ឯកឧត្តម ជុំ កុសល រដ្ឋលេខាធិការក្រសួងព័ត៌មាន និងជាទីប្រឹក្សាផ្ទាល់សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា ពានរង្វាន់បាល់ទាត់វ័យចាស់ បង្កើតឡើង ដើម្បីប្រមូលផ្ដុំ និងជួបជុំគ្នាសប្បាយរីករាយក្រោមម្លប់សន្ដិភាព តាមរយៈកីឡា នេះជាការបញ្ជាក់នៅក្នុងសន្និសីទសារព័ត៌មាន និងពិធីចាប់ពូលការប្រកួតបាល់ទាត់ពានរង្វាន់វ័យចាស់ អបអរសាទរទិវាជ័យជម្នះ ៧មករា ខួបលើកទី៤១ ឆ្នាំ២០២០ ជាមួយនឹងក្រុមចូលរួមប្រកួត មានការកើនឡើងកាន់ច្រើន ដើម្បីឆ្លើយតបនឹងការវិវត្តន៍ និងភាពរីកចម្រើនរបស់កម្ពុជានាពេលបច្ចុប្បន្ន ។

ឯកឧត្តម ជុំ កុសល បញ្ជាក់បន្ថែមថា ពានវ័យចាស់ឆ្នាំនេះ គឺជាការវិវត្តន៍ថ្មីមួយ ដែលក្រុម សម្ព័ន្ធយុវជនស្រលាញ់សន្តិភាព និងដៃគូសហការ បានពង្រីកព្រឹត្តិការណ៍ឲ្យធំ ស្របតាមកំណើន សេដ្ឋកិច្ចជាតិ និងភាពរីកចម្រើនរបស់ប្រទេសជាតិ ក៏ដូចជាបំផុសសកម្មភាពលេងកីឡាផងដែរ ដើម្បីឲ្យស្របតាមការវិវត្តន៍សម័យកាលរបស់ជាតិ ហើយការរៀបចំ របស់យើងឆ្នាំនេះ គឺមានវិសាលភាពធំជាងរាល់ឆ្នាំ ដោយមានរហូតដល់ ៩ក្រុមចូលរួម» ។

តាមរយៈការរៀបចំនេះដែរ លោករំពឹងនឹងរួមចំណែកក្នុងការអភិវឌ្ឍវិស័យកីឡាជាតិ ដើម្បី ដំណើរឆ្ពោះទៅស៊ីហ្គេម ឆ្នាំ២០២៣ ផងដែរ ។ លោកថា «ការរៀបចំមានអត្ថន័យសំខាន់ គឺយើងរៀបចំ អបអរទិវាជ័យជម្នះ ៧មករា ខួបលើកទី៤១ ផង យើងជួយជំរុញវិស័យកីឡាបាល់ទាត់ផង។

ឯកឧត្តម ជុំ កុលស បញ្ជាក់ថា កត្ដាសំខាន់មួយទៀត គឺខ្ញុំចង់ប្រមូលផ្ដុំ និងជួបជុំគ្នាសប្បាយក្រោមម្លប់សន្ដិភាព តាមរយៈកីឡា ។ ខ្ញុំគិតថា ក្មេងៗគាត់ឃើញចាស់ៗលេង គាត់ក៏មានទឹកចិត្តលេងដែរ ដល់ចឹងក្ដីរំពឹងលើស៊ីហ្គេម ឆ្នាំ២០២៣ គឺពឹងលើក្មេងៗ ឯចាស់ៗលេងជាការជំរុញទឹកចិត្តគាត់ផង និងប្រយោជន៍សុខភាពផងប៉ុណ្ណោះ»។

សូមបញ្ជាក់ថា ការប្រកួតបាល់ទាត់ពានរង្វាន់វ័យចាស់ អបអរសាទរទិវាជ័យជម្នះ ៧មករា ខួបលើកទី៤១ ឆ្នាំ២០២០ មាន៩ក្រុមចូលរួម ចែកចេញជា២ពូល ពូលA ក្រុមសម្ព័ន្ធយុវជនស្រលាញ់សន្ដិភាព ក្រុមពួកម៉ាកយូណាយធីត ក្រុមស.ស.យ.ក ខេត្តព្រៃវែង និងក្រុម 7NG សម្រាប់ពូល B វិញ មានក្រុមមហាហ្សង  ក្រុម 7 CLEAN LAUNDRY ក្រុម Master FC ក្រុមមេធាវី-រ៉ូយ៉ាល់ និងក្រុម SCS FT ។ ចំពោះការប្រកួតនឹងចាប់ផ្ដើមពីថ្ងៃទី០២-ធ្នូ ដល់ថ្ងៃទី០៧ ខែមករា ឆ្នាំ២០២០ នៅកីឡដ្ឋានវេស្ទើន ៕ធ.ដ