មេធាវី៖ អ៊ុងសាន ស៊ូជី មិនប្រឆាំងនឹងការប្រកាសសង្គ្រាមរបស់ NUG ប្រឆាំងនឹងយោធាទេ
អ្នកស្រី អ៊ុងសាន ស៊ូជី អតីតទីប្រឹក្សារដ្ឋមីយ៉ាន់ម៉ា ច្រានចោលលើពាក្យចចាមអារ៉ាម ដែលថាអ្នកស្រីមិនគាំទ្រនឹងការប្រកាស «សង្គ្រាមការពារប្រជាជន» របស់រដ្ឋាភិបាលស្រមោលមីយ៉ាន់ម៉ា NUG ប្រឆាំងនឹងរដ្ឋអំណាចយោធានោះទេ។ នេះបើតាមការលើកឡើងរបស់លោក Khin Maung Zaw មេធាវីការពារក្ដីឱ្យអ្នកស្រីកាលពីថ្ងៃច័ន្ទ។
ក្រោយពីខាង NUG ប្រកូកប្រកាសឱ្យក្រោកឈរប្រឆាំងនឹងរដ្ឋាភិបាលដឹកនាំដោយក្រុមយោធា មានព័ត៌មានមួយចំនួនបានចេញផ្សាយថា អ្នកស្រី ស៊ូជី មិនគាំទ្រលើវិធីសាស្ត្រនេះទេ ហើយនៅតែចង់ប្រកាន់ខ្ជាប់នូវវិធីសាស្ត្របែបអហិង្សា និងប្រកបដោយសន្តិវិធី។
ទីភ្នាក់ងារសារព័ត៌មានបារាំង AFP បានចុះផ្សាយថា អ្នកស្រីច្រានចោលលើពាក្យចចាមអារ៉ាមទាំងនេះ ហើយសុំមិនអត្ថាធិប្បាយពាក់ព័ន្ធនឹងបញ្ហានេះឡើយ។ យ៉ាងណាមិញ សារព័ត៌មានមីយ៉ាន់ម៉ា Irrawaddy បានចុះផ្សាយថា អ្នកស្រីមិនប្រឆាំងនឹងឆន្ទៈរបស់ប្រជាជននោះទេ។
«នៅពេលយើងប្រាប់គាត់អំពីព័ត៌មាននោះ [សំដៅលើពាក្យចចាមអារ៉ាម] អ្នកស្រីក៏បានសួរថា “តើប្រជាជនជឿដែរទេ?” ហើយបន្ថែមថា “ខ្ញុំមិនដែលនិយាយពាក្យណា ដែលប្រឆាំងនឹងឆន្ទៈរបស់ប្រជាជននោះទេ”។
អ្នកស្រី ស៊ូជី កំពុងរងការចោទប្រកាន់រហូតដល់ទៅ ១១បទល្មើស ហើយអាចប្រឈមមុខនឹងពន្ធនាគារសរុបអាចដល់ទៅ ១០០ឆ្នាំឯណោះ៕
ប្រភព៖ CNA
