កំពង់ឆ្នាំង៖ ថ្ងៃទី០៩ ខែធ្នូ ឆ្នាំ២០២១ ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជា អធិបតី សម្ពោធដាក់ឲ្យប្រើប្រាស់ជាផ្លូវការ អណ្ដូងស្នប់ចំនួន ៩៦៤អណ្ដូង និងស្រះទឹកសហគមន៍ចំនួន ៥៤ស្រះ ក្នុងក្របខណ្ឌគម្រោងផ្គត់ផ្គង់ទឹកជនបទ ជំហាន ២ ក្រោមហិរញ្ញប្បទានឥតសំណង របស់រដ្ឋាភិបាលនៃសាធារណរដ្ឋប្រជាមានិតចិន។

ពិធីនេះ មានការអញ្ជើញចូលរួមពីឯកឧត្ដម វូ គូឈន ទីប្រឹក្សាសេដ្ឋកិច្ច និងពាណិជ្ជកម្ម របស់ស្ថានទូតនៃសាធារណរដ្ឋប្រជាមាននិតចិន ប្រចាំកម្ពុជា និងបានប្រព្រឹត្តទៅនៅភូមិអណ្ដូងរវៀង ឃុំអញ្ចាញរូង ស្រុកបរិបូរណ៍ ខេត្តកំពង់ឆ្នាំង ជានិមិត្តរូបតំណាងឲ្យខេត្ត គោលដៅទាំង ១០ នៃគម្រោង។

ដោយឡែកសមិទ្ធផល ដែលស្ថិតនៅក្នុងខេត្តគោលដៅទាំង ១០ នៃគម្រោងរួមមាន ៖ ខេត្តកំពង់ឆ្នាំងទទួលបានអណ្ដូងចំនួន ៨០ ស្រះចំនួន ៥ , ស្វាយរៀង អណ្តូងចំនួន ១០០ ស្រះចំនួន ៤ , ព្រៃវែង អណ្តូងចំនួន១០០ ស្រះចំនួន ៤ ,កំពត អណ្តូងចំនួន ១០៤ ស្រះចំនួន ៤ , កំពង់ស្ពឺ អណ្តូងចំនួន ៨០ ស្រះ ចំនួន ៥ , ពោធិ៍សាត់ អណ្តូងចំនួន ១០០ ស្រះ ចំនួន ៧ ,បន្ទាយមានជ័យ អណ្តូងចំនួន ១០០ ស្រះ ចំនួន ៧ , កំពង់ចាម អណ្តូងចំនួន ១០០ ស្រះ ចំនួន ៤ , សៀមរាប អណ្តូងចំនួន ១០០ ស្រះ ចំនួន ៧ , និងខេត្តបាត់ដំបង អណ្តូងចំនួន ១០០ និងស្រះ ចំនួន ៧៕ ដោយ/ វ៉េង លឹមួត