រដ្ឋមន្ត្រីការបរទេសស៊ុយអែតនិយាយថា ហ្វាំងឡង់ស្ទើរតែប្រាកដជាដាក់ពាក្យជាសមាជិកណាតូ
កាលពីថ្ងៃអាទិត្យ ទី១ ឧសភា រដ្ឋមន្ត្រីការបរទេសស៊ុយអែតលោកស្រីអាន់ លីនដេនិយាយថាប្រទេសជិតខាងហ្វាំងឡង់ស្ទើរតែប្រាកដជាដាក់ពាក្យ ដើម្បីចូលជាសមាជិកសម្ព័ន្ធភាពយោធាណាតូ។
ការឈ្លានពានរបស់រុស្ស៊ីទៅលើអ៊ុយក្រែន បានធ្វើឱ្យប្រទេសស៊ុយអែត និងប្រទេសហ្វាំងឡង់ ធ្វើការពិចារណាឡើងវិញនូវជំហរអព្យាក្រឹតភាពយោធារបស់ពួកគេ ខណៈពេលដែលការស្ទង់មតិសាធារណបានបង្ហាញលើកដំបូងក្នុងប្រវត្តិសាស្ត្រថាភាគច្រើននៃប្រជាជនរបស់ពួកគេបានផ្លាស់ប្ដូរមតិមកគាំទ្រការចូលជាសមាជិកយោធាលោកខាងលិចនេះ។
ក្នុងបទសម្ភាសន៍ជាមួយនឹងប៉ុស្តិ៍ទូរទស្សន៍ SVT លោកស្រីលីនដេបាននិយាយថា៖ «យើងដឹងស្ទើរតែច្បាស់ថាពួកគេ (ហ្វាំងឡង់) នឹងដាក់ពាក្យសុំចូលជាសមាជិកណាតូ។ ហើយវានឹងផ្លាស់ប្ដូរតុល្យភាពទាំងមូល។ ប្រសិនបើប្រទេសណាមួយរបស់យើងចូលរួម យើងដឹងថាភាពតានតឹងនឹងកើនឡើង»។
នៅពេលសួរថាលោកស្រីគិតថាហ្វាំងឡង់ នឹងចូលជាសមាជិកណាតូដែរ ឬទេ លោកស្រីឆ្លើយថា៖ «ខ្ញុំគិតថាយើងអាចនិយាយបានថាប្រាកដណាស់»។
ទាំងស៊ុយអែត និងហ្វាំងឡង់ ត្រូវបានគេរំពឹងថានៅរយៈពេលប៉ុន្មានសប្ដាហ៍ខាងមុខ ពួកគេនឹងធ្វើការសម្រេចចិត្តថាតើគួរចូលជាសមាជិកអង្គការណាតូដែរ ឬទេ។ កាលពីថ្ងៃសុក្ររដ្ឋមន្ត្រីការបរទេសហ្វាំងឡង់លោកប៉េកកា ហាវីស្តូនិយាយថាលោកសង្ឃឹមថាហ្វាំងឡង់ និងស៊ុយអែត នឹងធ្វើការសម្រេចចិត្តស្រដៀងគ្នា នៅពេលតែមួយ៕
ប្រភព៖ Reuters
