ខេត្តព្រៃវែង៖ សង្គមស៊ីវិលកម្ពុជា-ចិនបានជួយកែលម្អបណ្ណាល័យតាមសំណើរបស់គណៈគ្រប់គ្រងសាលាបឋមសិក្សាព្រហារ។   ដោយមើលឃើញពីតម្រូវការនៃការអានរបស់កុមារ  ជាអាទិភាព  ថ្នាក់ដឹកនាំសាលា  លោកគ្រូ អ្នកគ្រូ  បានស្នើសុំសប្បុរសជនចូលរួមជួយបណ្ណាល័យដែលកំពុងមានកង្វះខាតច្រើនសម្រាប់បំពេញតម្រូវការរបស់កុមារកាន់តែច្រើនឡើងដែលកំពុងបង្កើនចំណេះរបស់ខ្លួនបន្ថែមតាមរយៈការអាន។ 

លោក បឿន ធាក នាយកសាលាបឋមសិក្សាព្រហារ បានស្នើ លោកបណ្ឌិត ជា មុនីឬទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន កាលពីថ្ងៃទី១៣ ខែវិច្ឆិកា ឆ្នាំ២០២១នេះ ក្នុងពេលដែលលោកបណ្ឌិតបាន​អញ្ជើញចុះ​មើលដោយផ្ទាល់ដល់ទីតាំងបណ្ណាល័យរបស់សាលាបឋមសិក្សាព្រហារ   ស្ថិតនៅក្នុងភូមិទ័ពស្តេច ឃុំច្រេស  ស្រុកមេសាង ខេត្តព្រៃវែង។ នៅចំពោះមុខលោកនាយក លោកគ្រូ អ្នកគ្រូ លោកបណ្ឌិតបានសម្រេចឯកភាពចូលរួមជួយបណ្ណាល័យសាលានេះ បន្ទាប់ពីបានពិនិត្យ និងមើលឃើញថាបណ្ណាល័យនេះនៅមានការខ្វះខាតច្រើន។ លោកបណ្ឌិត បានស្នើសុំគម្រោង សកម្មភាពសប្បុរសធម៌ចិនដោយមានការចូលរួមមូលនិធិសប្បុរសធម៌សុខភាពសារធារណប៉េកាំង មជ្ឈមណ្ឌលប្រទេសចិនសម្រាប់ការអភិវឌ្ឍ និងទំនាក់ទំងអន្តរជាតិនៃការិយាល័យការបរទេស ចូលរួមដោយ គ្រឹះស្ថានទស្សនាវដ្ដីចិន លេីការកែលម្អបណ្ណាល័យសាលាបឋមសិក្សានេះដោយប្រសិទ្ធនាមថា  បណ្ណាល័យ មេគង្គ-ឡានឆាង។

គួរបញ្ជាក់ថា បច្ចុប្បន្ននេះសាលាឋមសិក្សាព្រហារ ស្ថិតនៅក្នុងភូមិទ័ពស្តេច  ឃុំច្រេស ស្រុកមេសាង ខេត្តព្រៃវែង មានបុគ្គលិកចំនួន ១៤នាក់ ស្រី១នាក់  មានសិស្សានុសិស្សចំនួន៤៦៤នាក់ សិស្សស្រីចំនួន២១៥នាក់៕