អតីតនាយករដ្ឋមន្ត្រីម៉ាឡេស៊ីអំពាវនាវកុំឱ្យប្រជាជនរដ្ឋចូហូរ បោះឆ្នោតឱ្យបក្សកាន់អំណាច
អតីតនាយករដ្ឋមន្ត្រីម៉ាឡេស៊ី លោក មហាធៀរ មហាម៉ាត់បានធ្វើការអំពាវនាវតាមរយៈលិខិតចំហរទៅកាន់ប្រជាជនរដ្ឋចូហូរ (Johor) ដែលនឹងបោះឆ្នោតថ្នាក់រដ្ឋនៅខែក្រោយនេះ កុំឱ្យបោះឆ្នោតគាំទ្រដល់សម្ព័ន្ធគណបក្សកាន់អំណាចរណសិរ្សជាតិ (BN) និងគណបក្សអង្គការរួបរួមជាតិម៉ាឡេ ដែលហៅកាត់ថា អ៊ុមណូ (UMNO)។
លោកបានចេញលិខិតចំហចំនួន ២ច្បាប់ ដោយលើកទី១ នៅថ្ងៃអង្គារសប្ដាហ៍មុន និងលើកទី២ នៅថ្ងៃសៅរ៍។
នៅក្នុងសារនយោបាយទាំង ២នេះ លោកមហាធៀរបានចាត់ទុកថា ការបោះឆ្នោតឱ្យសម្ព័ន្ធ BN និងគណបក្សអ៊ុមណូជាការផ្ដល់អំណាចឱ្យក្រុមរបស់អតីតនាយករដ្ឋមន្ត្រី ណាជីព រ៉ាហ្សាក់ ដែលលោកមហាធៀរចាត់ទុកថាជាក្រុមលួចជាតិ តាមរយៈរឿងអាស្រូវមូលនិធិវិនិយោគសាធារណៈម៉ាឡេស៊ី 1MDB។
រឿងអាស្រូវ 1MDB នេះគឺពាក់ព័ន្ធនឹងអំពើពុករលួយទ្រង់ទ្រាយធំមួយ ដែលក្រសួងយុត្តិធម៌អាមេរិកចោទថា មន្ត្រីជាច្រើនក្នុងជួររដ្ឋាភិបាលលោក រ៉ាហ្សាក់ លួចលុយវិនិយោគសាធារណៈចំនួន ៤,៥ប៊ីលានដុល្លារ។
លោក មហាធៀរបានសរសេរនៅក្នុងសំបុត្រលើកទី២ថា៖ «គេ [លោក ណាជីព] ត្រូវតែបញ្ឈប់។ ប្រសិនជាគេមកវិញ នោះមានន័យថា ប្រទេសនឹងគ្រប់គ្រងដោយក្រុមលួចជាតិ»។
ស្របពេលដែលក្រុមប្រឆាំងកំពុងតែបែកបាក់ គេរំពឹងថាគណបក្សអ៊ុមណូអាចនឹងឈ្នះឆ្នោតនៅរដ្ឋចូហូរ។ កាលពីខែវិច្ឆិកាកន្លងទៅ លោក ណាជីព បានជួយឃោសនាឱ្យអ៊ុមណូឈ្នះនៅរដ្ឋម៉ាឡាកា។
ប្រសិនបើឈ្នះរដ្ឋចូហូរមួយទៀត មតិមួយចំនួនធ្វើការព្យាករថា ម៉ាឡេស៊ីនឹងមានការបោះឆ្នោតសកលមុនអាណត្តិ ហើយគណបក្សកាន់អំណាចរាប់ទសវត្សអ៊ុមណូ នឹងត្រលប់ត្រឡប់វិញជាផ្លូវការ៕
ប្រភព៖ The Straits Times
