វៀតណាមជំរុញក្រុមហ៊ុន ភីហ្វៃហ្សឺ (Pfizer) បញ្ជូនវ៉ាក់សាំង ២២លានដូស ឲ្យបានឆាប់ ដើម្បីចាក់ជូនកុមារ អាយុចាប់ពី៥ទៅ ១២ឆ្នាំ ខណៈការឆ្លងប្រចាំថ្ងៃហក់ឡើងយ៉ាងគំហុក។ នាយករដ្ឋមន្ត្រីវៀតណាម ផាម មិញជិញ បានស្នើដល់ប្រធានក្រុមហ៊ុន គឺលោក អាល់បឺត ប៊ូរឡា (Albert Bourla) ពន្លឿនការចែកចាយវ៉ាក់សាំង ២២លានដូស សម្រាប់កុមារ អាយុចាប់ពី៥ទៅ ១២ឆ្នាំ ឲ្យបានក្នុងពេលប៉ុន្មានថ្ងៃទៀត ជាមួយនឹងគោលដៅបញ្ជូនទៅតាមកិច្ចសន្យា ឲ្យរួចរាល់ ត្រឹមខែឧសភា ។

លោកនាយករដ្ឋមន្ត្រីបានប្រាប់ភាគីក្រុមហ៊ុន តាមទូរស័ព្ទបែបនេះកាលពីយប់ថ្ងៃទី១៥ កុម្ភៈ ដោយលោកបានផ្តោតលើការការពារកុមារ ខណៈវៀតណាមបានបើកសាលារៀនឡើងវិញទ្រង់ទ្រាយធំ។ ការជំរុញនេះបានធ្វើឡើង ខណៈដែលវៀតណាមបន្តឆ្លងប្រចាំថ្ងៃ កើនឡើងយ៉ាងគំហុក ក្នុងនោះប៉ុន្មានថ្ងៃចុងក្រោយនេះ ឆ្លងប្រចាំថ្ងៃ សុទ្ធតែជាង ៣ម៉ឺននាក់។ គិតត្រឹមព្រឹកថ្ងៃទី១៧ កុម្ភៈ ក្រសួងសុខាភិបាល វៀតណាម ថា ប្រទេសនេះមានអ្នកកើតកូវីដ សរុបកើនដល់ ២.៦០៦.៨២៤នាក់ អ្នកស្លាប់ ៣៩.១៨៨នាក់ ៕ សារ៉ាត