នីការ៉ាហ្គ័រៀបចំអតីតស្ថានទូតតៃវ៉ាន់ ប្រគល់ឱ្យចិនដីគោក
នីការ៉ាហ្គ័នៃតំបន់អាមេរិកកណ្ដាល បានរឹបអូសអតីតស្ថានទូតតៃវ៉ាន់ដើម្បីប្រគល់ឱ្យចិនដីគោកវិញ បន្ទាប់រដ្ឋាភិបាលលោកប្រធានាធិបតីដានីយ៉ែល អ័រតេហ្គាផ្ដាច់ទំនាក់ទំនងជាមួយតៃវ៉ាន់ក្នុងខែនេះ ដោយលើកឡើងថា ខ្លួននឹងទទួលស្គាល់តែរដ្ឋាភិបាលដីគោកប៉ុណ្ណោះ។
មុនពេលពួកគេចាកចេញ បេសកកម្មការទូតតៃវ៉ាន់បានព្យាយាមបរិច្ចាគអគារស្ថានទូតទៅឱ្យវិហាររ៉ូម៉ាំងកាតូលិកប្រចាំរដ្ឋធានីម៉ាណាហ្គា នៃប្រទេសនីការ៉ាហ្គ័។
ប៉ុន្តែរដ្ឋាភិបាលរបស់លោកអ័រតេហ្គាបាននិយាយកាលពីល្ងាចថ្ងៃអាទិត្យថា ការបរិច្ចាគបែបនេះគឺមិនស្របច្បាប់ទេ ដោយលើកឡើងថាអគារនេះគឺជាកម្មសិទ្ធិរបស់រដ្ឋាភិបាលក្រុងប៉េកាំង។ ខុទ្ទកាល័យអគ្គរដ្ឋអាជ្ញានីការ៉ាហ្គាបានចេញសេចក្ដីថ្លែងការណ៍មួយថាការព្យាយាមបរិច្ចាគនេះគឺជា «ការធ្វើសកម្មភាព និងការបោកប្រាស់ដើម្បីយករបស់ដែលមិនមែនជាកម្មសិទ្ធិរបស់ពួកគេ»។
ក្រសួងការបរទេសតៃវ៉ាន់បានថ្កោលទោសចំពោះ «សកម្មភាពខុសច្បាប់យ៉ាងធ្ងន់ធ្ងរនៃរបបអ័រតេហ្គា» ហើយនិយាយថារដ្ឋាភិបាលនីការ៉ាហ្គាបានរំលោភលើនីតិវិធីស្តង់ដារដោយផ្តល់ឱ្យមន្ត្រីការទូតតៃវ៉ាន់ត្រឹមតែពីរសប្ដាហ៍ដើម្បីចាកចេញពីប្រទេសនីការ៉ាហ្គា។ ពួកគេក៏បានបន្ថែមទៀតថាតៃវ៉ាន់«ក៏ថ្កោលទោសការរារាំងតាមអំពើចិត្តរបស់រដ្ឋាភិបាលនីការ៉ាហ្គាចំពោះការលក់ជានិមិត្តរូបនូវទ្រព្យសម្បត្តិរបស់ខ្លួនទៅឱ្យព្រះវិហារកាតូលិកនីការ៉ាហ្គា»៕
ប្រភព៖ Yahoo News
