រុស្ស៊ីព្រមានចាត់វិធានការឆ្លើយតប ប្រសិនបើសហរដ្ឋអាមេរិកមិនអាចបំពេញតាមការទាមទាររបស់វិមានក្រឹមឡាំង
ម៉ូស្គូ៖ រុស្ស៊ីនឹងចាត់វិធានការសងសឹកសមស្រប ប្រសិនបើខ្លួនមិនទទួលបានចម្លើយស្ថាបនាពីសហរដ្ឋអាមេរិក លើការទាមទាររបស់ទីក្រុងម៉ូស្គូ សម្រាប់ការធានាផ្លូវច្បាប់ថា អង្គការណាតូនឹងមិនពង្រីកសមាជិកភាពរបស់ខ្លួនទេនោះ។ នេះបើតាមរដ្ឋមន្រ្តីការបរទេសរុស្ស៊ីលោក សឺហ្គៃ ឡាវរូវ បញ្ជាក់ទៅកាន់សភាជាន់ទាបរបស់រុស្ស៊ី។
ប្រមុខការទូតរុស្ស៊ីរូបនេះបានព្រមានដូច្នេះថា រុស្ស៊ីនឹងចាត់វិធានការសងសឹក ប្រសិនបើប្រទេសលោកខាងលិចនៅតែបន្តអនុវត្តនយោបាយឈ្លានពាន ប៉ុន្តែ លោកមិនបានបញ្ជាក់អំពីវិធានការឆ្លើយតបនេះទេ។ រដ្ឋមន្ត្រីរុស្ស៊ីម្នាក់បាននិយាយថា ប្រទេសរបស់លោកនឹងសិក្សាការឆ្លើយតបរបស់រដ្ឋមន្រ្តីការបរទេសអាមេរិកលោក អាន់តូនី ប្លីងគែន ដែលធ្វើឡើងដោយមានការសម្របសម្រួលជាមួយអង្គការណាតូ។ ប្រទេសរុស្ស៊ីបានទាមទារថា អាមេរិក និងអង្គការអូតង់ត្រូវតែសន្យាឈប់រើសសមាជិកថ្មីចូលបន្ថែម ហើយត្រូវឈប់ធ្វើសមយុទ្ធយោធានៅក្បែរព្រំដែនរុស្ស៊ី។
លោក ឡាវរូវ បានបន្ថែមទៀតថា ប្រធានាធិបតីរុស្ស៊ីលោក វ្ល៉ាឌីមៀ ពូទីន ថ្មីៗនេះបាននិយាយតាមទូរស័ព្ទជាមួយមេដឹកនាំនៃបណ្តាប្រទេសនៅអាមេរិកឡាទីន រួមមានគុយបា វេណេហ្ស៊ុយអេឡា និងនីការ៉ាហ្គា។ លោក ឡាវរូវ បានបញ្ជាក់ទៀតថា លោក ពូទីន បានពង្រឹងភាពជាដៃគូយុទ្ធសាស្ត្រជាមួយប្រទេសទាំងនេះក្នុងវិស័យផ្សេងៗដូចជាសេដ្ឋកិច្ច និងបច្ចេកវិទ្យាយោធាជាដើម៕ ប្រភព៖ NHK
