បារាំង និងអង់គ្លេសព្រមព្រៀងគ្នាដើម្បីបន្ធូរបន្ថយជម្លោះនេសាទ
រដ្ឋាភិបាលក្រុងប៉ារីសរៀបរាប់ថា មេដឹកនាំបារាំង និងអង់គ្លេសព្រមព្រៀងគ្នាព្យាយាមដោះស្រាយជម្លោះដែលកំពុងកើនឡើងរវាងអង់គ្លេស និងបារាំងលើសិទ្ធិនេសាទក្រោយអង់គ្លេសចេញពីសហភាពអឺរ៉ុប (Brexit) ដើម្បីបញ្ចៀសសង្គ្រាមពាណិជ្ជកម្មដែលអាចនឹងធ្វើឱ្យប្លុកទាំងមូលលូកដៃចូល។
លោកប្រធានាធិបតីបារាំង អេម៉ានុយអែល ម៉ាក្រុង (Emmanuel Macron) និងលោកនាយករដ្ឋមន្ត្រីអង់គ្លេស បូរីស ចនសុន (Boris Johnson) ជួបគ្នាកាលពីថ្ងៃអាទិត្យប្រហែល ២៥ នាទីនៃចុងកិច្ចប្រជុំកំពូល G-២០ នៅទីក្រុងរ៉ូម មួយថ្ងៃបន្ទាប់ពីលោកចនសុនត្អូញត្អែរដាក់ប្រធានសហភាពអឺរ៉ុបលោកស្រី Ursula von der Leyen ថាការគំរាមកំហែងរបស់បារាំងដោយសងសឹកជុំវិញជម្លោះនេសាទ គឺជារឿងអយុត្តិធម៌ទាំងស្រុង ។
ខុទ្ទការល័យរបស់លោកម៉ាក្រុងលើកឡើងថា មេដឹកនាំទាំងពីរយល់ព្រមធ្វើការលើវិធានការជាក់ស្តែងដើម្បីដោះស្រាយជម្លោះនៅប៉ុន្មានថ្ងៃខាងមុខនេះ និងរួបរួមគ្នាលើតម្រូវការសម្រាប់ការបន្ថូរបន្ថយជាមួយនឹងសកម្មភាពជាក់ស្តែងដែលនឹងកើតមានឱ្យបានឆាប់តាមដែលអាចធ្វើទៅបាន។ខុទ្ទការល័យ របស់លោកចនសុនមិនធ្វើការអត្ថាធិប្បាយយ៉ាងណាទេជុំវិញរឿងនេះ។
លោកចនសុនសង្កត់ធ្ងន់នៅឯកិច្ចប្រជុំ G-២០ថា ភាគីទាំងអស់ត្រូវតែផ្តោតលើរូបភាពធំនៃការប្រែប្រួលអាកាសធាតុ ខណៈដែលអង់គ្លេសជាម្ចាស់ផ្ទះនៃកិច្ចប្រជុំកំពូលអាកាសធាតុ COP26 ដែលចាប់ផ្ដើមកាលពីថ្ងៃច័ន្ទ។
ទោះបីយ៉ាងនេះក្ដី ទាំងរដ្ឋាភិបាលចក្រភពអង់គ្លេស និងបារាំង ត្រូវបានគេមើលឃើញថា កំពុងបង្កើនវោហាសាស្ត្ររបស់ខ្លួន ហើយបារាំងកាលពីសប្តាហ៍មុនបានចាប់អ្នកនេសាទអង់គ្លេសម្នាក់ ដោយចោទប្រកាន់ថាធ្វើការនេសាទខុសច្បាប់នៅក្នុងដែនទឹករបស់ខ្លួន។
សម្ព័ន្ធភាពរវាងភាគីទាំងពីរល្អក់កករនឹងគ្នារួចទៅហើយពាក់ព័ន្ធនឹងកិច្ចព្រមព្រៀងនាវានុយក្លេអ៊ែរមុជទឹក AUKUS ដែលអូស្រ្តាលីព្រមព្រៀងជាមួយអង់គ្លេស និងសហរដ្ឋអេម៉េរិក ដោយរំលងនិងលុបចោលកិច្ចព្រមព្រៀងរាប់ពាន់លានដុល្លារដែលមានស្រាប់ជាមួយបារាំង។
ប្រទេសបារាំងមានការខឹងសម្បារដែលចក្រភពអង់គ្លេស និងកោះ Jersey និង Guernsey មិនបានចេញអាជ្ញាប័ណ្ណទូកបារាំងមួយចំនួនដើម្បីនេសាទនៅក្នុងដែនទឹករបស់ពួកគេ ចាប់តាំងពី Brexit ចូលជាធរមានទាំងស្រុងនៅដើមឆ្នាំ ២០២១។
ទីក្រុងប៉ារីសសន្យាថា បើមិនមានការអនុម័តអាជ្ញាប័ណ្ណបន្ថែមទៀតទេ ខ្លួននឹងហាមឃាត់ទូករបស់ចក្រភពអង់គ្លេសមិនឱ្យផ្ទុកទិន្នផលនេសាទនៅកំពង់ផែបារាំងចាប់ពីថ្ងៃអង្គារ ហើយថែមទាំងដាក់ការត្រួតពិនិត្យលើផលិតផលនាំចូលទាំងអស់ពីចក្រភពអង់គ្លេសផងដែរ។ ប៉ុន្តែលោកម៉ាក្រុង និយាយប៉ុន្មានម៉ោងមុនពេលកំណត់មកដល់ថា លោកនឹងពន្យាពេលវិធានការដើម្បី ផ្តល់ឱកាសសម្រាប់កិច្ចពិភាក្សាដែលនឹងបន្តនៅថ្ងៃអង្គារ។
អង់គ្លេសទទូចថា ខ្លួនបដិសេធមិនចេញអាជ្ញាប័ណ្ណសម្រាប់តែទូកដែលមិនបានបង្ហាញថាពួកគេនេសាទនៅក្នុងដែនទឹករបស់ចក្រភពអង់គ្លេសមុនពេល Brexit ខណៈពេលដែលបារាំងប្រកែកថា ទីក្រុងឡុងដ៍កំពុងអូសទាញចេញពីដំណើរការនេះដោយចេតនា និងកំណត់គោលដៅលើទូកនេសាទពីប្រទេសបារាំង។
រដ្ឋាភិបាលចក្រភពអង់គ្លេសនិយាយថា កប៉ាល់នេសាទពី EU ស្ទើរតែ ១ ៧០០ ត្រូវបានផ្តល់អាជ្ញាប័ណ្ណនេសាទនៅក្នុងដែនទឹករបស់ចក្រភពអង់គ្លេស ដែលស្មើនឹង ៩៨ ភាគរយនៃពាក្យស្នើសុំរបស់សហភាពអឺរ៉ុបសម្រាប់អាជ្ញាប័ណ្ណនេសាទ ប៉ុន្តែតួលេខនេះត្រូវបានទីក្រុងប៉ារីសជំទាស់។ ចំណុចសំខាន់នៃការខ្វែងគំនិតគ្នាចំពោះបញ្ហានេះ គឺលើចំនួននាវាតិចរបស់បារាំង ដែលត្រូវបានផ្តល់សិទ្ធិចូលទៅកាន់ដែនសមុទ្ររបស់អង់គ្លេស និងកោះ Jersey ។
ភាគីនីមួយៗចោទគ្នាទៅវិញទៅមកថាប្រើជម្លោះនេសាទដើម្បីបញ្ចប់នយោបាយក្នុងស្រុក។ ទីក្រុងឡុងដ៍ចោទលោកម៉ាក្រុងថា បញ្ឆេះជម្លោះដើម្បីផលប្រយោជន៍នយោបាយក្នុងស្រុកមុនការបោះឆ្នោតប្រធានាធិបតីនៅឆ្នាំក្រោយ។ ទន្ទឹមនឹងនោះ ក្រុងប៉ារីសនិយាយថា លោកចនសុនកំពុងកំណត់គោលដៅបារាំងដើម្បីបង្វែរការយកចិត្តទុកដាក់ពីបញ្ហា Brexit។
កាលពីថ្ងៃសុក្រ នាយករដ្ឋមន្ត្រីបារាំងលោក Jean Castex និយាយនៅក្នុងលិខិតដែលបែកធ្លាយមួយផ្ញើជូនលោកស្រី von der Leyen ថា ចក្រភពអង់គ្លេសគួរតែបង្ហាញថា ការចាកចេញពី EU របស់ខ្លួនបណ្ដាលឱ្យមានការខូចខាតយ៉ាងច្រើនជាជាងនៅជាមួយប្លុក។
លិខិតមួយនេះទាញការឆ្លើយតបបែបផ្លែផ្កាវិញពីមន្ត្រីអង់គ្លេស ហើយលោកចនសុនព្រមានថាទីក្រុងឡុងដ៍អាចដំណើរការជម្លោះ Brexit ជាឧបករណ៍ជាលើកដំបូង ដោយលាតត្រដាងពីសហភាពអឺរ៉ុបលើវិធានការពាណិជ្ជកម្មដែលមានសក្តានុពលរបស់ចក្រភពអង់គ្លេស។
លោកម៉ាក្រុងឯណោះវិញ ព្រមានកាលពីថ្ងៃសុក្រថា ភាពជឿជាក់របស់ចក្រភពអង់គ្លេសគឺស្ថិតនៅលើភាពប្រថុយប្រថាន ដោយចោទប្រកាន់ទីក្រុងឡុងដ៍ថា មិនអើពើកិច្ចព្រមព្រៀងពាណិជ្ជកម្ម Brexit ដែលព្រមព្រៀងជាមួយទីក្រុងប្រ៊ុចសែលបន្ទាប់ពីការចរចារជាច្រើនឆ្នាំ។
លោកប្រាប់កាសែត Financial Times ថា៖ «នៅពេលអ្នកចំណាយពេលជាច្រើនឆ្នាំក្នុងការចរចាសន្ធិសញ្ញា ហើយពីរបីខែក្រោយមក អ្នកបែរជាធ្វើផ្ទុយពីអ្វីដែលត្រូវបានសម្រេចលើទិដ្ឋភាពដែលសាកសមនឹងអ្នកតិចបំផុតទៅវិញ នោះវាមិនមែនជាសញ្ញាធំនៃសេចក្ដីគួរឱ្យទុកចិត្តរបស់អ្នកនោះទេ»។
ប្រភព៖ Aljazeera
