ក្រុមអ្នកស្រាវជ្រាវហុងកុង៖ វ៉ាក់សាំង Sinovac ពីរដូស មិនទាន់គ្រប់គ្រាន់ប្រឆាំងនឹងអូមីក្រុងទេ
អ្នកស្រាវជ្រាវនៅទីក្រុងហុងកុង បានឱ្យដឹងតាមរយៈសារព័ត៌មាន The Financial Times ថា វ៉ាក់សាំង Sinovac ផលិតនៅប្រទេសចិនទាំង ២ ដូស ដែលបានចែកចាយពាសពេញប្រទេសចិន និងជុំវិញពិភពលោក ផ្តល់នូវអង្គបដិប្រាណមិនគ្រប់គ្រាន់ សម្រាប់ប្រឆាំងនឹងវ៉ារ្យ៉ង់អូមីក្រុងទេ។
ការរកឃើញពីការសិក្សា ដែលចេញផ្សាយ ដោយសាកលវិទ្យាល័យហុងកុង បានធ្វើឱ្យមានការព្រួយបារម្ភកាន់តែខ្លាំងជុំវិញការកើនឡើងនូវករណីអូមីក្រុងនៅក្នុងតំបន់ជាច្រើននៃពិភពលោក ហើយករណី ២ ដំបូង ត្រូវបានរកឃើញនៅក្នុងប្រទេសចិនដីគោកក្នុងសប្តាហ៍នេះ។
ប្រទេសចិន បានចែកចាយវ៉ាក់សាំងច្រើនជាង ២,៥ពាន់លានដូស ដែលភាគច្រើនជា វ៉ាក់សាំង Sinovac ឬ Sinopharm និងបានអនុម័តយុទ្ធសាស្ត្រហ្សេរ៉ូកូវីដ ដែលបានដាក់មនុស្សមួយចំនួនធំឱ្យនៅដាច់ដោយឡែកពីគេ។ វីរុសកូរ៉ូណាប្រភេទថ្មី បង្កើតជាមន្ទិលស្ដីអំពីប្រសិទ្ធភាពនៃវ៉ាក់សាំងរបស់ចិន និងសមត្ថភាពរបស់ទីក្រុងប៉េកាំងក្នុងការរក្សាការរីករាលដាលឱ្យស្ថិតក្រោមកម្រិតទាបបំផុត។
លោក Nicholas Thomas សាស្ត្រាចារ្យរងនៅសាកលវិទ្យាល័យ City of Hong Kong ដែលមានជំនាញខាងគោលនយោបាយការបរទេស និងសន្តិសុខសុខភាពរបស់ចិននៅអាស៊ី បាននិយាយថា៖ «វ៉ាក់សាំងចិន ហាក់ដូចជា គ្មានសមត្ថភាពប្រឆាំងនឹងវ៉ារ៉្យង់អូមីក្រុង។ បញ្ហាប្រឈមសម្រាប់អាជ្ញាធរចិន ឥឡូវនេះគឺរដ្ឋាភិបាល ត្រូវប្តេជ្ញាចិត្តចែកចាយវ៉ាក់សាំងមួយជុំទៀតដល់ប្រជាជនរបស់ពួកគេ»។
ការសិក្សានៅទីក្រុងហុងកុង បានធ្វើតេស្តកម្រិតអង្គបដិប្រាណរបស់មនុស្ស ២៥ នាក់ ដែលទទួលបានវ៉ាក់សាំង Sinovac ទាំង ២ ដូស ដែលជាវ៉ាក់សាំងអសកម្ម ហើយបានរកឃើញថា គ្មាននរណាម្នាក់ មានអង្គបដិប្រាណគ្រប់គ្រាន់នៅក្នុងសេរ៉ូមឈាមរបស់ពួកគេ ដើម្បីបន្សាបវ៉ារ្យ៉ង់ថ្មីនោះទេ។
ផ្ទុយទៅវិញ មនុស្ស ៥ នាក់ក្នុងចំណោមក្រុម ២៥ ដែលត្រូវបានចាក់វ៉ាក់សាំង BioNTech/Pfizer ចំនួន ២ ដូស ត្រូវបានគេរកឃើញថា មានអង្គបដិប្រាណអព្យាក្រឹត ដែលអាចប្រឆាំងនឹងវ៉ារ៉្យង់អូមីក្រុង និងមានប្រសិទ្ធភាព ចន្លោះពី ២០ ទៅ ២៤ ភាគរយប្រឆាំងនឹងវ៉ារ្យ៉ង់ថ្មី។
ទន្ទឹមនឹងនេះដែរ កាលពីសប្តាហ៍មុន ក្រុមហ៊ុន Pfizer បាននិយាយថា វ៉ាក់សាំងទាំង ៣ ដូសរបស់ខ្លួន អាចបន្សាបអូមីក្រុនបាន ដោយផ្អែកលើការធ្វើតេស្តមន្ទីរពិសោធន៍។

ប្រភព៖ FT