ហ្សាកាតា៖ ឥណ្ឌូនេស៊ី បានចាប់ផ្តើមគម្រោងពន្លឿនការនាំចេញ ប្រេងដូងឆៅ និងផលិតផលប្រេងដូងឡើងវិញ យ៉ាងហោចណាស់ ១លានតោន ពោលគឺបន្ទាប់ពីមានការហាមឃាត់ការនាំចេញ នាពេលថ្មីៗនេះ។

ក្រសួងពាណិជ្ជកម្មឥណ្ឌូនេស៊ី ថា បទប្បញ្ញត្តិស្តីពីការជំរុញនាំចេញ ដែលត្រូវបានផ្សព្វផ្សាយ កាលពីថ្ងៃទី៩ មិថុនា បានឲ្យដឹងថា គម្រោងនេះមានប្រសិទ្ធភាព ភ្លាមៗ ហើយគម្រោងពន្លឿនការនាំចេញអនុវត្តរហូតដល់ថ្ងៃទី៣១ ខែកក្កដា។ បទប្បញ្ញត្តិដែលត្រូវបានចុះហត្ថលេខាកាលពីថ្ងៃទី៧ ខែមិថុនាបានឱ្យដឹងថា ប្រសិនបើតម្រូវឱ្យមានកូតានាំចេញច្រើនជាង នោះកូតាអាចលើសពីដែនកំណត់ ១លានតោន។

ប្រទេសឥណ្ឌូនេស៊ី ដែលជាប្រទេសផលិតប្រេងដូងធំជាងគេក្នុងពិភពលោក បានអនុញ្ញាតឱ្យមានការនាំចេញឡើងវិញកាលពីថ្ងៃទី២៣ ខែឧសភា បន្ទាប់ពីហាមឃាត់ការនាំចេញរយៈពេល ៣ សប្តាហ៍ក្នុងគោលបំណងបង្កើនការផ្គត់ផ្គង់ប្រេងឆាក្នុងស្រុក និងរក្សាតម្លៃមិនឱ្យកើនឡើង៕ សារ៉ាត