វ៉ាស៊ីនតោន៖ កិច្ចប្រជុំតាមប្រព័ន្ធវីដេអូរវាងប្រធានាធិបតីអាមេរិក លោក ចូ បៃដិន និងសមភាគីចិនរបស់លោក គឺលោក ស៊ី ជិនពីង ទំនងជាត្រូវធ្វើឡើងក្នុងពេលឆាប់ៗនេះ យ៉ាងយូរនៅសប្ដាហ៍ក្រោយ។ នេះបើតាមប្រភពពីមន្ត្រីអាមេរិកម្នាក់ដែលដឹងពីការរៀបចំកិច្ចប្រជុំរវាងមេដឹកនាំកំពូលប្រទេសទាំងពីរ។

ស្របពេលជាមួយគ្នានោះដែរ ក្រុមមន្ត្រីអាមេរិកជឿជាក់ថា កិច្ចចរចាជាមួយលោក ស៊ី ជិនពីង គឺជាមធ្យោបាយមួយដ៏ល្អក្នុងការបង្ការកុំឱ្យភាពតានតឹងរវាងប្រទេសទាំងពីរ ប្រែក្លាយជាទៅជាជម្លោះ។ តែយ៉ាងណាមិញ ខាងសេតវិមាន និងស្ថានទូតចិនប្រចាំទីក្រុងវ៉ាស៊ីនតោនមិនបានទទួលស្គាល់ថាតើកិច្ចប្រជុំកំពូលនេះ នឹងប្រព្រឹត្តទៅនៅសប្ដាហ៍ក្រោយមែន ឬអត់នោះទេ។

គួរបញ្ជាក់ផងដែរថា ភាគីទាំងពីរ (អាមេរិក-ចិន) ធ្លាប់បានបញ្ជាក់ថា ពួកគេបានឈានដល់កិច្ចព្រមព្រៀងមួយជាគោលការណ៍ ក្នុងការរៀបចំជំនួបរវាងលោក បៃដិន និងលោក ស៊ី នៅមុនដំណាចឆ្នាំ២០២១នេះ បន្ទាប់ពីកិច្ចពិភាក្សារវាងទីប្រឹក្សាសន្តិសុខជាតិអាមេរិក លោក ចេក សឹលលីវែន និងមន្ត្រីការទូតកំពូលចិន លោក យ៉ាង ជីឈី នៅទីក្រុង ហ៊្សូរីច ប្រទេសស្វីស កាលពីខែតុលាកន្លងទៅ៕ ប្រភព៖ CNA