Sinopharm ផលិតវ៉ាក់សាំងប្រើបច្ចេកវិទ្យា mRNA ខ្លួនឯង ដើម្បីប្រសិទ្ធិភាពប្រឆាំងវ៉ារ៉្យង់ដែលតា
ក្រុមហ៊ុនវ៉ាក់សាំងចិន Sinopharm កំពុងផលិតវ៉ាក់សាំងប្រើបច្ចេកវិទ្យា mRNA ក្នុងស្រុកខ្លួនឯង ដើម្បីបង្កើនប្រសិទ្ធិភាពប្រឆាំងនឹងវ៉ារ៉្យង់ដែលតា ដែលជំហាននេះបានធ្វើឱ្យក្រុមហ៊ុននេះ ក្លាយជាក្រុមហ៊ុនឱសថចិនធំដំបូងគេ ដែលអភិវឌ្ឍន៍បច្ចេកវិទ្យាបន្ថែម ដើម្បីប្រយុទ្ធប្រឆាំងនឹងជំងឺនេះ។ នេះបើតាមឱ្យដឹងពីសារព័ត៌មាន The Financial Times។
ជំហានថ្មីរបស់ក្រុមឱសថស្ថាន ដែលគ្រប់គ្រងដោយរដ្ឋនេះ ធ្វើឡើងក្រោយមានការព្រួយបារម្ភទាក់ទិននឹងប្រសិទ្ធភាពនៃវ៉ាក់សាំងការពារមេរោគអសកម្មធម្មតា ដែលលក់ចេញនៅទូទាំងប្រទេសចិន។ ការសិក្សាមួយចំនួន បានបង្ហាញថា វ៉ាក់សាំងទាំងនេះនឹងបង្កើតអង្គបដិប្រាណតិចជាង បើប្រៀបធៀបជាមួយនឹងវ៉ាក់សាំង mRNA ។បច្ចប្បន្ននេះ វ៉ាក់សាំងប្រើបច្ចេកវិទ្យា mRNA មាននៅក្នុងវ៉ាក់សាំង Pfizer ឬ Moderna របស់សហរដ្ឋអាមេរិក ។
វ៉ាក់សាំងមានមេរោគអសកម្មធម្មតា ដូចនៅក្នុងវ៉ាក់សាំង Sinopharm ស្រាប់ បានប្រើភាគល្អិតមេរោគ ដែលស្លាប់ ដើម្បីបង្កើតការឆ្លើយតបនៃប្រព័ន្ធភាពស៊ាំ ខណៈដែលវ៉ាក់សាំង mRNA បានប្រើប្រាស់ហ្សែនឱ្យផ្ស៊ាំនឹងកោសិកា ដើម្បីបង្កើតប្រូតេអ៊ីនមេរោគ បង្កើតជាប្រព័ន្ធការពាររាងកាយរឹងមាំ។
ទោះយ៉ាងណាក្ដី ក្រុមហ៊ុនវ៉ាក់សាំង Sinopharm មិនមែនជាក្រុមហ៊ុនចិនតែមួយគត់ ដែលកំពុងអភិវឌ្ឍន៍វ៉ាក់សាំង mRNA ដោយខ្លួនឯងនោះទេ។ ក្រុមហ៊ុនផលិតឱសថតូច ដូចជា ក្រុមហ៊ុន Walvax Biotechnology ក៏កំពុងធ្វើការសាកល្បងលើការផលិតរួចហើយដែរ។ ប៉ុន្តែ ក្រុមហ៊ុនផលិតឱសថយក្សដូច Sinopharm ដែលសម្រេចផលិតវ៉ាក់សាំង mRNA នេះអាចជំរុញដល់បច្ចេកវិទ្យានៃការផលិតវ៉ាក់សាំងនេះកាន់តែខ្លាំងថែមទៀតនៅក្នុងប្រទេសចិន។
លោក Jin Dong-yan អ្នកជំនាញខាងមេរោគនៅសាកលវិទ្យាល័យហុងកុង បាននិយាយថា៖ « ពួកគេកំពុងព្យាយាមអភិវឌ្ឍន៍វ៉ាក់សាំងទាំងនេះ ជាវ៉ាក់សាំងជំនាន់ក្រោយ ពីព្រោះរួមបញ្ជូលជាមួយនឹងវ៉ាក់សាំងជំនាន់ទី ១ វ៉ាក់សាំងជំនាន់ក្រោយនឹងអាចប្រើប្រាស់ជាដូសជំនួយ។ ហើយ វ៉ាក់សាំង mRNA នេះ មានប្រសិទ្ធភាពជាងវ៉ាក់សាំងអសកម្មទៅទៀត»។
ក្រុមហ៊ុន BioNTech ដែលជាក្រុមហ៊ុនផលិតថ្នាំរបស់អាល្លឺម៉ង់ កំពុងសហការជាមួយដៃគូចែកចាយ Pfizer និងក្រុមហ៊ុន Fosun Pharma របស់ចិន ដើម្បីចែកចាយវ៉ាក់សាំង mRNA របស់ខ្លួនទៅក្នុងទីផ្សារប្រទេសចិន ហើយកំពុងរង់ចាំការយល់ព្រមជាផ្លូវការពីទីក្រុងប៉េកាំង។
លោក Zhu Jingjin លេខាបក្សកុម្មុយនិស្តចិននៃក្រុមហ៊ុន China National Biotec Group ដែលជាអង្គភាពមួយក្រុមហ៊ុន Sinopharm បាននិយាយថា ខ្លួនកំពុងបង្កើតវ៉ាក់សាំង mRNA ក៏ដូចជា វ៉ាក់សាំងប្រូតេអ៊ីន ដែលមានវិសាលគមទូលំទូលាយ ប៉ុន្តែដំណើរការនេះកំពុងស្ថិតនៅក្នុងការសាកល្បងនៅឡើយ។
លោក Zhu បានប្រាប់ប្រព័ន្ធផ្សព្វផ្សាយរដ្ឋចិននៅឯពិព័រណ៍អន្តរជាតិចិន សម្រាប់ពាណិជ្ជកម្មសេវាកម្មនៅទីក្រុងប៉េកាំងថា៖ «យើងបានបង្កើតវ៉ាក់សាំងប្រឆាំងនឹងវ៉ារ៉្យង់ដែលតា និងបែតា»។ លោកបានបន្ថែមថា ការសាកល្បងវ៉ាក់សាំងដំណាក់កាលទី ១ និងដំណាក់កាលទី ២ ត្រូវបានបញ្ចប់ សម្រាប់ការបាញ់ប្រូតេអ៊ីនឡើងវិញ។
ប្រទេសចិន បានចែកចាយវ៉ាក់សាំងជាង ២ ប៊ីលានដូស ដែលភាគច្រើនជាវ៉ាក់សាំងអសកម្ម ដែលបង្កើតឡើង ដោយក្រុមហ៊ុន Sinopharm និងក្រុមហ៊ុនឯកជនមួយទៀត ដែលជាកម្មសិទ្ធិរបស់ក្រុមហ៊ុន Sinovac។
វ៉ាក់សាំងទាំងនេះ អាចរក្សាទុកនៅសីតុណ្ហភាពខ្ពស់ជាងវ៉ាក់សាំង mRNA ដែលទទួលបានការអនុម័តពីអង្គការសុខភាពពិភពលោក សម្រាប់ការប្រើប្រាស់គ្រាអាសន្ន ហើយត្រូវបានចែកចាយទៅកាន់ប្រទេសជាង ១០០ នៅទូទាំងពិភពលោក។
យ៉ាងណាមិញ ប្រទេសមួយចំនួនកំពុងសិក្សាថា តើការបញ្ជូលគ្នារវាងវ៉ាក់សាំងអសកម្ម និងវ៉ាក់សាំងមួយផ្សេងទៀត ដែលមានអត្រាការពារប្រសិទ្ធិភាពខ្ពស់ ដូចជាការប្រើប្រាស់បច្ចេកវិទ្យា mRNA អាចប្រឆាំងនឹងការឆ្លងមេរោគធ្ងន់ធ្ងរដែរឬយ៉ាងណា។
ការសាកល្បងវ៉ាក់សាំង Sinopharm ដំណាក់កាលទី ៣ បានបង្ហាញពីប្រសិទ្ធភាព ៧៩ ភាគរយ ប្រឆាំងនឹងការឆ្លងមេរោគកូវីដ ដែលមានរោគសញ្ញា ប្រសិនបើការចាក់វ៉ាក់សាំងត្រូវបានអនុវត្តរយៈពេលបីសប្តាហ៍។ សម្រាប់វ៉ាក់សាំងរបស់ក្រុមហ៊ុន BioNTech មានអត្រាប្រសិទ្ធភាពដល់ទៅ ៩៥ ភាគរយ។
នៅប្រទេសកម្ពុជា ទៀតសោត ក៏កំពុងផ្តល់ជូនកម្មករជួរមុខ ដែលទទួលវ៉ាក់សាំង Sinopharm ឬ Sinovac ឱ្យទទួលបានវ៉ាក់សាំង អាស្រ្តាហ្សេនីកា (AstraZeneca) ជាដូសជំនួយ។
ប្រភព៖ FT
