រដ្ឋបាលលោកបៃដិនព្យាយាមបញ្ចុះបញ្ចូលដៃគូនៅអាស៊ីឱ្យដាក់ទណ្ឌកម្មសេដ្ឋកិច្ចទៅលើរុស្ស៊ី
រដ្ឋបាលលោកប្រធានាធិបតីសហរដ្ឋអាមេរិក ចូ បៃដិន កំពុងតែស្ថិតក្នុងដំណាក់កាលពិភាក្សាជាមួយដៃគូសំខាន់ៗនៅក្នុងតំបន់អាស៊ី ដែលរួមមាន ជប៉ុន តៃវ៉ាន់ និងសិង្ហបុរី ដើម្បីដាក់ទណ្ឌកម្មសេដ្ឋកិច្ចទៅលើរុស្ស៊ី ស្របពេលដែលមានភាពតានតឹងកាន់តែខ្លាំងឡើងៗនៅអ៊ុយក្រែន។ នេះបើតាមការចុះផ្សាយរបស់ព្រឹត្តិបត្រព័ត៌មាន Foreign Policy។
ស្ថានភាពនៅអ៊ុយក្រែនតានតឹងដល់ថ្នាក់មានការប៉ះទង្គិចគ្នារវាងរុស្ស៊ី និងអ៊ុយក្រែនដោយផ្ទាល់តែម្ដង ក្រោយពេលដែលលោក វ្ល៉ាឌីមៀរ ពូទីន ប្រកាសឱ្យមាន «ប្រតិបត្តិការយោធា» នៅព្រឹកព្រហាមថ្ងៃព្រហស្បតិ៍ (ម៉ោងនៅរុស្ស៊ី)។ ទីក្រុងគៀវ រដ្ឋធានីអ៊ុយក្រែនរងការវាយប្រហារផ្លូវអាកាស ខណៈរដ្ឋាភិបាលអ៊ុយក្រែនដាក់ប្រទេសក្នុងគ្រាអាសន្ន។
ការវាយប្រហារទាំងនេះធ្វើឡើងបន្ទាប់ពីរុស្ស៊ីប្រកាសទទួលស្គាល់តំបន់ផ្ដាច់ខ្លួនចំនួន ២ នៅអ៊ុយក្រែន ហើយមហាអំណាចមួយនេះបានលើកទ័ពចូលទៅកាន់តំបន់ទាំងពីរនេះ ដើម្បី «រក្សាសន្តិភាព»។
ឆ្លើយតបនឹងស្ថានការណ៍នេះដែរ អាមេរិកបាន ជាមួយអង់គ្លេស និងប្រទេសសម្ព័ន្ធមិត្តមួយចំនួនបានដាក់ទណ្ឌកម្មលើឥស្សរជនរុស្ស៊ីជាប់ពាក់ព័ន្ធនឹងលោកពូទីនជាច្រើនរយនាក់។ ក្រៅពីបបួលប្រទេសអឺរ៉ុប នៅពេលនេះអាមេរិកក៏ចាប់ផ្ដើមបញ្ចុះបញ្ចូលជាមួយប្រទេសអាស៊ីផងដែរ។
បើយោងតាមប្រភពខាងលើ អាមេរិកមានបំណងសហការជាមួយប្រទេស/ដែនដីទាំង ៣ខាងលើនេះ ក្នុងគោលបំណងរឹតត្បិតការនាំចេញផលិតផលបន្ទះឈីប ឈីបកុំព្យូទ័រ ក៏ដូចជាផលិតបច្ចេកវិទ្យានានា ទៅកាន់ប្រទេសរុស្ស៊ី ជាមួយនឹងគោលដៅក្នុងការធ្វើទុក្ខបុកម្នេញទៅដល់សេដ្ឋកិច្ច និងវិស័យបច្ចេកវិទ្យារបស់រុស្ស៊ី។
ព្រឹត្តិបត្រ Foreign Policy បានចុះផ្សាយថា ទណ្ឌកម្មនេះអាចមានប្រសិទ្ធភាពជាងទណ្ឌកម្មជាប្រពៃណី ដែលមានដូចជាការបង្កកទ្រព្យសម្បត្តិ ហាមឃាត់មិនឱ្យចូលក្នុងប្រទេសខ្លួនជាដើម ហើយប្រសិនបើទណ្ឌកម្មនេះអាចអនុវត្តបាន នោះគេអាចបិទខ្ទប់រុស្ស៊ីពីការនាំចូលបច្ចេកវិទ្យា ដែលមានសារៈសំខាន់សម្រាប់ផលិតកម្មប្រេង និងឧស្ម័ន ក៏ដូចជាវិស័យនាវាចរណ៍ផ្លូវសមុទ្រ វិស័យការពារជាតិ និងផលិតកម្មផ្សេងៗដូចជា ការផលិតយន្តហោះ រថយន្ត និងទូរស័ព្ទជាដើម។
កាលពីថ្ងៃពុធកន្លងទៅ ជប៉ុនបានប្រកាសដាក់ទណ្ឌកម្មរុស្ស៊ី និងតំបន់ផ្ដាច់ខ្លួនចំនួន ២នៅអ៊ុយក្រែន។ ជប៉ុនបានធ្វើការបង្កកទ្រព្យសម្បត្តិ និងហាមប្រាមមិនឱ្យជនជាតិរុស្ស៊ីមួយចំនួនចូលក្នុងដីជប៉ុន។ បន្ថែមពីលើនេះទៅទៀត ជប៉ុននឹងបិទការធ្វើពាណិជ្ជកម្មជាមួយតំបន់ផ្ដាច់ខ្លួនទាំង ២នៅអ៊ុយក្រែន។ នេះបើតាមការលើកឡើងរបស់លោកនាយករដ្ឋមន្ត្រី ហ្វូមីអូ គីស៊ីដា។
លោក គីស៊ីដា បានលើកឡើងថា រុស្ស៊ីរំលោភអធិបតេយ្យ និងបូរណភាពទឹកដីអ៊ុយក្រែន ក៏ដូចជារំលោភច្បាប់អន្តរជាតិ ហើយជំរុញឱ្យមានការដោះស្រាយបញ្ហាតាមផ្លូវការទូត។
ចំណែកឯសិង្ហបុរី និងតៃវ៉ាន់វិញមិនទាន់ប្រកាសដាក់ទណ្ឌកម្មរុស្ស៊ីនោះទេ ប៉ុន្តែប្រទេសទាំងពីរនេះក៏បានចេញសេចក្ដីថ្លែងការណ៍សម្ដែងពីការព្រួយបារម្ភអំពីស្ថានភាពនៅអ៊ុយក្រែន។
អ្នកស្រី សៃ អ៊ិងវិន ប្រធានាធិបតីតៃវ៉ាន់បានលើកឡើងកាលពីថ្ងៃពុធថា តៃវ៉ាន់ថ្កោលទោសរុស្ស៊ីចំពោះការរំលោភអធិបតេយ្យអ៊ុយក្រែន។ រីឯក្រសួងការបរទេសសិង្ហបុរីវិញ បានចេញសេចក្ដីថ្លែងការណ៍កាលពីថ្ងៃអង្គារ ដោយបង្ហាញពី «ក្ដីបារម្ភយ៉ាងខ្លាំង» ចំពោះស្ថានភាពនៅអ៊ុយក្រែន។
សិង្ហបុរីបានសង្កត់ធ្ងន់ថា៖ «អធិបតេយ្យ ឯករាជ្យភាព និងបូរណភាពដែនដីរបស់អ៊ុយក្រែនត្រូវតែគោរព»។ នេះបើតាមសេចក្ដីថ្លែងការណ៍មួយរបស់ក្រសួងការបរទេសសិង្ហបុរី។
ចំពោះបញ្ហាដាក់ទណ្ឌកម្មវិញ សិង្ហបុរីនៅមិនទាន់ធ្វើការឆ្លើយតបនៅឡើយទេ។ ចំពោះភាគីតៃវ៉ាន់វិញ បើយោងតាមអនុរដ្ឋមន្ត្រីសេដ្ឋកិច្ចតៃវ៉ាន់ តៃវ៉ាន់នឹងពិចារណាដាក់ទណ្ឌកម្មរុស្ស៊ី ប្រសិនបើទណ្ឌកម្មនេះជួយផ្ដល់ឱ្យមានសន្តិភាព។ នេះបើតាមប្រភពពីអ្នកសារព័ត៌មានតៃវ៉ាន់មួយរូប៕
ប្រភព៖ FP
