អគ្គលេខាធិការអង្គការណាតូថាសម្ព័ន្ធភាពយោធាបានត្រៀមខ្លួនសម្រាប់ជម្លោះនៅទ្វីបអឺរ៉ុប

អគ្គលេខាធិការ​អង្គការ​ណាតូ​លោក​ជេន ស្ទូលតេនប៊ឺក​បាន​និយាយ​ថា​រុស្សី​ត្រូវ​តែ​បោះបង់​គោលនយោបាយ​ការបរទេស​អរិភាព​​ និង​សហការ​ជា​មួយ​លោក​ខាង​លិច​ ប្រសិន​បើ​មិន​ចង់​ប្រឈម​មុខ​នឹង​សម្ព័ន្ធ​ភាព​យោធា​ទាំង​មូល ដែល​បាន​ត្រៀម​ខ្លួន​ជា​សម្រេច​សម្រាប់​ជម្លោះ​ប្រដាប់​អាវុធ​នៅ​ទ្វីប​អឺរ៉ុប​ ប្រសិន​បើ​ការ​ចរចា​បរាជ័យ​។

ការ​ព្រមាន​របស់​លោក​បាន​ធ្វើ​ឡើង​មុន​កិច្ចពិភាក្សា​ផ្លូវ​ការ​រវាង​មន្ត្រី​រុស្សី​និង​អាមេរិក​នៅ​ទីក្រុង​ហ្សឺណែវ​កាល​ពី​ថ្ងៃ​ចន្ទ និង​កិច្ច​ប្រជុំ​ក្រុង​ប្រ៊ុចសែល ​នៅ​ថ្ងៃ​ពុធ​រវាង​សមាជិក​ទាំង ៣០ នៃ​សម្ព័ន្ធ​ភាព​ណាតូ​ និង​គណៈប្រតិភូ​រុស្សី​។ កិច្ចប្រជុំ​នៅ​ទីក្រុង​វីយ៉ែន​ ដែល​រៀប​ចំ​ដោយ​អង្គការ​សម្រាប់​សន្តិសុខ និង​កិច្ច​សហប្រតិបត្តិការ​នៅ​អឺរ៉ុប ត្រូវ​គ្រោង​ទុក​សម្រាប់​ថ្ងៃ​ព្រហស្បតិ៍​។

ប្រទេស​រុស្សី​បាន​ដាក់​ពង្រាយ​ទាហាន​ជិត​ ១០០.០០០ នាក់​នៅ​តំបន់​ជាប់​ព្រំដែន​ជា​មួយ​ប្រទេស​អ៊ុយក្រែន​ បាន​ធ្វើ​ឱ្យ​មាន​ការ​ព្រួយ​បារម្ភ​ថា​ប្រទេស​រុស្សី​គឺ​កំពុង​ត្រៀម​ឈ្លានពាន​ប្រទេស​អ៊ុយក្រែន​។ ប្រទេស​រុស្សី​បាន​ច្រាន​ចោល​ការ​ចោទ​ប្រកាន់​ទាំង​នេះ ហើយ​និយាយ​ថា​ការ​កសាង​ទំនាក់ទំនង​រវាង​ណាតូ និង​ប្រទេស​អ៊ុយក្រែន​គឺ​ជា​ការ​គំរាមកំហែង​ដោយ​ផ្ទាល់​ចំពោះ​សន្តិសុខ​របស់​រុស្សី​។

រុស្សី​បាន​ធ្វើ​ការ​ទាមទារ​ឱ្យ​មាន​ការ​ធានា​សន្តិសុខ​មួយ​ចំនួន​ពី​ណាតូ​ ដែល​រួមមាន​ការ​ហាមឃាត់​មិន​ឱ្យ​ពង្រីក​សមាជិកភាព​មក​អឺរ៉ុប​ខាង​កើត​ជា​ពិសេស​អ៊ុយក្រែន​ និង​ផ្ដល់​សិទ្ធ​វេតូ​ដល់​ក្រុង​ក្រឹមឡាំង​ក្នុង​ការ​រារាំង​សកម្មភាព​របស់​សម្ព័ន្ធ​យោធា​នេះ​ ក្នុង​ប្រទេស​ដែល​ទើប​តែ​ចូល​ជា​សមាជិក​បន្ទាប់​ពី​ការ​ដួល​រលំ​របស់​សហភាព​សូវៀត​។ លោក​ស្ទូលតេនប៊ឺក​បាន​និយាយ​ថា​លក្ខខណ្ឌ​ទាំង​ពីរ​នេះ​គឺ​មិន​អាច​ទទួល​យក​បាន​ទេ​ ព្រោះ​ការ​ទាមទារ​នេះ​បាន​រំលោភ​គោលការណ៍​ស្នូល​របស់​ណាតូ​។

ផ្ទុយ​ទៅ​វិញ​លោក​ស្ទូលតេនប៊ឺក​បាន​និយាយ​ថា​សហរដ្ឋអាមេរិក និង​ណាតូ​បាន​ត្រៀម​ខ្លួន​ដើម្បី​និយាយ​ជា​មួយ​រុស្សី​អំពី​វិធានការ​កាត់​បន្ថយ​ហានិភ័យ ដែល​រួមមាន​ «ការ​គ្រប់គ្រង​អាវុធ និង​កិច្ច​ខិតខំ​ប្រឹងប្រែង​ដើម្បី​ព្យាយាម​ឱ្យ​មាន​តម្លាភាព​បន្ថែម​ទៀត​លើ​សកម្មភាព​យោធា សមយុទ្ធ និង​នៅ​លើ​បណ្ដាញ​ទំនាក់​ទំនង​ផង​ដែរ​»​៕

ប្រភព៖ FT

ឆាយ រត្ថា
ឆាយ រត្ថា
លោក ឆាយ រត្ថា ជាបុគ្គលិកផ្នែកព័ត៌មានវិទ្យា នៃអគ្គនាយកដ្ឋានវិទ្យុ និងទូរទស្សន៍ អប្សរា
ads banner
ads banner
ads banner