ប៉ូឡូញថ្កោលទោសបេឡារុស និងបញ្ជូនកងទ័ពបន្ថែមទៀតទៅព្រំដែន
ប៉ូឡូញថ្កោលទោសបេឡារុសកាលពីថ្ងៃចន្ទ ចំពោះអ្វីដែលមន្រ្តីរបស់ខ្លួនពិពណ៌នាថាជា ការបង្កព្យុះភ្លៀងតាមព្រំដែន បន្ទាប់ពីមនុស្ស ៤ នាក់ដែលគេជឿថាជាជនភៀសខ្លួនស្លាប់នៅក្នុងតំបន់នេះកាលពីថ្ងៃមុន ក្រោយព្យាយាមភៀសខ្លួនចូលក្នុងប្រទេសសមាជិកសហភាពអឺរ៉ុបមួយនេះ។
បន្ថែមពីនេះ រដ្ឋាភិបាលក្រុងវ៉ាសូវីក៏នឹងបញ្ជូនកងទ័ពបន្ថែម ៥០០ នាក់ទៀត និងរថយន្តជំនាញចំនួន ៨ គ្រឿងទៅតំបន់ព្រំដែននៅសប្ដាហ៍នេះ ដើម្បីពង្រឹងការប្រឆាំងនឹងកំណើននៃសម្ពាធជនអន្តោប្រវេសន៍ដែលខ្លួននិយាយថា បេឡារុសនិងរុស្ស៊ីជាអ្នកដឹកនាំដើម្បីធ្វើឱ្យអស្ថិរភាពសហភាពអឺរ៉ុប និងរដ្ឋជាសមាជិកទាំង ២៧ របស់ខ្លួន។
នាយករដ្ឋមន្រ្តីប៉ូឡូញលោក Mateusz Morawiecki និយាយប្រាប់អ្នកសារព័ត៌មានបន្ទាប់ពីកិច្ចប្រជុំជាមួយរដ្ឋមន្ត្រីមហាផ្ទៃ និងជាប្រធានឆ្មាំព្រំដែនលោក Mariusz Kaminski ថា៖ «យើងកំពុងដោះស្រាយជាមួយសកម្មភាពដែលដឹកនាំដោយរដ្ឋាភិបាលក្រុងមីនស្ក៍ និងម៉ូស្គូ។ យើងនឹងការពារព្រំដែនប៉ូឡូញដោយការប្តេជ្ញាចិត្តយ៉ាងមោះមុត»។
មកទល់ពេលនេះ មិនទាន់មានការឆ្លើយតបភ្លាមៗយ៉ាងណាពីរដ្ឋាភិបាលក្រុងមីនស្ក៍ និងម៉ូស្គូចំពោះការចោទប្រកាន់ថ្មីៗរបស់នាយករដ្ឋមន្រ្តីប៉ូឡូញនោះទេ។
មន្រ្តីប៉ូឡូញនិយាយកាលពីថ្ងៃអាទិត្យថា សាកសពមនុស្សបីនាក់ដែលប្រហែលជាជនជាតិអ៊ីរ៉ាក់ ត្រូវបានគេរកឃើញនៅតាមព្រំដែនប៉ូឡូញ ខណៈអាជ្ញាធរបេឡារុសប្រកាសថាស្ត្រីអ៊ីរ៉ាក់ម្នាក់ស្លាប់នៅចម្ងាយប្រមាណមួយម៉ែត្រពីព្រំដែន។ ប្តីរបស់ស្ត្រីរូបនេះ ប្រាប់ទីភ្នាក់ងាររដ្ឋបេឡារុស BelTA ថា ក្រុមគ្រួសាររបស់ខ្លួនត្រូវបានប៉ូលីសការពារព្រំដែនប៉ូឡូញរុញចូលទៅក្នុងដែនដីបេឡារុសវិញ។
ប៉ូឡូញ និងលីទុយអានីដែលជារដ្ឋសមាជិកសហភាពអឺរ៉ុបដូចគ្នានិយាយថា សម្ពាធតាមព្រំដែនគឺជាផ្នែកមួយនៃ «ការវាយប្រហារ» ដោយរបបលោក Alexander Lukashenko ដែលជាប្រធានាធិបតីបេឡារុសក្នុងគោលបំណងតែមួយគត់គឺធ្វើឲ្យសហភាពអឺរ៉ុបទៅជាអស្ថិរភាព ជាការឆ្លើយតបនឹងការដាក់ទណ្ឌកម្មទាក់ទងនឹងបញ្ហាសិទ្ធិមនុស្ស និងនយោបាយរបស់ប្លុកនេះលើរដ្ឋាភិបាលខ្លួន។
ចាប់តាំងពីដើមខែសីហាមក មនុស្សរាប់ពាន់នាក់ដែលភាគច្រើនមកពីមជ្ឈឹមបូព៌ា និងអាហ្វហ្គានីស្ថាន ព្យាយាមឆ្លងកាត់ព្រំដែនរួមរបស់បេឡារុសជាមួយប៉ូឡូញ ឡេតូនី និងលីទុយអានី។ ក្រុមសិទ្ធិមនុស្សអះអាងថា រដ្ឋាភិបាលប៉ូឡូញកំពុងធ្វើការរុញច្រានជនអន្តោប្រវេសន៍ទៅបេឡារុសវិញ ដែលជាសកម្មភាពមួយខុសនឹងច្បាប់អន្តរជាតិ។
ប្រភព៖ DW
