ប៉ូលីសអូទ្រីស ចុះត្រួតពិនិត្យមិនបានប្រាប់មុនលើអ្នកមិនទាន់ទទួលបានវ៉ាក់សាំងបង្ការ ដើម្បីដាក់វិធានបិទខ្ទប់
ប្រទេសអូទ្រីស បានដាក់វិធានបិទខ្ទប់ថ្មីលើមនុស្សប្រហែល ២ លាននាក់ ដែលមិនបានចាក់វ៉ាក់សាំង ដោយបុគ្គលម្នាក់ៗប្រឈមនឹងការផាកពិន័យ ប្រសិនបើពួកគេមិនគោរពតាមច្បាប់។ នេះបើតាមឱ្យដឹងពីសារព័ត៌មាន CNBC។
អ្នកដែលមិនបានទទួលវ៉ាក់សាំងពេញលេញ ត្រូវបានដាក់ក្រោមការបិទខ្ទប់ ចាប់តាំងពីថ្ងៃ ច័ន្ទ ដោយប៉ូលីសសហព័ន្ធ និងបានបញ្ឈប់មនុស្សនៅកន្លែងសាធារណៈ ដើម្បីពិនិត្យមើលស្ថានភាពនៃការចាក់វ៉ាក់សាំងរបស់ពួកគេ។
អ្នកដែលមិនបានទទួលថ្នាំបង្ការ ដែលបំពានច្បាប់បិទខ្ទប់ ត្រូវប្រឈមនឹងការផាកពិន័យរហូតដល់ ៥៦៧ ដុល្លារ ហើយអ្នកដែលបដិសេធមិនគោរពតាមការត្រួតពិនិត្យស្ថានភាពនៃការចាក់ថ្នាំបង្ការ អាចនឹងត្រូវពិន័យជាប្រាក់ ១,៦៤០ ដុល្លារ ។
ការរឹតបន្តឹងថ្មីអនុវត្ត ចំពោះមនុស្សគ្រប់រូបដែលមានអាយុលើសពី ១២ ឆ្នាំ ដែលមិនទាន់បានចាក់វ៉ាក់សាំងចំនួនពីរលើក។ អ្នកដែលបានជាសះស្បើយពីវីរុសថ្មីៗនេះ ត្រូវបានលើកលែងពីការរឹតបន្តឹងនេះ។
នៅចុងសប្តាហ៍នេះ ករណីថ្មីនៃមេរោគនៅក្នុងប្រទេសអូទ្រីស បានឈានដល់កម្រិតខ្ពស់បំផុតដល់ទៅ ១៣,១៥២ ករណីក្នុងមួយថ្ងៃ។ នេះបើយោងតាមទិន្នន័យពីសាកលវិទ្យាល័យ Johns Hopkins ។
ប្រហែល ៦៥% នៃចំនួនប្រជាជនរបស់ប្រទេសអូទ្រីស ទទួលបានចាក់វ៉ាក់សាំងយ៉ាងពេញលេញ ដែលផ្តល់ឱ្យប្រទេសនេះនូវអត្រានៃការចាក់វ៉ាក់សាំងទាបបំផុតទីពីរនៅអឺរ៉ុបខាងលិច បន្ទាប់ពីប្រទេស Liechtenstein ។
ប្រភព៖ CNBC
