អង្គការពាណិជ្ជកម្មពិភពលោក ពន្យារពេលកិច្ចប្រជុំធំ បន្ទាប់ពីការផ្ទុះឡើងវ៉ារ៉្យង់ថ្មី
អង្គការពាណិជ្ជកម្មពិភពលោក (WTO) បានពន្យារពេលកិច្ចប្រជុំថ្នាក់រដ្ឋមន្ត្រីលើកដំបូងក្នុងរយៈពេល ៤ ឆ្នាំ ដោយសារមានការរីករាលដាលនូវវ៉ារ៉្យង់អូមីក្រុន។ នេះបើតាមឱ្យដឹងពីសារព័ត៌មាន Reuters។
រដ្ឋមន្ត្រីមកពីសមាជិក អង្គការ WTO គ្រោងនឹងជួបប្រជុំគ្នានៅសប្តាហ៍ក្រោយ សម្រាប់កិច្ចប្រជុំ ដែលត្រូវបានគេមើលឃើញយ៉ាងទូលំទូលាយថា ជាការសាកល្បងនៃភាពពាក់ព័ន្ធរបស់ WTO ។ អង្គការ WTO បាននិយាយថា សមាជិករបស់ខ្លួន បានយល់ព្រមកាលពីល្ងាចថ្ងៃសុក្រ ដើម្បីពន្យារពេលសន្និសីទថ្នាក់រដ្ឋមន្ត្រី បន្ទាប់ពីការផ្ទុះឡើងនៃវ៉ារ៉្យង់ថ្មី ដែលបណ្ដាលឱ្យមានការបន្តឹងការធ្វើដំណើរ ដែលអាចនឹងរារាំងរដ្ឋមន្ត្រីជាច្រើនពីការទៅដល់ទីក្រុងហ្សឺណែវ។
យ៉ាងណាមិញ ពុំទាន់មានការបញ្ជាក់ពីកាលបរិច្ឆេទថ្មី សម្រាប់ការប្រជុំនេះនៅឡើយទេ។
អង្គការសុខភាពពិភពលោក បានចាត់ថ្នាក់ប្រភេទវ៉ារ៉្យង់ B.1.1.529 (ឬ វ៉ារ៉្យង់អូមីក្រុន) ដែលបានរកឃើញនៅអាហ្រ្វិកខាងត្បូងថាជា «រ្យ៉ង់នៃការព្រួយបារម្ភ» ដោយលើកឡើងថាវ៉ារ៉្យង់នេះ អាចរីករាលដាលលឿនជាងវ៉ារ៉្យង់ផ្សេងៗកន្លងមក។ អ្នកវិទ្យាសាស្ត្រ ក៏កំពុងស្វែងរកផងដែរថា តើវ៉ារ៉្យង់ប្រភេទនេះធន់នឹង វ៉ាក់សាំងដែរឬទេ។
ប្រទេសស្វីស ដែលជាម្ចាស់ផ្ទះរបស់អង្គការ WTO កាលពីថ្ងៃសុក្រ បានហាមឃាត់ការហោះហើរត្រង់ពីអាហ្វ្រិកខាងត្បូង និងតំបន់ជុំវិញ ហើយបានដាក់លក្ខខណ្ឌធ្វើតេស្ត និងដាក់ឱ្យនៅដាច់ពីគេក្នុងការធ្វើដំណើរពីប្រទេសផ្សេងទៀត រួមទាំងបែលហ្ស៊ិក ហុងកុង និងអ៊ីស្រាអែល។
ស្ថាប័នពាណិជ្ជកម្ម ដែលមានមូលដ្ឋាននៅទីក្រុងហ្សឺណែវ បានរៀបចំផែនការប្រជុំ ដោយផ្ទាល់ ប៉ុន្តែការរឹតបន្តឹងថ្មីមានន័យថា គណៈប្រតិភូនៃអ្នកលេងធំៗ ដូចជាអាហ្វ្រិកខាងត្បូង និងគណៈកម្មការអឺរ៉ុប ដែលមានមូលដ្ឋាននៅទីក្រុងប្រ៊ុចសែល អាចនឹងចូលរួមប្រជុំតាមប្រព័ន្ធអនឡាញ។
ប្រភព៖ Reuters
