យោធាមីយ៉ាន់ម៉ាថាខ្លួនមិនមានគម្រោងរំលាយគណបក្សអ្នកស្រីអ៊ុងសាន ស៊ូជីនោះទេ
រដ្ឋអំណាចយោធាមីយ៉ាន់ម៉ាមិនមានគម្រោងក្នុងការរំលាយគណបក្សសម្ព័ន្ធជាតិដើម្បីប្រជាធិបតេយ្យ (NLD) ដែលជាគណបក្សដឹកនាំដោយអ្នកស្រី អ៊ុងសាន ស៊ូជី នោះទេ។ នេះបើតាមការលើកឡើងកាលពីពេលថ្មីៗនេះរបស់អ្នកនាំពាក្យកំពូលរបស់យោធាមីយ៉ាន់ម៉ាលោក Zaw Min Tun។
ឧត្ដមសេនីយ៍ទោរូបនេះបានប្រាប់សារព័ត៌មានជប៉ុននីកេថា៖ «យើងមិនមានផែនការក្នុងការរំលាយ [គណបក្ស NLD] រហូតដល់ការបោះឆ្នោតខែសីហា ឆ្នាំ២០២៣ទេ»។ ជាមួយគ្នានេះដែរ លោកក៏បានកត់សម្គាល់ថា ការសម្រេចចិត្តនេះគឺផ្អែកលើការចាត់ចែងរបស់គណៈកម្មាធិការរៀបចំការបោះឆ្នោត។
បន្ថែមពីនេះដែរ លោកក៏បានគូសបញ្ជាក់ថា គណបក្ស NLD ជាអ្នកសម្រេចចិត្តដោយខ្លួនឯងក្នុងការចូលរួមការបោះឆ្នោតនៅឆ្នាំ២០២៣។
កាលពីខែសីហា ឆ្នាំមុន លោក មីន អ៊ុងឡាំង ប្រមុខយោធាមីយ៉ាន់ម៉ាបានប្រកាសតែងតាំងខ្លួនឯងជានាយករដ្ឋមន្ត្រីនៃរដ្ឋាភិបាលបណ្ដោះអាសន្ននៃប្រទេសនេះ ហើយកំណត់យកឆ្នាំ២០២៣ ជាពេលវេលានៃការបោះឆ្នោត។
ការបោះឆ្នោតនេះគឺផ្អែកតាមរដ្ឋធម្មនុញ្ញឆ្នាំ២០០៨ ដែលបម្រុងទុកកៅអី ២៥% នៅសភាជាន់ទាប និងជាន់ខ្ពស់ទុកសម្រាប់បេក្ខជនមកពីខាងយោធា ហើយយោធានៅតែកាន់កាប់ក្រសួងសំខាន់ៗដូចជា ក្រសួងការពារជាតិ ក្រសួងមហាផ្ទៃ និងក្រសួងកិច្ចការព្រំដែន។ នេះបើតាមការលើកឡើងរបស់លោក មីន អ៊ុងឡាំងកាលពីឆ្នាំមុន។
ការរំលាយគណបក្ស NLD ជាជម្រើសមួយដែលក្នុងរង្វង់រដ្ឋាភិបាលយោធាគិតគូរចាប់តាំងពីព្រឹត្តិការណ៍រដ្ឋប្រហារខែកុម្ភៈ ឆ្នាំ២០២១មកម្ល៉េះ។ យោធាមីយ៉ាន់ម៉ាបានយោងហេតុផលថា រដ្ឋាភិបាលស៊ីវិលដែលដឹកនាំដោយគណបក្ស NLD ជាអ្នកបង្កឱ្យមានការលួចបន្លំសន្លឹកឆ្នោត និងជ្រៀតជ្រែកដល់គណៈកម្មាធិការរៀបចំការបោះឆ្នោតសហព័ន្ធមីយ៉ាន់ម៉ា (UEC)។
ជាក់ស្ដែងកាលពីប្រជុំរវាងគណបក្សនយោបាយនៅមីយ៉ាន់ម៉ា ប្រធាន UEC ដែលតែងតាំងដោយយោធាមីយ៉ាន់ម៉ា លោក Thein Soe បានលើកឡើងថា ខាង UEC កំពុងតែគិតគូរក្នុងការរំលាយគណបក្ស NLD។ នេះបើតាមការចុះផ្សាយរបស់សារព័ត៌មានក្នុងស្រុកមីយ៉ាន់ម៉ា។
យ៉ាងណាមិញ សារព័ត៌មាននីកេបានស្រង់យកប្រភពពីអ្នកការទូតនៅទីក្រុងយ៉ាំងហ្គនថា៖ «ផែនការដំបូងគឺចង់រំលាយគណបក្ស NLD តែខាងរដ្ឋាភិបាលហាក់ដូចជាគិតគូរថាផ្អាកការសម្រេចចិត្តនេះ ហើយគិតរឿងអីផ្សេងទៀត។ ម្យ៉ាងទៀត មន្ត្រីជាន់ខ្ពស់របស់គណបក្ស NLD ត្រូវបានចាប់ខ្លួនអស់ហើយ ដូច្នេះការរំលាយបក្សនេះមិនផ្ដល់លទ្ធផលជាដុំកំភួននោះទេ»។
សមាជិក NLD ចំនួន ៦៤៩រូបត្រូវបានចាប់ខ្លួន ហើយក្រោយមក ១៤៦នាក់ត្រូវបានដោះលែង ខណៈ ១៤នាក់បានបាត់បង់ជីវិត។ ដូច្នេះហើយនៅក្បែរ ៥០០នាក់ទៀតនៅកំពុងឃុំខ្លួន និងជាប់នៅក្នុងនីតិវិធីតុលាការ។ ចំណោមនោះដែរក៏មានអ្នកស្រី អ៊ុងសាន ស៊ូជី ផងដែរ ដោយនៅពេលនេះអ្នកស្រីជាប់ទោស ៦ឆ្នាំ ហើយនៅសល់ជាង ១០ករណីទៀត ដែលមិនទាន់កាត់ទោស។
អ្វីដែលគួរឱ្យចាប់អារម្មណ៍នោះគឺ អ្នកនាំពាក្យយោធាមីយ៉ាន់ម៉ាខាងលើបានធ្វើការបែងចែកថា នៅក្នុងចំណោមអ្នកនយោបាយគណបក្ស NLD មានអ្នកជំហរប្រឆាំងដាច់ខាត និងអ្នកជំហរ «កណ្ដាល»។
លោក Zaw Min Tun បានអះអាងថា សមាជិក NLD តែ ១ ភាគ ៤ ប៉ុណ្ណោះបានចូលរួមជាមួយរដ្ឋាភិបាលរួបរួមជាតិមីយ៉ាន់ម៉ា (NUG) ដែលជារដ្ឋាភិបាលស្រមោល ហើយត្រូវបានក្រុមយោធាចាត់ទុកថាជា «អង្គការភេរវកម្ម»។
«ក្រៅពីនេះគឺប្រកាន់ខ្ជាប់នូវគោលនយោបាយក្នុងការធ្វើការប្រកបដោយសន្តិភាព»។ នេះបើតាមការបន្តបន្ថែមរបស់អ្នកនាំពាក្យរូបនេះ។
អ្នកជំហរ «កណ្ដាល» មកពីបក្ស NLD នឹងត្រូវបានអនុញ្ញាតឱ្យចូលជាមួយគណៈប្រតិភូរបស់អាស៊ាន។ នេះបើតាមការឱ្យដឹងពីអ្នកនាំពាក្យយោធាមីយ៉ាន់ម៉ា។ នេះអាចជាការប្ដេជ្ញាចិត្តរបស់ខាងយោធាក្នុងការអនុវត្តគោលការណ៍ព្រមព្រៀងជាឯកច្ឆន្ទចំនួន ៥ចំណុច ដែលដាក់ចេញដោយមេដឹកនាំអាស៊ានកាលពីប្រជុំក្រៅផ្លូវការនៅទីក្រុងហ្សាការតា កាលពីខែមេសា ឆ្នាំ២០២១។
សារព័ត៌មានក្នុងស្រុកមីយ៉ាន់ម៉ាមួយចំនួនបានចំនួនបានចុះផ្សាយ ភាគីចិនបានផ្ដល់យោបល់ថា ការរំលាយគណបក្ស NLD អាចនឹងបង្កអស្ថិរភាពកាន់តែខ្លាំង។
ជាមួយនឹងចំណុចនេះ លោក Zaw Min Tun បញ្ជាក់ថាចិនពិតជាផ្ដល់យោបល់ដូច្នេះមែន តែប្រទេសផ្សេងក៏ផ្ដល់មតិស្រដៀងគ្នានេះដែរ។
យ៉ាងណាមិញ អ្នកតាមដានមួយចំនួនយល់ថា ស្ថានភាពនៅមីយ៉ាន់ម៉ាបានដើរចេញពីការប្រជែងគ្នារវាងអ្នកស្រី អ៊ុងសាន ស៊ូជី និងយោធាមីយ៉ាន់ម៉ាហើយនៅពេលបច្ចុប្បន្ននេះ។
អតីតទីប្រឹក្សារដ្ឋាភិបាល និងសភាមីយ៉ាន់ម៉ាលោក Philipp Annawitt បានសរសេរនៅក្នុងគេហទំព័រ The Diplomat កាលពីពេលថ្មីៗនេះថា៖ «សហគមន៍អន្តរជាតិត្រូវតែយល់ថា កម្លាំងប្រឆាំងចាស់របស់អ្នកស្រី អ៊ុងសាន ស៊ូជី ទល់នឹងក្រុមឧត្ដមសេនីយ៍ មិនមែនជាការបកស្រាយត្រឹមត្រូវទៀតឡើយអំពីស្ថានភាពនៅមីយ៉ាន់ម៉ា»។
លោក Annawitt យល់ឃើញថា រដ្ឋាភិបាលស្រមោល NUG ក៏ដូចជាកងកម្លាំងរបស់ខ្លួន និងសម្ព័ន្ធមិត្តក៏ដូចជា អង្គការប្រដាប់អាវុធជនជាតិភាគតិច ជាតួអង្គជំរុញដ៏សំខាន់មួយនៅក្នុងស្ថានភាពនយោបាយមីយ៉ាន់ម៉ា៕
ប្រភព៖ Nikkie Asia
