លោក Macron បន្តរកដំណោះស្រាយការទូតនៅអ៊ុយក្រែន ក្នុងកិច្ចសន្ទនាទូរស័ព្ទជាមួយលោក Putin
ប៉ារីស៖ ប្រធានាធិបតីបារាំងលោក Emmanuel Macron និងសមភាគីរុស្ស៊ីលោកប្រធានាធិបតីវ្ល៉ាឌីមៀ ពូទីន (Vladimir Putin) បានយល់ព្រមគ្នាលើតម្រូវការដើម្បីផ្តល់អាទិភាពដល់ដំណោះស្រាយការទូតចំពោះវិបត្តិអ៊ុយក្រែន តាមរយៈកិច្ចសន្ទនាតាមទូរស័ព្ទកាលពីថ្ងៃអាទិត្យសប្ដាហ៌មុននេះ។
សេចក្តីថ្លែងការណ៍នៃការិយាល័យលោក Macron ចេញផ្សាយក្រោយកិច្ចសន្ទនារៀបរាប់ថា៖ «ប្រសិនបើលក្ខខណ្ឌត្រូវបានបំពេញ ផ្លូវការទូតគួរតែអនុញ្ញាតឱ្យមានការរៀបចំកិច្ចប្រជុំនៅកម្រិតខ្ពស់បំផុត ដើម្បីកំណត់សន្តិភាពនិងសណ្តាប់ធ្នាប់ថ្មីនៅអឺរ៉ុប»។
យ៉ាងណាមិញ វិមានក្រឹមឡាំងបានបង្ហាញពីសុទិដ្ឋិនិយមតិចតួចចំពោះដំណោះស្រាយនេះ។ សេចក្តីថ្លែងការណ៍ចេញផ្សាយក្រោយការហៅទូរស័ព្ទដូចគ្នានោះនិយាយថា លោក Putin បានលើកឡើងម្តងទៀតនូវការជជែកវែកញែករបស់លោកដែលថា បណ្តាប្រទេសលោកខាងលិចកំពុងជំរុញរដ្ឋាភិបាលអ៊ុយក្រែនឱ្យមានដំណោះស្រាយដោយយោធា នៃជម្លោះរបស់ខ្លួនជាមួយពួកបំបែកខ្លួនដែលគាំទ្រដោយរុស្ស៊ីនៅភាគខាងកើត។
ជាមួយគ្នានោះ រដ្ឋាភិបាលអ៊ុយក្រែនទទូចថា ខ្លួនមិនមានគម្រោងបើកការវាយលុកប្រឆាំងនឹងពួកបំបែកខ្លួននោះទេ ប៉ុន្តែមេដឹកនាំផ្តាច់ខ្លួននៃតំបន់ដុនបាសកាលពីចុងសប្តាហ៍មុន បានចាប់ផ្តើមធ្វើការជម្លៀសស្ត្រី និងកុមារ ដោយអះអាងថា ការវាយលុកបែបនេះនឹងកើតមាន ខណៈដែលមានសេចក្ដីរាយការណ៍ថាមានការបំផ្ទុះកើតឡើងជាច្រើនកន្លែងនៅក្រុងនានាក្នុងតំបន់។
បន្ទាប់ពីការហៅទូរស័ព្ទជាមួយលោក Putin លោក Macron និយាយជាមួយលោក Volodymyr Zelensky ប្រធានាធិបតីអ៊ុយក្រែន ហើយសរសើរពីភាពស្ងប់ស្ងាត់ និងការប្តេជ្ញាចិត្តរបស់លោក Zelensky ក្នុងការទប់ស្កាត់ការកើនឡើងភាពតានតឹង។
ក្នុងការហៅទូរស័ព្ទដដែល លោក Macron និងលោក Putin ក៏បានយល់ព្រមបន្តការងារការទូតឡើងវិញនៅក្នុងកិច្ចចរចាទម្រង់ Normandy ដែលជាបណ្តាញចរចាមួយដែលបង្កើតឡើងកាលពី៧ឆ្នាំមុន ដោយបារាំង អាល្លឺម៉ង់ រុស្ស៊ី និងអ៊ុយក្រែន ដើម្បីដោះស្រាយបញ្ហាជម្លោះក្នុងតំបន់នៃភាគខាងកើតអ៊ុយក្រែន។ រដ្ឋមន្ត្រីការបរទេសបារាំង និងរុស្ស៊ី ក៏នឹងជួបប្រជុំគ្នានៅប៉ុន្មានថ្ងៃខាងមុខផងដែរ។
ប្រភព៖ New York Times
