សហភាពអឺរ៉ុបដាក់សំណើបិទការនាំចូលធ្យូងថ្មពីរុស្ស៊ី ហើយពិចារណាលើទណ្ឌកម្មប្រេង
គណៈកម្មការអឺរ៉ុបកាលពីថ្ងៃអង្គារ ស្នើឱ្យបិទការនាំចូលធ្យូងថ្មរុស្ស៊ី ដែលជាផ្នែកមួយនៃទណ្ឌកម្មថ្មីប្រឆាំងនឹងវិមានក្រឹមឡាំងចំពោះការលុកលុយអ៊ុយក្រែន ខណៈពិចារណាលើទណ្ឌកម្មបិទការនាំចូលប្រេងពីរុស្ស៊ី។
អ្នកស្រី Ursula von der Leyen ប្រធានគណៈកម្មការអឺរ៉ុបនិយាយថា៖ «យើងនឹងដាក់បម្រាមនាំចូលធ្យូងថ្មពីរុស្ស៊ី ដែលមានតម្លៃ ៤,៣៩ ប៊ីលានដុល្លារក្នុងមួយឆ្នាំ»។ អ្នកស្រីបន្តថា៖ «យើងក៏កំពុងធ្វើការលើការដាក់ទណ្ឌកម្មបន្ថែម រួមទាំងការនាំចូលប្រេង ហើយយើងកំពុងឆ្លុះបញ្ចាំងពីគំនិតមួយចំនួនដែលបង្ហាញដោយរដ្ឋសមាជិក ដូចជាការយកពន្ធ ឬការទូទាត់តាមការព្រមព្រៀង»។
ការប្រកាសរបស់សហភាពអឺរ៉ុប ធ្វើឡើងចំពេលដែលប្លុកជួបនឹងវិបត្តិថាមពលជាមួយរុស្ស៊ី ហើយទណ្ឌកម្មលើវិស័យនេះ ជាបញ្ហាប្រឈមសម្រាប់ប្លុក ដែលនឹងត្រូវពឹងផ្អែកលើធនធានរបស់ប្រទេសដែលជារដ្ឋសមាជិក។ យោងតាមទិន្នន័យពីការិយាល័យស្ថិតិអឺរ៉ុប សហភាពអឺរ៉ុបនាំចូលធ្យូងថ្ម ១៩,៣ ភាគរយ ប្រេង ៣៦,៥ ភាគរយ និងឧស្ម័នធម្មជាតិ ៤១,១ ភាគរយ ពីរុស្ស៊ីក្នុងឆ្នាំ ២០២០។
សំណើបិទការនាំចូលធ្យូងថ្មពីរុស្ស៊ី ជាកញ្ចប់ទណ្ឌកម្មទី ៥ របស់សហភាព ឆ្លើយតបទៅនឹងរបាយការណ៍សម្លាប់ជនស៊ីវិលរបស់យោធារុស្ស៊ីនៅទីក្រុងប៊ូឆាជិតរដ្ឋធានីកៀវ ដែលអ៊ុយក្រែន និងបស្ចិមលោក ចោទថាជាឧក្រិដ្ឋកម្មសង្រ្គាម។ អ្នកស្រី von der Leyen និយាយថា៖ «អំពើឃោរឃៅទាំងនេះមិនអាចទុកចោលដោយគ្មានការឆ្លើយតបនោះឡើយ។ ជនល្មើសនៃឧក្រិដ្ឋកម្មដ៏ឃោរឃៅទាំងនេះ ត្រូវតែទទួលការផ្តន្ទាទោស»។
សំណុំវិធានការថ្មីនឹងត្រូវពិភាក្សាដោយឯកអគ្គរដ្ឋទូតអឺរ៉ុបនៅថ្ងៃពុធ។ ការអនុម័តចុងក្រោយនៃទណ្ឌកម្មនឹងមិនកើតឡើងទេរហូតការចរចាបញ្ចប់។ ការដាក់ទណ្ឌកម្មថ្មីនេះ ក៏រួមបញ្ចូលផងដែរនូវការបិទប្រតិបត្តិការពេញទីលើធនាគាររុស្ស៊ីសំខាន់ៗចំនួន៤ ការហាមនាវា និងកប៉ាល់រុស្ស៊ីមិនឱ្យចូលទៅកាន់កំពង់ផែសហភាពអឺរ៉ុប និងកំណត់គោលដៅហាមឃាត់ការនាំចេញដែលមានតម្លៃ ១០ ប៊ីលានអឺរ៉ូ ដែលពាក់ព័ន្ធនឹងកុំព្យូរទ័រ Quantum និងសឺមីកុងឌុចទ័រទំនើប។
ទោះជាយ៉ាងណាក៏ដោយ សំណើទណ្ឌកម្មថ្មីបានបែងចែកសហភាពអឺរ៉ុប ដោយប្រទេសមួយចំនួនគាំទ្រ ខណៈដែលអ្នកផ្សេងទៀតជំទាស់ថា ទង្វើបែបនេះនឹងធ្វើឱ្យប៉ះពាល់ដល់សេដ្ឋកិច្ចរបស់ខ្លួនច្រើនជាងរុស្ស៊ី។
ប្រភព៖ CNBC
