ្នាពីបញ្ហានេះ ដូច្នេះអ្វីៗក្រសួងទេស ចរណ៍កំពុងតែខិតខំធ្វើការជាមួយក្រសួងសេដ្ឋកិច្ច និងហិរញ្ញវត្ថុ ក៏ដូចជាស្ថាប័នពាក់ព័ន្ធ ដើម្បីផ្តល់ជូនវិស័យឯកជន៕
