សហរដ្ឋអាមេរិកសម្តែងការព្រួយបារម្ភថា កូរ៉េខាងជើងវិលត្រឡប់ទៅរកការសាកល្បងនុយក្លេអ៊ែរនិងមីស៊ីលផ្លោងឆ្លងទ្វីប ICBM ឡើងវិញ
វ៉ាស៊ីនតោន៖ នៅថ្ងៃអាទិត្យម្សិលមិញ មន្ត្រីជាន់ខ្ពស់អាមេរិកមួយរូបនិយាយថា ប្រទេសរបស់ខ្លួនព្រួយបារម្ភថា ការធ្វើតេស្តមីស៊ីលជាបន្តបន្ទាប់របស់កូរ៉េខាងជើង អាចជាសញ្ញាប្រាប់ឱ្យដឹងមុនអំពីការបន្តការសាកល្បងអាវុធនុយក្លេអ៊ែរនិងមីស៊ីលផ្លោងអន្តរទ្វីប ដោយជំរុញឱ្យទីក្រុងព្យុងយ៉ាងចូលរួមការចរចាដោយផ្ទាល់ដោយគ្មានបុរេលក្ខខណ្ឌ។
មន្ត្រីជាន់ខ្ពស់នៃរដ្ឋបាលលោក ចូ បៃដិន រូបនោះ បាននិយាយយ៉ាងដូច្នេះថា យើងច្បាស់ណាស់ គឺមិនចង់ឃើញការសាកល្បងបន្ថែមទៀតទេ ហើយយើងសូមអំពាវនាវដល់កូរ៉េខាងជើងអោយទប់អារម្មណ៍ខ្លួនឯងកុំសាកល្បងអាវុធបន្ថែមទៀត។ បើតាមមន្រ្តីដដែលនេះ ការបាញ់សាកល្បងចុងក្រោយនេះបានធ្វើឱ្យកូរ៉េខាងជើងឈានមួយជំហានកាន់តែខិតជិតការលុបចោលទាំងស្រុងនូវការផ្អាកដែលប្រកាសដោយខ្លួនឯងអំពីការសាកល្បងមីស៊ីលផ្លោងឆ្លងទ្វីបរយៈចម្ងាយឆ្ងាយបំផុតរបស់ខ្លួន (ICBMs) ដែលខ្លួនមិនបានសាកល្បងតាំងពីឆ្នាំ ២០១៧។
គួរបញ្ជាក់ថា ស្ថិតក្រោមការដឹកនាំរបស់លោក ចូ បៃដិន សហរដ្ឋអាមេរិកបានស្វែងរកការចរចាជាមួយកូរ៉េខាងជើងម្តងហើយម្តងទៀត ប៉ុន្តែទីក្រុងព្យុងយ៉ាងទាមទារអោយអាមេរិកទម្លាក់ចោលគោលនយោបាយអរិភាព រួមទាំងការបន្ធូរបន្ថយទណ្ឌកម្ម មុនខ្លួនបន្តការចរចា តែទីក្រុងវ៉ាស៊ីនតោននៅរក្សាការដាក់ទណ្ឌកម្មលើកូរ៉េខាងជើងដដែល៕ ប្រភព៖ CNA
