នាយករដ្ឋមន្ត្រីវៀតណាមព្រមានអំពីការអូសបន្លាយពេលក្នុងការប្រយុទ្ធប្រឆាំងនឹងវីរុស Covid-19
ហាណូយ៖ នាយករដ្ឋមន្ត្រីវៀតណាមលោក ផាំ មិញជិញ ថ្លែងថា ប្រទេសរបស់លោកអាចប្រឈមមុខនឹងសមរភូមិអូសបន្លាយពេលមួយ ក្នុងការប្រយុទ្ធប្រឆាំងនឹងជំងឺកូវីដ១៩ ហើយមិនអាចពឹងតែលើការបិទខ្ទប់ និងវិធានការចត្តាឡីស័កគ្មានពេលកំណត់បានទេ ។
នាយករដ្ឋមន្ត្រីវៀតណាមរូបនេះ បានជួបប្រជុំជាមួយអ្នកជំនាញការ ដើម្បីស្តាប់គំនិតអំពីការប្រយុទ្ធប្រឆាំងនឹងជំងឺនេះ។ លោកបាននិយាយថា ការរឹតត្បិតបានបង្ក «ការលំបាកទាំងខាងសម្ភារ និងផ្លូវចិត្ត»។ វិធានការបច្ចុប្បន្នក៏បានបង្ខំអោយបណ្តាក្រុមហ៊ុននៅក្នុងអាជីវកម្មប្រើកម្លាំងពលកម្មច្រើន រួមមានក្រុមហ៊ុនផ្គត់ផ្គង់ផលិតផលម៉ាកល្បីៗដូចជា Nike និង Adidas ផ្អាកដំណើរការ។ លោក ជិញ បានសង្កត់ធ្ងន់ទៀតថា ការទប់ស្កាត់ការស្លាប់មនុស្សជាអាទិភាពកំពូល ហើយការចាក់វ៉ាក់សាំងជាវិធានការគន្លឹះមួយ។
សូមបញ្ជាក់ថា រដ្ឋាភិបាលវៀតណាមបានដាក់ពង្រាយទាហាន និងប៉ូលិសរាប់ពាន់នាក់ ដើម្បីចាប់បង្ខំអោយប្រជាជនក្នុងទីក្រុងហូជីមិញ នៅក្នុងផ្ទះនៅប៉ុន្មានសប្តាហ៍មកនេះ ក្នុងចំណាត់ការតឹងរឹងបំផុតរបស់ខ្លួន ដើម្បីប្រយុទ្ធនឹងការឆ្លងរាលដាលនៃវីរុសកូវីដ១៩ តែចំនួនឆ្លងហាក់មិនស្រកស្រុតចុះសោះ៕ ប្រភព៖ CNA
