សិស្សប៊ែលធី “និទ្ទេស A” ១៨ រូប បានមកចែករំលែកបទពិសោធន៍ភាពជោគជ័យនៃការសិក្សាដល់សិស្សថ្នាក់ទី១២ ឆ្នាំសិក្សាថ្មី ដែលនឹងត្រូវ ប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សាថ្មី២០១៩-២០២០  ចំនួន ១ពាន់,៧រយ២១នាក់  ដែលពិធីនេះប្រព្រឹត្តទៅ នៅសហសាលនៃសាកលវិទ្យាល័យ ប៊ែលធីអន្ដរជាតិ ក្រោមវត្តមាន ឯកឧត្តម បណ្ឌិត លី ឆេង អគ្គនាយក ប៊ែលធី គ្រុប និង និងលោកជំទាវ ។

    តាមរយនៃការបញ្ជាក់បទពិសោធន៍នៃការសិក្សាពីក្នុងចំណោមសិស្សនិទ្ទេស A ទាំង១៨រូប យុវសិស្សឌី ពេជ្រសុផានាថបានឲ្យដឹងថាភាពជោគជ័យដែលទទួលបានពីការសិក្សានាពេលកន្លងមក មិនកើតឡើងដោយឯកឯងនោះទេ  គឺកេីតឡើងដោយការខិតខំព្យាយាមសិក្សា  ពិសេសសិស្សថ្នាក់ទី១២ដែលត្រូវត្រៀមប្រឡងសញ្ញាបត្រមធ្យមសិក្សាទុតិយភូមិ មិនចំណាយពេលវេលាឥតប្រយោជន៍ឡើយ ត្រូវចេះបែងចែកពេលវេលាសំរាប់ការសិក្សាឲ្យបានច្បាស់លាស់ ដោយខ្លួនយើងផ្ទាល់និយាយរួម ភាពជោគជ័យនៃការសិក្សាមាន៤ កត្តាសំខាន់ គឺកត្តាសាលា កត្តាគ្រួសារ កត្តាសង្គម.និងកត្តាខ្លួនឯង។

      ឯកឧត្តមបណ្ឌិត លី ឆេង បានកោតសរសើរចំពោះ សិស្សនិទ្ទេសA ទាំង ១៨រូប និងសិស្សជ័យលាភីទាំងអស់ ដែល​បាន ខិតខំប្រឹងប្រែងរៀនសូត្រ រហូតទទួលបានជោគជ័យនា ព្រមទាំងបាន បានថ្លែងអំណរគុណចំពោះ មាតាបិតា និង​អាណាព្យាបាលសិស្សទាំងអស់ផងដែរ ដែលបានផ្តល់ឱកាស និងជំរុញឲ្យកូនៗសិក្សាបន្ថែមនៅផ្ទះ និង គោរពវិន័យ​សាលាបានល្អ។

ដើម្បីជាការជំរុញនិងលើកទឹកចិត្តដល់សិស្ស ឯកឧត្តមបណ្ឌិត អគ្គនាយក និងលោកជំទាវ បានប្រគល់លិខិតសរសើរ និងអាហារូបករណ៍ឧកញ៉ា លី ឆេង សិក្សាថ្នាក់បរិញ្ញាបត្រ ១០០% ជូនដល់សិស្សនិទ្ទេស A ទាំង ១៨រូប  ព្រមទាំង ឧបត្ថម្ភថវិកាសម្រាប់ការ ចំណាយផ្សេងៗក្នុងម្នាក់ៗ ២ពាន់ដុល្លារ ជូនដល់ លោកគ្រូ-អ្នកគ្រូថ្នាក់ទី១២ ដែលមានសិស្សជាប់និទ្ទេសA នូវលិខិតសរសើរ និងថវិកាលើកទឹកចិត្តក្នុងម្នាក់ៗ ១០០ដុល្លារ ផងដែរ។

   គួរបញ្ជាក់ដែរថា ៖គិតមកដល់ឆ្នាំសិក្សា២០១៨-២០១៩ សាលាប៊ែលធី អន្តរជាតិ មានសិស្សថ្នាក់ទី១២ដែលបានប្រឡងបញ្ចប់ សញ្ញាបត្រមធ្យមសិក្សាទុតិយភូមិ ចំនួន ១ម៉ឺន,១ពាន់១រយ២៩ នាក់ ស្មើនឹង ៨៥.២៤ ក្នុងនោះសិស្សនិទ្ទេសA ចំនួន ១១២នាក់ និងមានសិស្សពូកែទូទាំងរាជធានី និងទូទាំងប្រទេស ផ្នែកអក្សរសាស្ត្រខ្មែរ គណិតវិទ្យា និងរូបវិទ្យា សម្រាប់ថ្នាក់ទី៩ និងទី១២ សរុបចំនួន ៦៤នាក់ នារី ៣៨នាក់ ហើយសិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិ នឹងទទួលបានសញ្ញាបត្រពីរ ១. ចេញដោយ សាលា ប៊ែលធី អន្តរជាតិ  ២- ចេញដោយក្រសួងអប់រំយុវជន និងកីឡា ៕