មន្ត្រីជាន់ខ្ពស់មកពីថៃ ចិន និងជប៉ុន ចូលជួប មីន អ៊ុងឡាំង ផ្សេងៗពីគ្នា
មន្ត្រីជាន់ខ្ពស់មកពីប្រទេសថៃ ចិន និងជប៉ុន បានធ្វើដំណើរមកកាន់រដ្ឋធានីណៃពិដោ ជាបន្តបន្ទាប់គ្នា ដើម្បីមកជួបលោក មីន អ៊ុងឡាំង ប្រមុខយោធានៃប្រទេសមីយ៉ាន់ម៉ា កាលពីពេលថ្មីៗនេះ។
មន្រ្តីរដ្ឋាភិបាលតំណាងប្រទេសទាំង ៣ មកកាន់មីយ៉ាន់ម៉ា ក្រោយពេលដែល លោក ប៊ីល រីឆាដសុន (Bill Richardson) អតីតឯកអគ្គរដ្ឋទូតសហរដ្ឋអាមេរិក ប្រចាំអង្គការសហប្រជាជាតិ ចូលជួបជាមួយ មេដឹកនាំរដ្ឋាភិបាលយោធាមីយ៉ាន់ម៉ា ហើយជាលទ្ធផល អាជ្ញាធរយោធាមីយ៉ាន់ម៉ាបានដោះលែងអ្នកកាសែតអាមេរិកចេញពីពន្ធនាគារ ក្រោយឃុំខ្លួនអស់រយៈពេលជាង ៦ខែ។
មន្ត្រីមកពីប្រទេសទាំង ៣នោះរួមមាន លោក ដុន ប្រាមុដវីណៃ (Don Pramudwinai) រដ្ឋមន្ត្រីការបរទេសថៃ លោក ស៊ុន គូស៊ាំង (Sun Guaxiang) ប្រេសិតពិសេសរបស់ចិនទទួលបន្ទុកកិច្ចការអាស៊ី និងលោក យ៉ូហេ សាសាកាវ៉ា (Yohei Sasakawa) ប្រធានមូលនិធិនីផុន និងជាប្រេសិតរបស់ជប៉ុនទទួលបន្ទុកការផ្សះផ្សាជាតិនៅមីយ៉ាន់ម៉ា។
លោក ប្រាមុដវីណៃ បានទៅដល់មីយ៉ាន់ម៉ាកាលពីថ្ងៃអាទិត្យ ហើយចូលជួបជាមួយលោក មីន អ៊ុងឡាំង ភ្លាមៗតែម្ដង។
មិនមានសេចក្ដីថ្លែងការណ៍ផ្លូវការណាមួយ ចុះផ្សាយអំពីដំណើរទស្សនកិច្ចនេះទេ។ បើតាមការចុះផ្សាយរបស់សារព័ត៌មាន Irrawaddy ក្នុងជំនួបរវាងរដ្ឋមន្ត្រីថៃ និងប្រមុខយោធាមីយ៉ាន់ម៉ា មិនបានអមដំណើរដោយឯកអគ្គរាជទូតថៃប្រចាំមីយ៉ាន់ម៉ានោះទេ។ប្រភពដដែលបន្តថា កិច្ចពិភាក្សាបែបនេះ អាចពាក់ព័ន្ធនឹងរឿងរសើបៗមួយចំនួនដូចជា បញ្ហាសកម្មជនប្រឆាំងរបបយោធា ដែលមានមូលដ្ឋាននៅក្នុងដីថៃ តាមបណ្ដោយព្រំដែនប្រទេសទាំងពីរ។
ចំណែកឯតំណាងរបស់ចិនវិញ បានមកដល់មីយ៉ាន់ម៉ា កាលពីថ្ងៃសៅរ៍ ហើយចូលជួប លោក មីន អ៊ុងឡាំង នៅថ្ងៃច័ន្ទ។
យោងតាមការចុះផ្សាយរបស់សារព័ត៌មានជប៉ុននីកេ (Nikkei) លោក ស៊ុន និយាយជាមួយយោធាមីយ៉ាន់ម៉ា ដើម្បីសម្រួលបញ្ហានានាពាក់ព័ន្ធកិច្ចប្រជុំកំពូលអាស៊ាន-ចិន ដែលនឹងធ្វើឡើងនៅថ្ងៃទី២២ ខែវិច្ឆិកា ខាងមុខនេះ ជាកិច្ចប្រជុំធ្វើឡើង ដើម្បីអបអរខួបលើកទី៣០ឆ្នាំ នៃភាពជាដៃគូរវាងអាស៊ាន និងចិន។ កិច្ចប្រជុំកំពូលពិសេសនេះនឹងចូលរួមដោយលោក ស៊ី ជីនភីង ប្រធានាធិបតីចិនផ្ទាល់តែម្ដង។
យ៉ាងណាមិញ បញ្ហាក្នុងកិច្ចប្រជុំនេះគឺ ពាក់ព័ន្ធនឹងសមាសភាពអ្នកតំណាងមកពីប្រទេសមីយ៉ាន់ម៉ា។ កាលពីខែតុលាកន្លងទៅ អាស៊ានមិនអញ្ជើញលោក មីន អ៊ុងឡាំង ចូលប្រជុំនោះទេ ដោយស្ថាប័នតំបន់នេះបានអញ្ជើញថ្នាក់ដឹកនាំមិនមែននយោបាយមកជំនួសវិញ។ រដ្ឋាភិបាលយោធាមីយ៉ាន់ម៉ាបានប្រតិកម្មនឹងអាស៊ានថា អាស៊ានបានល្មើសនឹងធម្មនុញ្ញរបស់ខ្លួន។
បើតាមប្រភពការទូត ដែលចុះផ្សាយដោយសារព័ត៌មាននីកេ ចិនយល់ស្របនឹងគំនិតរបស់អាស៊ានក្នុងការអញ្ជើញថ្នាក់ដឹកនាំមិនមែននយោបាយ។ យ៉ាងណាមិញ បញ្ហាដែលស្មុគស្មាញបន្ថែមទៀតនោះគឺ មីយ៉ាន់ម៉ានៅក្នុងឆ្នាំនេះ ជាប្រទេសសម្របសម្រួលទំនាក់ទំនងរវាងអាស៊ាន និងចិន។ ដូច្នេះហើយ ជំនួបរវាងលោក ស៊ុន និងថ្នាក់ដឹកនាំយោធាមីយ៉ាន់ម៉ាគឺអាចនឹងនិយាយស្វែងរកចំណុចរួមរវាងចិន និងមីយ៉ាន់ម៉ាលើរឿងនេះ។
ចំណែកឯលោក សាសាកាវ៉ា ដែលជាប្រេសិតជប៉ុនទទួលបន្ទុកកិច្ចការមីយ៉ាន់ម៉ា បានមកជួបលោក មីន អ៊ុងឡាំង ក្នុងកិច្ចការដោយឡែកទៀត។
លោកបានជួបជាមួយប្រមុខយោធាមីយ៉ាន់ម៉ា កាលពីថ្ងៃសៅរ៍កន្លងទៅ ដោយពិភាក្សាអំពីការផ្ដល់ជំនួយមនុស្សធម៌របស់ជប៉ុន ទៅកាន់ប្រទេសអាស៊ីអាគ្នេយ៍មួយនេះ។ នេះបើតាមការចុះផ្សាយរបស់នីកេ។
បុរសជនជាតិជប៉ុនរូបនេះធ្លាប់ជាអ្នកសម្របសម្រួលរវាងកងទ័ពអារ៉ាខាន់ (Arakhan Army) ដែលជាទាហានមួយក្រុមនៃជនជាតិភាគតិចរ៉ូហ៊ីងយ៉ា មានមូលដ្ឋាននៅរដ្ឋរ៉ាក់ខាញ នឹងរដ្ឋាភិបាលមជ្ឈិមរបស់មីយ៉ាន់ម៉ាកាលពីពេលកន្លងទៅ។ លោក សាសាកាវ៉ា នេះជាអ្នកជួយចរចាឱ្យកងទ័ពអារ៉ាខាន់ដោះលែងចំណាប់ខ្មាំងរបស់គណបក្សសម្ព័ន្ធជាតិដើម្បីប្រជាធិបតេយ្យរបស់អ្នកស្រី អ៊ុងសាន ស៊ូជី និងជួយឱ្យបទឈប់បាញ់រវាងកងទ័ពនេះ និងកងទ័ពជាតិមីយ៉ាន់ម៉ាកាលពីឆ្នាំ២០២០។
លោក Richard Horsey ទីប្រឹក្សាជាន់ខ្ពស់នៃអង្គការសិក្សាអំពីវិបត្តិអន្តរជាតិ International Crisis បានយល់ឃើញថា ជំនួបរវាងប្រតិភូមកពីប្រទេសទាំង ៣ នេះអាចនឹងមិនពាក់ព័ន្ធគ្នានោះទេ ដោយសារតែគោលបំណងនៃជំនួបមានភាពខុសគ្នា។
«ថៃមានបញ្ហាប្រឈមទ្វេភាគីជាមួយមីយ៉ាន់ម៉ាយ៉ាងច្រើន ខណៈពេលដែលចិន កំពុងគិតគូរថាគួរអញ្ជើញលោក មីន អ៊ុងឡាំង ចូលប្រជុំអាស៊ាន-ចិន ឬ យ៉ាងណា ហើយចំណែកឯការមកដល់របស់លោក សាសាកាវ៉ា ជារឿងដាច់ដោយឡែកផ្សេងទៀត»។ នេះបើតាមការលើកឡើងរបស់លោក Horsey ប្រាប់ទៅកាន់សារព័ត៌មាននីកេ។
លោកបានបន្ថែមថា ជំនួបទាំងបី មិនមែនមានបំណងក្នុងការជួយដោះស្រាយរឿងក្នុងស្រុកមីយ៉ាន់ម៉ា ក្រោយពីមានរដ្ឋប្រហារនោះទេ ប៉ុន្តែផ្ទុយទៅវិញ ប្រទេសទាំងបីសុទ្ធតែចង់ដោះស្រាយបញ្ហារបស់គេ ជាមួយមីយ៉ាន់ម៉ារៀងៗខ្លួន៕
ប្រភព៖ Nikkei Asia
