លោក ចូ បៃដិន អំពាវនាវអោយមានការរួបរួមឆ្លងសមុទ្រអាត្លង់ទិក នៅចំពោះមុខភាពតានតានជុំវិញវិបត្តិអ៊ុយក្រែន
វ៉ាស៊ីនតោន៖ ប្រធានាធិបតីអាមេរិកលោក ចូ បៃដិន ដែលជំរុញឱ្យមានការរួបរួមឆ្លងសមុទ្រអាត្លង់ទិក បានធ្វើការហៅប្រជុំតាមវីដេអូរយៈពេល ៨០នាទីជាមួយនឹងមេដឹកនាំអឺរ៉ុបមួយចំនួន នៅថ្ងៃចន្ទដើមសប្តាហ៍នេះ ចេញពីបន្ទប់ស្ថានការណ៍របស់សេតវិមាន ដើម្បីពិភាក្សាអំពីវិបត្តិអ៊ុយក្រែន។
ប្រធានាធិបតីអាមេរិករូបនេះ បានប្រាប់អ្នកយកព័ត៌មានយ៉ាងដូច្នេះថា ខ្ញុំមានកិច្ចប្រជុំល្អណាស់ជាមួយអឺរ៉ុប ដែលរួមមានមេដឹកនាំនៃប្រទេសអាល្លឺម៉ង់ បារាំង អ៊ីតាលី អង់គ្លេស និងប៉ូឡូញ ហើយថា មានការមូលមតិគ្នាទាំងស្រុង។
ជាមួយគ្នានេះ បើតាមសេចក្តីថ្លែងការណ៍របស់សេតវិមាន ក្រុមមេដឹកនាំបានពិភាក្សាលើកិច្ចខិតខំប្រឹងប្រែងរួមគ្នារបស់ពួកគេ ដើម្បីទប់ស្កាត់ការឈ្លានពានរបស់រុស្ស៊ីបន្ថែមទៀតប្រឆាំងនឹងអ៊ុយក្រែន រួមទាំងការត្រៀមរៀបចំដាក់ចេញនូវផលវិបាកដ៏ធំ និងការខាតបង់សេដ្ឋកិច្ចធ្ងន់ធ្ងរលើរុស្ស៊ី សម្រាប់សកម្មភាពបែបនេះ ក៏ដូចជាការពង្រឹងសន្តិសុខនៅប៉ែកខាងកើតរបស់អង្គការណាតូ៕ ប្រភព៖ CNA
