ស្ថានទូតបារាំងប្រចាំកម្ពុជា បានកោតសរសើរ ការសម្រេចចិត្តរបស់កម្ពុជា ដែលបានបោះ ឆ្នោតគាំទ្រលើដីកាដំណោះស្រាយស្ដីពីវិបត្តិសង្គ្រាម នៅ អ៊ុយក្រែន នៅឯមហាសន្និបាត អង្គការសហប្រជាជាតិក្នុងសប្តាហ៍នេះ។ 

កម្ពុជាកាលពីថ្ងៃទី២មីនា បានចូលរួមជាមួយបណ្តាប្រទេសដទៃលើសកលលោកក្នុងការអនុម័តសេចក្តីសម្រេច ចិត្តប្រឆាំងអំពើឈ្លានពានប្រទេសអ៊ុយក្រែន។ តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិលោក កែ សុវណ្ណ កាលពីថ្ងៃទី២មីនា បានថ្លែងជាភាសាអង់គ្លេសបញ្ជាក់ការចូលរួមរបស់កម្ពុជា ប្រឆាំងនឹងការធ្វើសង្គ្រាម ក្នុងប្រទេសអ៊ុយក្រែន។

ស្ថានទូត បារាំងបានសរសេរនៅលើ គណនីហ្វេសប៊ុក របស់ខ្លួន នៅថ្ងៃទី៣ មីនា ថាបារាំងសូមកោតសរសើរការសម្រេចចិត្ត របស់កម្ពុជា ក្នុងការចូលរួមជាមួយសមាជិកអង្គការសហប្រជាជាតិ ចំនួន ១៤០ ប្រទេស ផ្សេងទៀត ដើម្បីសម្ដែងសាមគ្គីភាពជាមួយប្រទេស អ៊ុយក្រែនដែលរងគ្រោះ ពីការឈ្លានពានរបស់រុស្ស៊ី ដោយរំលោភលើធម្មនុញ្ញ របស់អង្គការសហប្រជាជាតិ។

គួរបញ្ជាក់ថាមហាសន្និបាតបន្ទាន់របស់អង្គការសហប្រជាជាតិកាលពីយប់ថ្ងៃទី២មីនាដែល ថ្កោលទោសរុស្ស៊ីនិងទាមទាររុស្ស៊ីឱ្យដកកងទ័ពចេញពីអ៊ុយក្រែននោះ បានទទួលការគាំទ្រ បោះឆ្នោតពីប្រទេសចំនួន១៤១ ក្នុងចំណោមប្រទេសចូលរួម១៨១ប្រទេស។ ប្រទេសដែល មិនគាំទ្រសេចក្តីសម្រេចចិត្តរបស់អង្គការសហប្រជាជាតិ រួមមាន៥ប្រទេសគឺបេឡារុស, កូរ៉េខាងជើង, អេរីទ្រៀ, រុស្ស៊ី និងប្រទេសស៊ីរី។ ប្រទេសដែលបោះឆ្នោតអនុប្បវាទ មាន៣៥ប្រ ទេសក្នុងនោះរួមមានប្រទេស វៀតណាម, ឡាវ, ប្រទេសចិន, ឥណ្ឌា, អ៊ីរ៉ាក់, អ៊ីរ៉ង់, អាល់ហ្សេរី, ម៉ុងហ្គោលី, ប៉ាគីស្ថាន, អាហ្វ្រិកខាងត្បូង, សិរីលង្កានិងប្រទេសមួយចំនួនទៀត ក្នុងទ្វីប អាហ្វ្រិក, អាស៊ី, មជ្ឈិមបូព៌ា និងនៅក្នុងទ្វីបអាមេរិកខាងត្បូងផងដែរ។