ជប៉ុន និងអូស្ត្រាលីចុះកិច្ចព្រមព្រៀងសន្តិសុខ ឆ្លើយតបការគំរាមកំហែងនៅតំបន់ឥណ្ឌូ-ប៉ាស៊ីហ្វិក

ជប៉ុន និង​អូស្ត្រាលី​បាន​សម្រេច​ចុះ​កិច្ចព្រមព្រៀង​ផ្ដល់​ការ​ចេញ-ចូល​ឱ្យ​គ្នា​ទៅ​វិញ​ទៅ​មក (Reciprocal Access Agreement – RAA) ដែល​ជា​កិច្ចព្រមព្រៀង​សន្តិសុខ​មួយ​រវាង​ប្រទេស​ទាំង​ពីរ​កាល​ពី​ថ្ងៃ​ព្រហស្បតិ៍​កន្លង​។

ការ​ចុះ​កិច្ចព្រមព្រៀង​នេះ​ធ្វើ​ឡើង​អំឡុង​ជំនួប​រវាង​លោក ហ្វូមីអូ គីស៊ីដា នាយករដ្ឋមន្ត្រី​ជប៉ុន និង​លោក ស្កុត ម៉ូរីសុន នាយករដ្ឋមន្ត្រី​អូស្ត្រាលី​តាម​ប្រព័ន្ធ​វីដេអូ។

តាម​ពិត​ទៅ​ លោក គីស៊ីដា គ្រោង​នឹង​ធ្វើ​ដំណើរ​ទស្សនកិច្ច​ទៅ​កាន់​អូស្ត្រាលី និង​សហរដ្ឋអាមេរិក នៅ​ខែ​មករា ប៉ុន្តែ​ក្រោយ​មក​លោក​បាន​ធ្វើ​ការ​លើក​ពេល​វិញ ដោយ​សារ​តែ​លោក​ត្រូវ​ដោះស្រាយ​នឹង​ការងារ​ប្រឆាំង​នឹង​ជំងឺ​កូវីដ-១៩ វ៉ារ្យង់​អូមីក្រុង នៅ​ឯ​ប្រទេស​ជប៉ុន។

តាម​រយៈ​កិច្ចព្រមព្រៀង​សន្តិសុខ RAA នេះ​ ជប៉ុន​ និង​អូស្ត្រាលី​នឹង​សម្របសម្រួល​កងទ័ព​ប្រទេស​ទាំង​ពីរ​​ក្នុង​សកម្មភាព​មួយ​ចំនួន​ដូច​ជា «លំហាត់​សមយុទ្ធ​រួម ក៏​ដូច​ជា​ប្រតិបត្តិការ​ក្នុង​ការ​ជួយ​សង្គ្រោះ​អំឡុង​ពេល​មាន​គ្រោះ​មហន្តរាយ រាប់​បញ្ចូល​ទាំង​គ្រោះ​អាសន្ន​ក្នុង​ទំហំ​ធំធេង និង​ស្មុគស្មាញ»។ នេះ​បើ​តាម​សេចក្ដីថ្លែងការណ៍​រួម​បន្ទាប់​ពី​កិច្ចប្រជុំ​របស់​នាយករដ្ឋមន្ត្រី​ប្រទេស​ទាំង​ពីរ។

ក្រៅ​ពី​នេះ​ទៅ​ទៀត ប្រទេស​ទាំង​ពីរ​នឹង​ «បង្កើន​ប្រសិទ្ធភាព​នៃ​អន្តរ​ប្រតិបត្តិការ និង​អានុភាព​នៃ​កងកម្លាំង​» របស់​ខ្លួន។

កិច្ចព្រមព្រៀង​កម្រាស់ ២៩ទំព័រ​មួយ​នេះ​ត្រូវ​បាន​ចុះ​ហត្ថលេខា​ដោយ​ផ្ទាល់​ដោយ​លោក គីស៊ីដា និង​លោក​ ម៉ូរីសុន។ ក្នុង​ខ្លឹមសារ​ដែល​ចុះ​ផ្សាយ​ដោយ​ក្រសួង​ការបរទេស​ជប៉ុន កិច្ចព្រមព្រៀង​នេះ​អនុញ្ញាត​ឱ្យ​កងទ័ព​ជប៉ុន និង​អូស្ត្រាលី​ប្រើប្រាស់​មូលដ្ឋាន​ទ័ព​របស់​គ្នា​ទៅ​វិញ​ទៅ​មក។

តាម​ពិត​ទៅ​ប្រទេស​ទាំង​ពីរ​មាន​កិច្ច​សហប្រតិបត្តិការ​ផ្នែក​សន្តិសុខ​នឹង​គ្នា​ហាក់​បី​ដូច​ជា​ច្រើន​ណាស់​ដែរ​ហើយ តាម​រយៈ​ការ​ប្រាស្រ័យ​ទាក់ទង​គ្នា​នានា។ យ៉ាងណាមិញ កិច្ចព្រមព្រៀង​នេះ​ជា​ការ​សម្រួល​ផ្នែក​ផ្លូវ​ច្បាប់​ដល់​ការ​ឆ្លងកាត់​របស់​ប្រទេស​ទាំង​ពីរ។

ជាមួយ​គ្នា​នេះ​ដែរ កងទ័ព​នៃ​ប្រទេស​ទាំង​ពីរ​ត្រូវ​តែ​គោរព​តាម​ច្បាប់​របស់​ប្រទេស​ម្ចាស់​ផ្ទះ។ នេះ​បាន​សេចក្ដី​ថា ប្រសិន​បើ​កងទ័ព​ណា​មួយ​ប្រព្រឹត្តិ​បទ​ល្មើស​ កងទ័ព​រូប​នោះ​នឹង​ត្រូវ​រង​ការ​កាត់​ទោស​ដោយ​ប្រទេស​ម្ចាស់ ដោយ​មិន​មាន​ការ​លើកលែង​នោះ​ទេ។

តាម​ពិត​ទៅ​ជប៉ុន និង​អូស្ត្រាលី​ជជែក​ពិភាក្សា​គ្នា​អំពី​កិច្ចព្រមព្រៀង​សន្តិសុខ​នេះ​តាំង​ពី​ឆ្នាំ២០១៤ មក​ម្ល៉េះ ហើយ​ប្រទេស​ទាំង​ពីរ​បាន​ព្រមព្រៀង​គ្នា​សម្រាប់​ជំហាន​ដំបូង​កាល​ពី​ខែ​វិច្ឆិកា ឆ្នាំ២០២០​។

អ្វី​ដែល​ជា​ឧបសគ្គ​ក្នុង​ការ​សម្រេច​កិច្ចព្រមព្រៀង​នេះ​គឺ​ត្រង់​ការ​អនុវត្ត​ទោស​ប្រហារ​ជីវិត​របស់​ជប៉ុន ដោយ​ត្រង់​ចំណុច​នេះ​ជា​ការ​ជំទាស់​យ៉ាង​ដាច់​ខាត​ពី​សំណាក់​ភាគី​អូស្ត្រាលី។ ប្រទេស​នៅ​អឌ្ឍគោល​ចុង​ខាង​ត្បូង​មួយ​នេះ​បាន​រំលាយ​មិន​ឱ្យ​មាន​ទោសប្រហារ​ជីវិត​តាំង​ពី​ឆ្នាំ១៩៨៥ ហើយ​ជា​អ្នក​តស៊ូ​មតិ​មួយ​ក្នុង​ការ​ជំរុញ​ឱ្យ​ពិភពលោក​ទាំង​មូល​រំលាយ​ទោស​ប្រហារ​ជីវិត។

ទោះ​ជា​យ៉ាង​ណា​ក៏​ដោយ ស្រប​ពេល​ដែល​ស្ថានភាព​ភូមិសាស្ត្រ​នយោបាយ​កាន់​តែ​តឹងតែង​ ដែល​ជាពិសេស​គឺ​ប្រទេស​មើល​ឃើញ​ថា ចិន​បង្ក​ជា​ការ​គំរាមកំហែង​ផ្នែក​សន្តិសុខ​ដល់​ប្រទេស​របស់​ខ្លួន អូស្ត្រាលី​ក៏​ថយ​មួយ​ជំហាន​លើ​រឿង​ទោស​ប្រហារ​ជីវិត ហើយ​ក៏​សម្រេច​ចុះ​ហត្ថលេខា​លើ​កិច្ចព្រមព្រៀង​នេះ​នៅ​ដើម​ឆ្នាំ២០២២ តែ​ម្ដង​ទៅ។

ជប៉ុន​កន្លង​មក​បាន​ចុះ​កិច្ចព្រមព្រៀង​សន្តិសុខ​ប្រភេទ​នេះ​តែ​ជាមួយ​សហរដ្ឋអាមេរិក​នោះ​ទេ។ បើ​យោង​តាម​ការ​ចុះ​ផ្សាយ​របស់​សារព័ត៌មាន​ជប៉ុន​នានា​ ជប៉ុន​មាន​បំណង​ក្នុង​ការ​ចុះ​កិច្ចព្រមព្រៀង​ប្រភេទ​នេះ​ជាមួយ​នឹង​ចក្រភពអង់គ្លេស​បន្ថែម​ទៀត។

ចំណែក​ឯ​អូស្ត្រាលី​វិញ ក្រោយ​ពី​មាន​ទំនាក់ទំនង​ល្អក់កករ​ជាមួយ​ចិន​ក៏​ស្ទុះស្ទា​ក្នុង​ការ​ពង្រឹង​សន្តិសុខ​របស់​ខ្លួន​តាម​រយៈ​ការ​ចុះ​កិច្ចព្រមព្រៀង​សន្តិសុខ​ត្រីភាគី​ជាមួយ​អង់គ្លេស និង​សហរដ្ឋអាមេរិក ដែល​ហៅ​កាត់​ថា AUKUS។

អំឡុង​ពិភាក្សា​គ្នា​តាម​ប្រព័ន្ធ​អនឡាញ​នេះ​ដែរ ភាគី​ជប៉ុន និង​អូស្ត្រាលី​ក៏​បង្ហាញ​ពី​គោលជំហរ​ក្នុង​ការ​ជំទាស់​នឹង​សកម្មភាព​ណា​មួយ​ ដែល​ប៉ុនប៉ង​ក្នុង​ការ​ផ្លាស់ប្ដូរ​បច្ចុប្បន្នភាព​នៅ​តំបន់​សមុទ្រ​ចិន​ខាង​កើត និង​សមុទ្រ​ចិន​ខាង​ត្បូង។

បន្ថែម​ពី​នេះ​ដែរ ប្រទេស​ទាំង​ពីរ​ក៏​ប្ដេជ្ញា​ចិត្ត​រួម​គ្នា​ ដើម្បី​ពង្រឹង «សន្តិសុខ​សេដ្ឋកិច្ច» ដោយ​ប្រឆាំង​នឹង​ការ​ផ្ទេរ​​បច្ចេកវិទ្យា​ដោយ​ខុស​ច្បាប់ ដែល​ពាក់ព័ន្ធ​នឹង​ចារកម្ម​ផ្នែក​ឧស្សាហកម្ម ក៏​ដូច​ជា​រួម​គ្នា​ការពារ​ហេដ្ឋារចនាសម្ព័ន្ធ​សំខាន់​ៗ​ ដែល​រួម​មាន​ប្រព័ន្ធ​អ៊ីនធឺណិត​ជា​ដើម។

ជាមួយ​គ្នា​នេះ​ដែរ លោក វ៉ាង វិនប៊ីន អ្នក​នាំ​ពាក្យ​ក្រសួង​ការបរទេស​ចិន​បាន​លើកឡើង​នៅ​មុន​ថ្ងៃ​ចុះ​កិច្ចព្រមព្រៀង​ផ្នែក​សន្តិសុខ​រវាង​អូស្ត្រាលី និង​ជប៉ុន​ថា៖ «កិច្ចសហប្រតិបត្តិការ និង​ការផ្លាស់ប្ដូរ​រវាង​រដ្ឋ និង​រដ្ឋ គួរ​តែ​ធ្វើ​ឡើង​ដើម្បី​បង្កើន​ការ​យោគយល់​ និង​ភាព​ទុក​ចិត្ត​គ្នា​ទៅ​វិញ​ទៅ​មក​រវាង​ប្រទេស​នានា​នៅ​ក្នុង​តំបន់ ក៏​ដូច​ជា​គាំពារ​សន្តិភាព និង​ស្ថិរភាព​តំបន់ ជា​ជាង​ដាក់​គោលដៅ​ ឬ ក៏​បង្ក​ជា​ផល​ប៉ះពាល់​ដល់​ផលប្រយោជន៍​របស់​ភាគី​ទី​ ៣ ណា​មួយ»។

«យើង​សង្ឃឹម​ថា​មហាសមុទ្រ​ប៉ាស៊ីហ្វិក​នឹង​នៅ​​តែ​ជា​សមុទ្រ​ប្រកបដោយ​សន្តិភាព មិនមែន​ជា​កន្លែង​បង្ក​ព្យុះ​ភ្លៀង​ឡើយ»។ នេះ​បើ​តាម​ការ​បន្ថែម​របស់​លោក វ៉ាង៕

ប្រភព៖ Nikkie Asia

ឆាយ រត្ថា
ឆាយ រត្ថា
លោក ឆាយ រត្ថា ជាបុគ្គលិកផ្នែកព័ត៌មានវិទ្យា នៃអគ្គនាយកដ្ឋានវិទ្យុ និងទូរទស្សន៍ អប្សរា
ads banner
ads banner
ads banner