អតីតនាយករដ្ឋមន្ត្រីកាហ្សាក់ស្ថាននិយាយថា មេដឹកនាំបច្ចុប្បន្នត្រូវតែចាត់វិធានការឱ្យឆាប់ដើម្បីពង្រឹងអំណាច
អតីតនាយករដ្ឋមន្ត្រីកាហ្សាក់ស្ថានលោក Akezhan Kazhegeldin និយាយថា ប្រធានាធិបតីបច្ចុប្បន្នត្រូវតែចេញវិធានការឱ្យលឿនដើម្បីពង្រឹងអំណាចរបស់លោក បន្ទាប់ពីមានការប្រេះស្រាំនៃទំនាក់ទំនងជាមួយអតីតប្រធានាធិបតីមុនដែលនៅតែមានឥទ្ធិពលលើរដ្ឋាភិបាល ស្របពេលដែលកាហ្សាក់ស្ថានប្រឈមមុខនឹងបាតុកម្មដ៏ធំទូទាំងប្រទេសពីពលរដ្ឋដែលមិនពេញចិត្តនឹងការឡើងថ្លៃនៃតម្លៃប្រេងសាំង។
អតីតនាយករដ្ឋមន្ត្រីកាន់តំណែងពីទសវត្សរ៍ឆ្នាំ ១៩៩០ រូបនេះ និយាយប្រាប់ទីភ្នាក់ងាររ៉យទ័រថា លោកប្រធានាធិបតី Kassym-Jomart Tokayev ដែលគ្រប់គ្រងតាំងពីឆ្នាំ ២០១៩ បន្ទាប់ពីលោក Nursultan Nazarbayev ដែលកាន់តំណែងរយៈពេល ៣ ទសវត្សរ៍មុន ចាំបាច់ត្រូវលុបបំបាត់ការសង្ស័យអំពីអ្នកណាជាអ្នកទទួលខុសត្រូវពិតប្រាកដ។
លោក Kazhegeldin និយាយថា៖ «ខ្ញុំគិតថាមនុស្សជាច្រើននៅក្នុងបណ្តាញសង្គម ទាំងអ្នករិះគន់ នៅតែបន្តនិយាយថាលោក Tokaev ត្រូវបានលោក Nazarbayev តែងតាំង ហើយអតីតប្រធានាធិបតីរូបនេះតែងឈរនៅពីក្រោយខ្នងរបស់លោក [Tokaev]ដើម្បីរៀបចំ»។ លោកបន្តថា៖ «ឥឡូវនេះ លោកមានអំណាចប្រតិបត្តិជាផ្លូវការទាំងស្រុង សំណួរគឺថាតើលោកនឹងដាក់ពង្រាយវាដោយរបៀបណា។ លោកត្រូវតែបញ្ជា»។
លោក Kazhegeldin ធ្វើជានាយករដ្ឋមន្ត្រីក្រោមការដឹកនាំរបស់លោក Nazarbayev ពេលដែលលោក Tokaev ធ្វើជារដ្ឋមន្ត្រីការបរទេសនៅឡើយ ប៉ុន្តែអតីតនាយករដ្ឋមន្រ្តីរូបនេះបានលាឈប់ដោយសារការព្រួយបារម្ភអំពីអំពើពុករលួយ ហើយបច្ចុប្បន្ននេះ កំពុងរស់នៅនិរទេសខ្លួនក្នុងប្រទេសអង់គ្លេស។
លោកជំរុញឱ្យលោក Tokaev ស៊ើបអង្កេតឱ្យបានលឿន នាំអ្នកទទួលខុសត្រូវចំពោះអំពើហិង្សាមករកយុត្តិធម៌ និងស្តាប់ការទាមទាររបស់ប្រជាជនឱ្យមានការកែទម្រង់។ លោក Kazhegeldin និយាយថា៖ «ប្រសិនបើលោក[Tokaev]ធ្វើវាក្នុងរយៈពេលដ៏ខ្លី លោកអាចពឹងផ្អែកលើការគាំទ្ររបស់ប្រជាពលរដ្ឋនៅក្នុងការបោះឆ្នោត។ ប្រសិនបើលោកមិនធ្វើទេ ប្រជាជននឹងបន្ទោសបញ្ហាទាំងអស់ និងអ្វីគ្រប់យ៉ាងដែលកើតឡើងថ្មីៗនេះថាមកពីលោក»។
អ្នកនាំពាក្យរបស់លោក Nazarbayev ចេញសេចក្តីថ្លែងការណ៍មួយកាលពីថ្ងៃអាទិត្យ នៅក្នុងការប៉ុនប៉ងជាក់ស្តែងមួយដើម្បីលុបបំបាត់ចំណាប់អារម្មណ៍នៃជម្លោះរវាងលោក និងលោកប្រធានាធិបតី Tokaev ។ សេចក្ដីថ្លែងការណ៍និយាយថា អតីតប្រធានាធិបតីជ្រើសរើសបោះបង់តំណែងក្រុមប្រឹក្សាសន្តិសុខរបស់ខ្លួនឱ្យទៅលោក Tokayev ដើម្បីជួយសម្រាលវិបត្តិ ហើយបុរសទាំងពីរតែងតែនៅម្ខាងនៃរបាំងការពារ។
៣ ទសវត្សរ៍នៃការគ្រប់គ្រងកាហ្សាក់ស្ថាន លោក Nazarbayev ទាក់ទាញការវិនិយោគបរទេសរាប់រយពាន់លានដុល្លារក្នុងវិស័យថាមពល និងលោហៈ និងធ្វើឱ្យមានតុល្យភាពទំនាក់ទំនងយ៉ាងប៉ិនប្រសប់ជាមួយប្រទេសជិតខាងដ៏មានឥទ្ធិពលរួមមានរុស្ស៊ី និងចិន។
ការតវ៉ានៅកាហ្សាក់ស្ថានចាប់ផ្តើមជាការឆ្លើយតបទៅនឹងការឡើងថ្លៃនៃប្រេងសាំងកាលពីដើមសប្ដាហ៍មុន ប៉ុន្តែភាពចលាចលបន្តកើនឡើងដោយក្រុមបាតុករបង្ហាញពីការមិនសប្បាយចិត្តរបស់ខ្លួនចំពោះរដ្ឋាភិបាល និងអតីតប្រធានាធិបតីដែលបាតុករចោទប្រកាន់ថានៅតែមានឥទ្ធិពលលើរដ្ឋាភិបាល។
កាលពីថ្ងៃពុធសប្ដាហ៍មុន ខណៈដែលក្រុមបាតុករដុតបំផ្លាញអគារជាច្រើនខ្នងក្នុងទីក្រុង Almaty ដែលជាក្រុងដ៏ធំបំផុតប្រទេស លោក Tokayev បានដកអតីតមេដឹកនាំលោក Nazarbayev ចេញពីដំណែងប្រធានក្រុមប្រឹក្សាសន្តិសុខ ជាតួនាទីមួយដែលធ្វើឱ្យលោក Nazarbayev នៅតែមានឥទ្ធិពលក្នុងរដ្ឋាភិបាល បើទោះជាអតីតប្រធានាធិបតីវ័យ ៨១ ឆ្នាំរូបនេះ ចុះចេញពីដំណែងកាលពីឆ្នាំ ២០១៩ហើយក្ដី។
មនុស្សយ៉ាងហោចណាស់ ១៦៤ នាក់ត្រូវបានសម្លាប់ក្នុងកុបកម្ម ខណៈជិត ៨ ០០០ នាក់ត្រូវបានចាប់ខ្លួនគិតត្រឹមថ្ងៃចន្ទ ក្នុងចំណាត់ការដែលលោក Tokayev ហៅថា ប្រតិបត្តិការប្រឆាំងភេរវករ ការបោសសម្អាតដើម្បីការពារសន្តិសុខ។ ក្រោយមានការបញ្ជូនកងទ័ពជំនួយពីរុស្ស៊ី ការិយាល័យប្រធានាធិបតីកាហ្សាក់ស្ថាននិយាយកាលពីថ្ងៃអាទិត្យថា ស្ថានការណ៍មានស្ថិរភាពហើយឥឡូវនេះ។

ប្រភព៖ Reuters