ស៊ី ជីនភីង និងចូ បៃដិន នឹងជួបគ្នាតាមប្រព័ន្ធវីដេអូ តែមិនសូវជាសង្ឃឹមថាផ្ដល់លទ្ធផលផ្លែផ្កានោះទេ
ប្រធានាធិបតីចិន លោក ស៊ី ជីនភីង និង ប្រធានាធិបតីសហរដ្ឋអាមេរិក លោក ចូ បៃដិន នឹងពិភាក្សាគ្នាទ្វេភាគីតាមប្រព័ន្ធវីដេអូជាលើកដំបូងនៅថ្ងៃអង្គារនេះ បើគិតតាមម៉ោងនៅប្រទេសចិន ឬ នៅល្ងាចថ្ងៃច័ន្ទ បើគិតតាមម៉ោងសហរដ្ឋអាមេរិក។
តាមពិតទៅប្រធានាធិបតីនៃមហាអំណាចទាំងពីរបានជួបពិភាក្សាគ្នាតាមប្រព័ន្ធទូរស័ព្ទ ២លើកមកហើយ ដោយលើកទី១ នៅខែកុម្ភៈ និងលើកទី២ នៅខែកញ្ញាឆ្នាំនេះ។ ជាមួយគ្នានេះដែរ គេក៏សង្កេតឃើញមានវត្តមានមេដឹកនាំទាំងពីរនៅកញ្ចក់ទូរទស្សន៍កិច្ចប្រជុំពហុភាគីនានាដែរដូចជាក្នុងកិច្ចប្រជុំនៃអង្គការកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ជាដើម។
លោក ស៊ី ធ្លាប់តែមានកាលវិភាគទៅទស្សនកិច្ចនៅក្រៅប្រទេសញឹកញាប់ កាលពីមុនការរាតត្បាតនៃជំងឺកូវីដ-១៩ តែបន្ទាប់ពីកូវីដផ្ទុះមក លោកខានចេញពីប្រទេសចិន ជាង ២ឆ្នាំមកហើយ។ ចំណែកឯលោក ចូ បៃដិន វិញ តាំងពីឡើងកាន់តំណែងជាប្រធានាធិបតីមក លោកបានហោះហើរទៅកាន់ប្រទេសនៅទ្វីបអឺរ៉ុបហាក់បីដូចជាញឹកញាប់ ក្នុងគោលបំណងរឹតចំណងស្មារតីសម្ព័ន្ធមិត្តរបស់សហរដ្ឋអាមេរិក។
ដើមឡើយថ្នាក់ដឹកនាំត្រូវបានគេរំពឹងទុកថា អាចនឹងជួបគ្នាដោយផ្ទាល់ក្នុងកិច្ចប្រជុំក្រៅឆាកនៃកិច្ចប្រជុំកំពូលនៃប្រទេសសេដ្ឋកិច្ចជឿនលឿនទាំង ២០ ដែលហៅកាត់ថា G-20 ធ្វើឡើងនៅទីក្រុងរ៉ូមប្រទេសអ៊ីតាលី ឬ កិច្ចប្រជុំបម្រែបម្រួលអាកាសធាតុ COP26 ដែលធ្វើឡើងនៅស្កុតឡែនកាលពីដើមខែវិច្ឆិកានេះជាដើម។ យ៉ាងណាមិញ សម្រេចសម្រួលចុងក្រោយ មេដឹកនាំទាំងពីរបានត្រឹមតែជួបគ្នាតាមប្រព័ន្ធវីដេអូដដែល។
កិច្ចប្រជុំរវាងមេដឹកនាំទាំងពីរ ត្រូវបានប្រកាសជាផ្លូវការ ក្រោយពេលដែលរដ្ឋមន្ត្រីការបរទេសអាមេរិក និងចិនបានទូរស័ព្ទជួបគ្នា កាលពីថ្ងៃសុក្រសប្ដាហ៍មុន។
នៅពេលនោះដែរ ទាំងខាងអាមេរិក និងខាងចិនបានឱ្យតម្លៃខ្ពស់ចំពោះកិច្ចប្រជុំរវាងលោក បៃដិន និងលោក ស៊ី។
នៅក្នុងសេចក្ដីប្រកាសព័ត៌មានរបស់ក្រសួងការបរទេសអាមេរិកបានចុះផ្សាយថា៖ «កិច្ចប្រជុំនេះ [ប្រជុំរវាងលោក បៃដិន និងលោក ស៊ី] ជាឱកាសមួយសម្រាប់មេដឹកនាំទាំងពីរពិភាក្សាអំពីវិធីសាស្ត្រក្នុងការគ្រប់គ្រងការប្រកួតប្រជែងរវាងអាមេរិក និងចិន ខណៈពេលដែលស្វែងរកវិស័យណាមួយ ដែលប្រទេសទាំងមានផលប្រយោជន៍រួម»។
ចំណែកឯខាងចិនវិញយល់ថា ពិភពលោកនឹងតាមដានទៅលើកិច្ចប្រជុំនេះ ហើយជំនួបរវាងថ្នាក់ដឹកនាំទាំងពីរមិនត្រឹមតែផ្ដល់ប្រយោជន៍ទៅកាន់អាមេរិក និងចិននោះទេ តែថែមទាំងជាវិភាគទានមួយសម្រាប់ទំនាក់ទំនងអន្តរជាតិទៀតផង។
យោងតាមសារព័ត៌មាននៃភាគីទាំងសងខាងបានកត់សម្គាល់ថា ប្រធានបទដែលប្រធានាធិបតីទាំងពីរនឹងលើកយកមកពិភាក្សាមានចាប់តាំងពីបញ្ហាពាណិជ្ជកម្មរវាងប្រទេសទាំងពីរ រហូតដល់បញ្ហាភូមិសាស្ត្រនយោបាយដូចជា រឿងសមុទ្រចិនខាងត្បូង។ បញ្ហាតៃវ៉ាន់ក៏នឹងលើកមកនិយាយផងដែរ។
ទោះបីជាក្នុងសេចក្ដីថ្លែងការណ៍របស់ក្រសួងការបរទេសនៃប្រទេសទាំងពីរនិយាយពាក្យល្អៗ ប្រកបជាមួយសុទិដ្ឋិនិយម ក៏មន្ត្រីរដ្ឋការ និងអ្នកជំនាញមកពីប្រទេសទាំងពីរមិនសូវសង្ឃឹមថា កិច្ចប្រជុំនេះនឹងផ្ដល់ជាផ្លែផ្កានោះទេ។
មន្ត្រីជាន់ខ្ពស់មួយរូបនៃរដ្ឋការលោក ចូ បៃដិន បានលើកឡើងក្នុងលក្ខខណ្ឌអនាមិកថា៖ «កិច្ចប្រជុំនេះមិនមែនប្រជុំ ដើម្បីសម្រេចលទ្ធផលអ្វីឱ្យពិតប្រាកដនោះទេ»។ នេះបើតាមការចុះផ្សាយរបស់សារព័ត៌មាន CNBC របស់អាមេរិក។
«ប្រជុំនេះគឺជាការកំណត់លក្ខខណ្ឌ ក្នុងការប្រកួតប្រជែង [រវាងចិន និងអាមេរិក] ប្រកបដោយប្រសិទ្ធភាព ដែលយើង [សំដៅលើអាមេរិក] អាចមានគោលជំហរក្នុងការការពារគុណតម្លៃ និងផលប្រយោជន៍របស់យើង និងសម្ព័ន្ធមិត្តរបស់យើង ក៏ដូចជាដៃគូនានា»។ នេះបើតាមការបន្ថែមរបស់មន្ត្រីរូបនោះ ហើយលោកក៏បន្តថា ប្រសិនបើលក្ខខណ្ឌទាំងនេះអាចកំណត់បាន នោះអាមេរិក និងចិនអាចរក្សាស្ថានភាពបច្ចុប្បន្ន ដែលមានការប្រកួតប្រជែងនឹងគ្នា។
ចំណែកឯសារព័ត៌មាន Global Times ដែលជាសារព័ត៌មានជាភាសាអង់គ្លេស ក្រោមការគ្រប់គ្រងរបស់គណបក្សកុម្មុយនិស្តចិន បានចុះផ្សាយថា បញ្ហាតៃវ៉ាន់នឹងជារបៀបវារៈកំពូលនៃជំនួបរវាងលោក ស៊ី និងលោក បៃដិន។
ជាមួយគ្នានេះដែរ អ្នកវិភាគនៅក្នុងសារព័ត៌មាននេះក៏យល់ដូចខាងអាមេរិកដែរថា កិច្ចប្រជុំនេះនឹងមិនផ្ដល់ជាលទ្ធផលដុំកំភួន ឬ ក៏មានកុងសង់ស៊ីសត្រង់ចំណុចណាមួយទេ តែជំនួបនេះជាការបើកផ្លូវសម្រាប់កិច្ចសហប្រតិបត្តិការរវាងភាគីទាំងពីរនាពេលអនាគត៕
ប្រភព៖ SCMP
