ឯកឧត្តម ហ៊ុន ម៉ានី៖ ក្រឡេកមកមើលកម្ពុជា២៣ឆ្នាំចុងក្រោយ ប្រទេសដ៏កម្សត់មួយនេះបានកំពុងប្រែក្លាយខ្លួនជាកូននាគប្រចាំទ្វីបអាស៊ី
ភ្នំពេញ៖ ក្រោមការអនុវត្ត “នយោបាយឈ្នះ-ឈ្នះ” ព្រះរាជាណាចក្រកម្ពុជា ទទួលបានសុខសន្តិភាព ការឯកភាពទឹកដី ការបញ្ចប់ជម្លោះប្រដាប់អាវុធ និងការបង្រួមបង្រួមជាតិពិតប្រាកដជាលើកដំបូងក្នុងប្រវត្តិសាស្ត្ររបស់ខ្លួនក្នុងរយៈពេលរាប់រយឆ្នាំចុងក្រោយ។ ក្រឡេកមកមើលកម្ពុជា២៣ឆ្នាំចុងក្រោយ ប្រទេសដ៏កម្សត់មួយនេះ បានកំពុងប្រែក្លាយខ្លួនជាកូននាគប្រចាំទ្វីបអាស៊ី តាមរយៈកំណើនសេដ្ឋកិច្ចដែលគួរឱ្យកត់សម្គាល់ជាបន្តបន្ទាប់…។ នេះជាសំណេរលើបណ្ដាញសង្គមហ្វេសប៊ុកផ្លូវការរបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជានៅរសៀលថ្ងៃទី២៩ ខែធ្នូ ឆ្នាំ២០២១នេះ។
ឯកឧត្តម ហ៊ុន ម៉ានី បានផ្តើមដោយពាក្យថា “អបអរសាទរខួបអនុស្សាវរីយ៍លើកទី២៣ ថ្ងៃបញ្ចប់សង្គ្រាមស៊ីវិលទាំងស្រុងនៅកម្ពុជា តាមរយៈនយោបាយ ឈ្នះ ឈ្នះ ខណៈនេះ តើមានប្រទេសប៉ុន្មាននៅលើពិភពលោកដែលកំពុងតែបន្តមានសង្គ្រាមរ៉ាំរៃនៅក្នុងប្រទេស? តើឥទ្ធិពលនៃសង្គ្រាមបានបន្សល់ទុកនូវក្តីវិនាស អន្តរាយ និងការឈឺចាប់ដ៏សែនខ្លោចផ្សារយ៉ាងណាខ្លះដល់ប្រទេសជាតិ និងប្រជាជន? កម្ពុជាដែលធ្លាប់តែត្រូវបានបែងចែក ធ្លាប់ស្ថិតក្នុងភ្លើងសង្គ្រាម បានក្លាយជាប្រទេសតែមួយ ដែលមានរដ្ឋធម្មនុញ្ញតែមួយ ក្រោមម្លប់នៃព្រះមហាក្សត្រ រាជរដ្ឋាភិបាលតែមួយ កងកម្លាំងប្រដាប់អាវុធតែមួយ និងរដ្ឋបាលដែនដីតែមួយ។
ឯកឧត្តម បានបន្តថា “ក្រោមការអនុវត្ត នយោបាយ ឈ្នះ-ឈ្នះ” ព្រះរាជាណាចក្រកម្ពុជា ទទួលបានសុខសន្តិភាព ការឯកភាពទឹកដី ការបញ្ចប់ជម្លោះប្រដាប់អាវុធ និងការបង្រួមបង្រួមជាតិពិតប្រាកដជាលើកដំបូងក្នុងប្រវត្តិសាស្ត្ររបស់ខ្លួនក្នុងរយៈពេលរាប់រយឆ្នាំចុងក្រោយ។ ក្រឡេកមកមើលកម្ពុជា២៣ឆ្នាំចុងក្រោយ ប្រទេសដ៏កម្សត់មួយនេះបានកំពុងប្រែក្លាយខ្លួនជាកូននាគប្រចាំទ្វីបអាស៊ី តាមរយៈកំណើនសេដ្ឋកិច្ចដែលគួរឱ្យកត់សម្គាល់ជាបន្តបន្ទាប់ហើយកម្ពុជាបានក្លាយជាគោលដៅទេសចរអន្តរជាតិប្រកបដោយសក្តានុពលដែលទាក់ទាញទេសចរ និងមានកំណើនរាប់លាននាក់ពីមួយឆ្នាំទៅមួយឆ្នាំៗ។
សន្តិភាព និងការឯកភាពជាតិ បានធ្វើឱ្យកម្ពុជាបានផ្សារភ្ជាប់ទំនាក់ទំនងជាមួយបណ្តាប្រទេសលើពិភពលោកហើយមានស្ថានតំណាង នៅបរទេសជាច្រើនដែលកំពុងបន្តពង្រីកបន្ថែមជាបន្តបន្ទាប់។ ជាងនេះទៅទៀតកម្ពុជាកំពុងបំពេញតួនាទីធំៗក្នុងកិច្ចសហប្រតិបត្តិការក្នុងតំបន់ និងចូលរួមដោះស្រាយកិច្ចការអន្តរជាតិពោលគឺកម្ពុជាមិនត្រឹមតែឈរក្នុងលំដាប់ស្មើរមុខស្មើរមាត់នៅលើឆាកអន្តរជាតិតែប៉ុណ្ណោះទេ តែកម្ពុជាក៏បានបង្ហាញពីសក្តានុពលរបស់ខ្លួនក្នុងការធ្វើជាប្រធាននៃកិច្ចប្រជុំអន្តរជាតិធំៗជាច្រើន។
ឯកឧត្តមបានបន្តថា មោទកភាពទាំងឡាយដែលបានរៀបរាប់ខាងលើនេះ មិនទាន់រាប់បញ្ចូលនូវភាពជោគជ័យរបស់កម្ពុជាក្នុងការទប់ស្កាត់ការរីករាលដាលនៃជំងឺកូវីដ-១៩ ដែលពិភពលោកនៅតែកំពុងបន្តការព្រួយបារម្ភនៅឡើយនោះទេ។ អត្ថន័យនៃនយោបាយឈ្នះ ឈ្នះ មានតម្លៃខ្ពស់ និងជាកេរតំណែលប្រវត្តិសាស្ត្រដ៏ថ្លៃថ្លាមួយសម្រាប់កូនខ្មែរគ្រប់ជំនាន់ ដើម្បីប្រកាន់ខ្ជាប់នូវមោទកភាពជាតិ វីរភាពជាតិ ការលះបង់ ការលើកកម្ពស់ទស្សនៈឯកភាពជាតិ ក៏ដូចជាបានផ្តល់ឱកាសឱ្យកម្ពុជាកសាងបាននូវមូលដ្ឋានគ្រឹះនៃលទ្ធិប្រជាធិបតេយ្យ។
ឯកឧត្តម ហ៊ុន ម៉ានី បានបញ្ចប់ដោយធ្វើការគូសបញ្ជាក់ថា “តឹកតាងប្រវត្តិសាស្ត្រ និងដំណើរវិវឌ្ឍន៍របស់កម្ពុជាទាំងអស់នេះ មិនត្រឹមតែជាមេរៀនដើម្បីចែករំលែកជូនបណ្តាប្រទេសនានាសិក្សាជាបទពិសោធន៍តែប៉ុណ្ណោះទេ តែបានបង្រៀនដល់កូនខ្មែរគ្រប់ជំនាន់ក្នុងបេសកកម្មថែរក្សាឱ្យខាងតែបាននូវកត្តាសុខសន្តិភាព ការប្រឆាំងបដិវត្តន៍ពណ៌ និងការរក្សាឱ្យបាននូវកំណើនសេដ្ឋកិច្ច សេចក្តីសុខសប្បាយ សុខុមាលភាព ជូនជាតិ និងប្រជាជន ហើយបន្តជឿជាក់លើការដឹកនាំរបស់រាជរដ្ឋាភិបាលកម្ពុជា ជឿជាក់លើកម្ពុជា និងជឿថាខ្មែរធ្វើបាន”៕
រូបភាពដោយ៖ ក្រុមការងារ និងបណ្តាញសង្គម
