ឯកឧត្តម ហេង ណារ៉េត អនុរដ្ឋលេខាធិការក្រសួងបរិស្ថាន ឯកឧត្តម គួច ចំរើន អភិបាលខេត្តព្រះសីហនុ និងមន្ត្រីពាក់ព័ន្ធ ព្រមទាំងបន្តផ្ទាល់តាមប្រព័ន្ធពីចម្ងាយ(Zoom Meting)ទៅកាន់រដ្ឋបាលក្រុង ស្រុកទាំង៥ ទូទាំងខេត្តព្រះសីហនុ កាលពីថ្ងៃទី០៣ ខែវិច្ឆការ ឆ្នំា២០២១ បានជួបប្រជុំគ្នាលើប្រធានបទចំនួន ២ រួមមាន៖

(១) បទបង្ហាញពីក្របខណ្ឌការងារឈានទៅអនុវត្តប្រព័ន្ធថ្មីគ្រប់គ្រងសំរាម សំណល់រឹង ទីប្រជុំជនក្រុងព្រះសីហនុ។

(២)បទបង្ហាញស្តីពីការគ្រប់គ្រងសំរាម សំណល់រឹងឆ្លាតវៃ។

ឯកឧត្តម គួច ចំរើន បានថ្លែងថា ដើម្បីចាត់ចែងដោះស្រាយបញ្ហាការគ្រប់គ្រងសំរាម និងសំណល់រឹងនៅតាមក្រុង ស្រុករបស់ខ្លួនឱ្យកាន់តែមានប្រសិទ្ធភាព ថ្ងៃនេះយើងមានបទបង្ហាញជាច្រើន ដែលជាយុទ្ធសាស្ត្រថ្មីក្នុងការគ្រប់គ្រងសំរាម រួមមតិយោបល់គ្នា ដើម្បីឱ្យការគ្រប់គ្រងសំរាមរបស់យើងបានស្អាត លឿន និងមានចិរភាព។ រយៈពេលកន្លងមក វិបត្តិសំរាមនៅក្រុងព្រះសីហនុ ទោះបីមានក្រុមហ៊ុនដឹកជញ្ជូនសំរាមបានប្រមូលសំរាមដឹកចេញពីក្រុង បន្តទៅចាក់រាយប៉ាយគ្មានសណ្តាប់ធ្នាប់ ការគ្រប់គ្រងគ្មានបច្ចេកទេស សំរាមបានប្រមូលចេញពីក្រុងយកទៅទុកកន្លែងផ្សេងតែប៉ុណ្ណោះ។ យើងមិនបានប្រើប្រាស់បច្ចេកទេស ដើម្បីគ្រប់គ្រងសំរាមឱ្យបានត្រឹមត្រូវ។  ក្រសួងបរិស្ថានបានសង់ទីលានចាក់សំរាមរួចរាល់ហើយប៉ុន្តែគំនរសំរាមនៅក្រៅទីលានគរដូចភ្នំ។

ឯកឧត្តម អភិបាលខេត្ត ស្នើក្រសួងបរិស្ថានជួយធ្វើយ៉ាងណាឱ្យឆាប់បានដំណើរការ ដើម្បីឱ្យសំរាមដែលប្រមូលចេញពីក្រុងយកទៅទុកដាក់ក្នុងទីលានគ្រប់គ្រងបានត្រឹមត្រូវតាមបច្ចេកទេស។

ឯកឧត្តម អភិបាលខេត្តបន្តថា រដ្ឋបាលខេត្តខិតខំផ្សព្វផ្សាយនូវស្លាកសញ្ញាទាក់ទងនៃកាហាមបោះចោលសំរាម រួមទាំងចចារតម្លៃនៃការផាកពិន័យចាប់ពី ២ម៉ឺនរៀល ដល់ ៤០ម៉ឺនរៀល ប្រសិនបើមានការបំពានបោះចោលសំរាមមិនត្រឹមត្រូវនៅតាមបណ្តោយឆ្នេរសមុទ្រ តាមដងផ្លូវសាធារណៈ។

ឯកឧត្តម ហេង ណារ៉េត អនុរដ្ឋលេខាធិការក្រសួងបរិស្ថាន មានប្រសាសន៍ថា គោលនយោបាយ     បរិស្ថានស្អាត សុខភាពល្អ វាមានសារៈសំខាន់សម្រាប់សុខុមាលភាពប្រជាពលរដ្ឋ។    ដើម្បីកែទម្រង់ប្រព័ន្ធគ្រប់គ្រងសំរាមក្នុងខេត្តព្រះសីហនុ និងលើកកម្ពស់ប្រពន្ឋគ្រប់គ្រងសំរាម និងតម្លៃឱ្យមានប្រសិទ្ធិភាពតាមប្រព័ន្ធថ្មី ទី១.ឆន្ទះ ២.ការបេជ្ញាចិត្ត ៣.ធ្វើជាម្ចាស់ ដើម្បីធានាសមត្ថភាព និងសមិទ្ធិផលក្នុងការគ្រប់គ្រងសំរាម និងសំណល់រឹង ដោយមានការចូលរួមពីក្រុមហ៊ុន អាជ្ញាធរ និងប្រជាពលរដ្ឋ ទើបក្រុងរបស់យើងមានភាពស្អាត និងមានពណ៌បៃតង។  ក្រុមហ៊ុនត្រូវមានតួនាទីក្នុងការប្រមូលសំរាមចេញពីក្រុង ស្រុក។  ទន្ទឹមនោះប្រជាពលរដ្ឋជាអ្នកបង្កើតសំរាម ត្រូវធ្វើការញែកសំរាមឱ្យបានត្រឹមត្រូវ។ យើងក៏ទាមទារការអប់រំ ផ្សព្វផ្សាយឱ្យប្រជាពលរដ្ឋមានការយល់ដឹងកាន់តែស៊ីជម្រៅបន្ថែមទៀត ក្នុងការគ្រប់គ្រងបញ្ចេញសំរាម៕សាវ៉ុន