កសិកររស់នៅខេត្តព្រៃវែងនាំគ្នាចាប់យកមុខរបរចិញ្ចឹមចង្រិតដែកលក់ ដើម្បីរកប្រាក់ចំណូលជួយផ្គត់ផ្គង់ជីវភាពគ្រួសារ (Video Inside)
ខេត្តព្រៃវែង ៖ កសិករដែលរស់នៅក្នុងភូមិទូលពពេល ឃុំគោកគង់លិច ស្រុកកញ្ច្រៀច ខេត្តព្រៃវែង បាននាំគ្នាចាប់យកមុខរបរចិញ្ចឹមចង្រិតដែកលក់ ដោយសារមានទីផ្សារច្រើន ហើយប្រើរយៈពេលខ្លី ចំណែកតម្លៃវិញ គឺថ្លៃគួរសមដែលអាចទទួលយកបាន ដើម្បីរកប្រាក់ចំណូលជួយផ្គត់ផ្គង់ជីវភាពគ្រួសារឱ្យធូរធាបានមួយកម្រិតទៀត។
កសិករប្រកបមុខរបរចិញ្ចឹមចង្រិតម្នាក់បានអោយដឹងថា ការចាប់យកមុខរបរចិញ្ចឹមចង្រិតដែកនេះ គឺដោយសារមានទីផ្សារច្រើន ជួនការចិញ្ចឹមមិនទាន់តម្រូវការឈ្មួញផង ហើយចង្រិតដែកនេះ មិនពិបាកចិញ្ចឹមនោះទេ។ បើតាមកសិករដដែលនេះ ចង្រិតងាយស្រួលចិញ្ចឹមជាងមាន់ ទារ និងជ្រូកទៀត ដែលប្រើរយៈពេលត្រឹមតែ៤០ថ្ងៃប៉ុណ្ណោះនឹងបានប្រមូលផល ហើយក៏មានឈ្មួញចុះមកប្រមូលទិញដល់ផ្ទះទៀត ដោយក្នុង១គីឡូក្រាមអាចលក់បានតម្លៃ១ម៉ឺន១ពាន់រៀលឯណោះ។
កសិករដដែលនេះបញ្ជាក់ទៀតថា នៅឃុំគោកគង់លិចនេះ ក្រៅពីមុខរបរបង្កបង្កើនផលដំណាំធ្វើស្រែចំការបន្តិចបន្តួចហើយ កសិករជាច្រើនគ្រួសារក៏បាននាំគ្នាឆ្លៀតពេលងាកមកចាប់យកមុខរបរចិញ្ចឹមចង្រិត ដោយអ្នកខ្លះចិញ្ចឹម១០ទ្រុង និងអ្នកខ្លះទៀតចិញ្ចឹម២០ទ្រុង ព្រោះចំណាយដើមទុនតិចអោយវាស៊ីស្លឹកឈើ និងចំណីកូនមាន់បន្តិចបន្តួចតែប៉ុណ្ណោះ ដើម្បីរកប្រាក់ជួយផ្គត់ផ្គង់សេដ្ឋកិច្ចគ្រួសារធូរធាបានមួយកម្រិតដែរ៕ ប្រភព៖ កោះសន្តិភាព
