យោធាអាមេរិក៖ ការធ្វើតេស្តមីស៊ីលរបស់កូរ៉េខាងជើងបង្កជាការគំរាមកំហែងដល់ប្រទេសជិតខាង
យោធាសហរដ្ឋអាមេរិក កាលពីថ្ងៃអាទិត្យកន្លងទៅ បានចាត់ទុកការធ្វើតេស្តមីស៊ីលរបស់ប្រទេសកូរ៉េខាងជើង ជាការគំរាមកំហែងមួយដល់ប្រទេសជិតខាង និងសហគមន៍អន្តរជាតិ។ នេះបើតាមសេចក្ដីប្រកាសព័ត៌មានរបស់បញ្ជាការដ្ឋានយោធាសហរដ្ឋអាមេរិកប្រចាំតំបន់ឥណ្ឌូ-ប៉ាស៊ីហ្វិក។
ប្រភពខាងលើបានឱ្យដឹងថា អាមេរិកបានជ្រាបដឹងអំពីការបាញ់មីស៊ីលគ្រូស (Cruise Missile) របស់កូរ៉េខាងជើង ហើយបន្តតាមដាន និងពិភាក្សាយ៉ាងជិតស្និទ្ធជាមួយនឹងដៃគូ និងសម្ព័ន្ធមិត្តរបស់ខ្លួន។
«សកម្មភាពនេះ [ការធ្វើតេស្តបាញ់មីស៊ីល] គូសបញ្ជាក់ថា ការផ្ដោតរបស់កូរ៉េខាងជើង ទៅលើកម្មវិធីយោធា និងបង្កជាការគំរាមកំហែងទៅដល់អ្នកជិតខាងរបស់ខ្លួន និងសហគមន៍អន្តរជាតិ»។ នេះជាការលើកឡើងរបស់បញ្ជាការដ្ឋានតំបន់របស់អាមេរិក។
កាលពីថ្ងៃច័ន្ទកន្លងទៅ សារព័ត៌មានរដ្ឋកូរ៉េខាងជើងបានចុះផ្សាយថា ខ្លួនបានធ្វើតេស្តមីស៊ីលគ្រូសរយៈចម្ងាយវែង កាលពីថ្ងៃសៅរ៍ និងថ្ងៃអាទិត្យ។
ប្រទេសកូរ៉េមួយនេះ រងទណ្ឌកម្មអន្តរជាតិ សម្រាប់កម្មវិធីផលិតអាវុធនុយក្លេអ៊ែរ និងមីស៊ីលបាលីស្ទិក តែមីស៊ីលគ្រូស ដែលទើបតែតេស្តនេះមិនមានជាប់បម្រាមហាមឃាត់មិនឱ្យផលិតនោះទេ៕
