មេដឹកនាំតំបន់ផ្ដាច់ខ្លួនសុំជំនួយពីរុស្ស៊ី ដើម្បីទប់ស្កាត់នឹងអំពើហិង្សាពីកងទ័ពអ៊ុយក្រែន
មេដឹកនាំតំបន់ផ្ដាច់ខ្លួនអ៊ុយក្រែនចំនួន ២គឺ តំបន់ដនណេតស្ក៍ (Donetsk) និងតំបន់លូហ្គាន់ស្ក៍ (Lugansk) បានធ្វើការសុំជំនួយពីរុស្ស៊ី ដើម្បីទប់ស្កាត់ការវាយប្រហារពីសំណាក់កងទ័ពអ៊ុយក្រែន។ នេះបើតាមការលើកឡើងរបស់លោក ឌីមីទ្រី ពេស្កូវ (Dmitry Peskov) អ្នកនាំពាក្យរដ្ឋាភិបាលរុស្ស៊ីកាលពីថ្ងៃពុធនេះ។
លោក ពេស្កូវ បាននិយាយថា៖ «មានសំណើជាលាយលក្ខណ៍អក្សរពីសំណាក់លោកLeonid Pasechnikប្រមុខនៃសាធារណរដ្ឋប្រជាមានិតលូហ្គាន់ស្ក៍ និងលោក Denis Pushilinប្រមុខនៃសាធារណរដ្ឋប្រជាមានិតដនណេតស្ក៍ ទៅកាន់លោកប្រធានាធិបតីរុស្ស៊ី វ្ល៉ាឌីមៀរ ពូទីន»។ លោកបានបន្តថា មេដឹកនាំនៃ «សាធារណរដ្ឋ» ទាំងពីរ បានបង្ហាញពីការដឹងគុណចំពោះលោក ពូទីន ក្នុងការទទួលស្គាល់រដ្ឋរបស់ពួកគេ។
បើយោងតាមអ្នកនាំពាក្យរដ្ឋាភិបាលរុស្ស៊ី ក្នុងលិខិតពីប្រមុខនៃតំបន់ទាំងពីរនោះបាននិយាយពីក្ដីលំបាកវេទនា ភាពរង្គោះរង្គើ ក៏ដូចជាអស្ថិរភាពនានា ដែលបង្កឡើងដោយកងទ័ពរបស់ប្រទេសអ៊ុយក្រែន។ លិខិតនោះក៏បានបញ្ជាក់ថា តំបន់ទាំងពីរនោះក៏បានធ្វើការជម្លៀសប្រជាជនរបស់ខ្លួនទៅកាន់រុស្ស៊ីទៀតផង។
ជាមួយគ្នានេះដែរ មេដឹកនាំទាំងពីរនោះបានសុំជំនួយពីរុស្ស៊ី ក្នុងគោលបំណងបង្ការការបាត់បង់ជីវិតជនស៊ីវិល និងមហន្តរាយមនុស្សធម៌ ក៏សម្រេចស្នើសុំជំនួយពីរុស្ស៊ី ដើម្បីទប់ស្កាត់នឹងការគំរាមកំហែងពីកងទ័ពអ៊ុយក្រែន។
កាលពីថ្ងៃច័ន្ទនេះ លោក ពូទីន បានប្រកាសទទួលស្គាល់តំបន់ផ្ដាច់ខ្លួនទាំងពីរនោះជារដ្ឋឯករាជ្យ ហើយក៏បញ្ជាឱ្យកងទ័ពចូលទៅកាន់តំបន់នោះ ក្នុងគោលបំណង «រក្សាសន្តិភាព»៕
ប្រភព៖ TASS
