ប្រធានគណៈកម្មការអឺរ៉ុប៖ ការសម្រេចចិត្តឱ្យអ៊ុយក្រែនក្លាយជាសមាជិកប្លុកនឹងធ្វើឡើងនៅសប្ដាហ៍ក្រោយ
ប្រធានគណៈកម្មការអឺរ៉ុបអ្នកស្រី អួរស៊ូឡា វ៉ុនឌែរ ឡេយែន (Ursula von der Leyen ) និយាយក្នុងដំណើរទស្សនៈកិច្ចទៅកាន់ទីក្រុងកៀវកាលពីថ្ងៃសៅរ៍ថា សហភាពអឺរ៉ុបកំពុងបញ្ចប់ការវាយតម្លៃលើថាតើត្រូវផ្តល់អនុសាសន៍ឱ្យអ៊ុយក្រែនក្លាយជាសមាជិកនៃប្លុកឬយ៉ាងណានៅសប្ដាហ៍ក្រោយ។
ការផ្លាស់ប្តូរនេះនឹងគ្រាន់តែជាជំហានបឋមក្នុងដំណើរការដ៏វែងមួយប៉ុណ្ណេះ។ យ៉ាងណាមិញ រដ្ឋាភិបាលសហភាពអឺរ៉ុបទាំង ២៧ នឹងត្រូវយល់ព្រមផ្តល់ឋានៈជាបេក្ខជនដល់អ៊ុយក្រែន បន្ទាប់ពីនោះនឹងមានកិច្ចពិភាក្សាយ៉ាងទូលំទូលាយស្តីពីកំណែទម្រង់ដែលទាមទារ មុនពេលពិចារណាឱ្យក្រុងកៀវនូវសមាជិកភាព។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី បាននឹងកំពុងជំរុញឱ្យមានការចូលទៅក្នុងសហភាពអឺរ៉ុបយ៉ាងឆាប់រហ័ស ជាមធ្យោបាយកាត់បន្ថយភាពងាយរងគ្រោះភូមិសាស្ត្រនយោបាយរបស់អ៊ុយក្រែនបន្ទាប់ពីការលុកលុយរបស់រុស្ស៊ី។
ប៉ុន្តែមន្ត្រី និងមេដឹកនាំនៅក្នុងប្លុកព្រមានថា ទោះបីជាមានឋានៈបេក្ខភាពក៏ដោយ សមាជិកភាពជាក់ស្តែងរបស់សហភាពអឺរ៉ុបអាចចំណាយពេលរាប់ឆ្នាំ ឬសូម្បីតែរាប់ទសវត្សរ៍។ អ្នកស្រី វ៉ុនឌែរ ឡេយែន និយាយប្រាប់លោក ហ្សេឡេនស្គី ថា ទោះបីជាមានការរីកចម្រើនលើកំណែទម្រង់រដ្ឋបាល និងកន្លែងផ្សេងទៀតក្ដី ក៏នៅមានលក្ខខណ្ឌផ្សេងទៀតដែលត្រូវសម្រេចបាន។
អ្នកស្រីនិយាយថា៖ «អ្នកបានធ្វើការច្រើនក្នុងការពង្រឹងនីតិរដ្ឋ ប៉ុន្តែនៅតែមានតម្រូវការសម្រាប់កំណែទម្រង់ដែលត្រូវអនុវត្ត ដើម្បីប្រឆាំងអំពើពុករលួយ ជាឧទាហរណ៍»។
ការចូលរួមក្នុងសហភាពអឺរ៉ុបគឺជាដំណើរការដែលជាធម្មតាត្រូវចំណាយពេលច្រើនឆ្នាំ ហើយតម្រូវឱ្យបំពេញតាមលក្ខណៈវិនិច្ឆ័យដ៏តឹងរឹង ចាប់ពីស្ថិរភាពសេដ្ឋកិច្ច រហូតដល់ការលុបបំបាត់អំពើពុករលួយ រហូតដល់ការគោរពសិទ្ធិមនុស្ស។ កាលពីខែមីនា មេដឹកនាំនៃសហភាពអឺរ៉ុបបដិសេធការអំពាវនាវរបស់ទីក្រុងកៀវ ចំពោះដំណើរការចូលជាសមាជិកឆាប់រហ័ស។ កាលពីខែមេសា លោក ហ្សេឡេនស្គី និយាយថា សមាជិកភាពរបស់អ៊ុយក្រែននៅក្នុងប្លុក EU មានសារៈសំខាន់ចំពោះ «ចក្ខុវិស័យយុទ្ធសាស្ត្រ» សម្រាប់ការកសាងប្រទេសរបស់ខ្លួនក្រោយសង្រ្គាមឡើងវិញ។
ប្រភព៖ Aljazeera
