សៀមរាប៖ នៅព្រឹកថ្ងៃ ទី ២៩ ខែវិច្ឆិកា ឆ្នាំ២០១៩ លោក ង៉ាន់ ភិរុណ អភិបាលរងខេត្ត តំណាងឯកឧត្តម  ទៀ  សីហា  អភិបាល  នៃគណៈអភិបាលខេត្ត សៀមរាប បានដឹកនាំកិច្ចប្រជុំពិនិត្យ ពិភាក្សា  ដេីម្បីត្រៀមកំណត់ទីតាំង  និងគ្រប់គ្រងរោងសន្និធិលក់ចែកចាយផល អនុផលព្រៃឈេីប្រភេទធំ ដែលមានប្រភពពីដីសម្បទាន ក្រោមរូបភាពជា  ច្រកចេញចូលតែមួយ ដេីម្បីឱ្យប្រជាជនមានឈេីប្រេីប្រាស់ដោយមិនធ្វេីការដឹកជញ្ជូនឆ្ងាយពេក និងមានការចូលរួមពីលោក  លោកស្រី  អភិបាល អភិបាលរងក្រុង  ស្រុកទាំង  ១២  តំណាងមន្ទីរ -អង្គភាពពាក់ព័ន្ធ  កងកម្លាំងប្រដាប់អាវុធទាំង៣  និងការិយាល័យជំនាញ  នៃទីចាត់ការអន្តរវិស័យសាលាខេត្ត បានអញ្ជើញចូលរួមជាច្រើននាក់ផងដែរ។

លោក ង៉ាន់ ភិរុន អភិបាលរងខេត្តសៀមរាប បានមានប្រសាសន៍ថា៖ ការប្រជុំនេះ គឺក្នុងគោលបំណង នៃកិច្ចប្រជុំ ដេីម្បីពិនិត្យ  និងពិភាក្សា ពាក់ព័ន្ធនឹងលិខិតលេខ  ១៤០៣  សជណ.កធ  ចុះថ្ងៃសុក្រ  ៧រោច  ខែភទ្របទ  ឆ្នាំកុរ  ឯកស័ក  ព.ស  ២៥៦៣  ត្រូវថ្ងៃទី២០  ខែកញ្ញា  ឆ្នាំ២០១៩  របស់ទីស្តីការគណ:រដ្ឋមន្រ្តី  ដែលបានទទួលការយល់ព្រមពីរាជរដ្ឋាភិបាលដូចខាងក្រោមៈ

១.អនុញ្ញាតឱ្យបង្កេីតរោងសន្និធិលក់ចែកចាយផល អនុផលព្រៃឈេីប្រភេទធំ  (ច្រកចេញចូលតែមួយ)  ចំនួន  ១កន្លែងនៅតាមរាជធានី ខេត្តនីមួយៗទូទាំងប្រទេស ដែលមានទីតាំងស្ថិតនៅជិតទីប្រជុំជនរាជធានីខេត្ត។ រោងសន្និធិលក់ចែកចាយផល អនុផលព្រៃឈេីប្រភេទធំ លក់ចែកចាយផល  អនុផលព្រៃឈេីទៅឱ្យរោងសន្និធិលក់ចែកចាយផល អនុផលព្រៃឈេីផ្សេងៗទៀតនៅក្នុងរាជធានី ខេត្តនោះ។ ការអនុញ្ញាតឱ្យបង្កេីតរោងសន្និធិលក់ចែកចាយផល អនុផលព្រៃឈេីប្រភេទធំ (ច្រកចេញចូលតែមួយ)  ត្រូវកំណត់ដោយប្រកាសរបស់ក្រសួងកសិកម្ម រុក្ខាប្រមាញ់ និងនេសាទ។

២.ជូនក្រសួងកសិកម្ម រុក្ខាប្រមាញ់ និងនេសាទ រដ្ឋបាលព្រៃឈើ សហការជាមួយគណៈបញ្ជាការឯកភាពរដ្ឋបាលរាជធានី ខេត្ត រៀបចំផែនការប្រើប្រាស់ផល អនុផលព្រៃឈើ (កំណត់ក្រុមហ៊ុនសម្បទានដីសេដ្ឋកិច្ចត្រូវផ្គត់ផ្គង់ឈើ និងតម្រូវការប្រើប្រាស់ឈើរបស់រាជធានី ខេត្ត) ដែលមានប្រភពពីសម្បទានដីសេដ្ឋកិច្ច ដើម្បីចែកចាយឲ្យរោងសន្និធិលក់ចែកចាយផល អនុផលព្រៃឈើប្រភេទធំ (ច្រកចេញចូលតែមួយ) នៅតាមបណ្តារាជធានី ខេត្ត។

៣.យើងត្រូវលុបបំបាត់ចោល និងមិនអនុញ្ញាតឲ្យបង្កើតរោងសន្និធិលក់ចែកចាយផល អនុផលព្រៃឈើនៅតាមព្រំដែន នៃព្រះរាជាណាចក្រកម្ពុជា។

លោក ង៉ាន់ ភិរុន បានបញ្ជាក់ថា៖ ជាលទ្ធផល  អង្គប្រជុំបានសម្រេចឯកភាពគ្នាដូចខាងក្រោម  :

១.បង្កេីតរោងសន្និធិលក់ចែកចាយផល  អនុផលព្រៃឈេីប្រភេទធំ  (ច្រកចេញចូលតែមួយ)  ចំនួន  ១កន្លែងក្នុងខេត្ត។

២.ស្នេីសុំគោលការណ៍ពីក្រសួង  ដេីម្បីបង្កេីតរោងសន្និធិលក់ចែកចាយផល  អនុផលព្រៃឈេីមួយចំនួន  នៅតាមបណ្តាក្រុង  ស្រុក តាមការចាំបាច់៕ធ.ដ

ដោយ ស៊ាន សុផាត