ឥណ្ឌាបង្កើនការចាប់ខ្លួន និងរុះរើផ្ទះដើម្បីបញ្ឈប់ភាពចលាចលតវ៉ារបស់ម៉ូស្លីមប្រឆាំងនឹងការប្រមាថសាសនា
ក្រុមមន្ត្រីឥណ្ឌានិយាយកាលពីថ្ងៃអាទិត្យថា អាជ្ញាធរក្នុងរដ្ឋអ៊ុតតាប្រាដេស បានរុះរើផ្ទះរបស់ប្រជាជនជាច្រើន ដែលរងការចោទប្រកាន់ថាជាប់ពាក់ព័ន្ធក្នុងកុប្បកម្មកាលពីសប្តាហ៍មុន ដែលរៀបចំឡើងប្រឆាំងតវ៉ានឹងការប្រមាថមើលងាយព្យាការីម៉ូហាម៉ាតក្នុងសាសនាអ៊ិស្លាម ពីឥស្សរជនគណបក្សកាន់អំណាច។
ម៉ូស្លីមធ្វើដំណើរតាមផ្លូវនានាទូទាំងប្រទេសឥណ្ឌាក្នុងប៉ុន្មានសប្តាហ៍ថ្មីៗនេះ ដើម្បីតវ៉ាប្រឆាំងនឹងការអត្ថាធិប្បាយប្រឆាំងអ៊ិស្លាម ពីសមាជិក២នាក់នៃគណបក្សកាន់អំណាចជាតិនិយមហិណ្ឌូ Bharatiya Janata (BJP) របស់លោកនាយករដ្ឋមន្ត្រី ណារិនដ្រា ម៉ូឌី។ ការប៉ះទង្គិចគ្នាផ្ទុះឡើងរវាងអ្នកកាន់សាសនាអ៊ិស្លាម និងហិណ្ឌូ និងប៉ូលីសនៅក្នុងតំបន់ជាច្រើន។ ប៉ូលីសក្នុងរដ្ឋអ៊ុតតាប្រាដេស ចាប់ខ្លួនមនុស្សជាង ៣០០ នាក់ ពាក់ព័ន្ធនឹងភាពចលាចលនេះ។
ក្រុមមន្ត្រីនិយាយថា នៅតំបន់កាស្មៀរគ្រប់គ្រងដោយឥណ្ឌា ប៉ូលីសចាប់ខ្លួនយុវជនម្នាក់ពីបទបង្ហោះវីដេអូគំរាមកាត់ក្បាលអតីតអ្នកនាំពាក្យរបស់គណបក្សកាន់អំណាច ដែលនិយាយពាក្យប្រមាថមួយចំនួន។
សហគមន៍មូស្លីមដែលជាក្រុមភាគតិចរបស់ឥណ្ឌា មើលឃើញថា ការអត្ថាធិប្បាយពីមន្រ្តីបក្សកាន់អំណាច ជាឧទាហរណ៍ចុងក្រោយបង្អស់នៃសម្ពាធ និងការអាម៉ាស់ក្រោមការគ្រប់គ្រងរបស់បក្ស BJP លើបញ្ហាជាច្រើនចាប់តាំងពីសេរីភាពនៃការថ្វាយបង្គំសាសនា រហូតដល់ការពាក់កន្សែងរុំក្បាលហ៊ីចាប។
គណបក្ស BJP បានព្យួរការងារអ្នកនាំពាក្យរបស់ខ្លួនអ្នកស្រី Nupur Sharma និងបណ្តេញមេដឹកនាំម្នាក់ទៀតគឺលោក Naveen Kumar Jindal សម្រាប់ការអត្ថាធិប្បាយដែលបង្កឱ្យមានភាពចម្រូងចម្រាសខាងសាសនា។ ប៉ូលិសបានប្តឹងអ្នកទាំង២ ហើយរដ្ឋាភិបាលបាននិយាយថា ការអត្ថាធិប្បាយនេះមិនឆ្លុះបញ្ចាំងពីទស្សនៈរបស់ខ្លួនទេ។ ប៉ុន្តែក្រុមមូស្លីមទាមទារឱ្យមានការចាប់ខ្លួន ខណៈក្រុមហិណ្ឌូជ្រុលនិយមមួយចំនួន ចាត់ទុកអ្នកទាំង២ថាជាអ្នកនយោបាយក្លាហាន និងជាតិនិយម។
ទាក់ទងនឹងភាពចលាចល អ្នកនាំពាក្យរដ្ឋរបស់បក្ស BJP និយាយថា កាលពីចុងសប្តាហ៍កន្លងទៅនេះ អភិបាលរដ្ឋអ៊ុតតាប្រាដេសលោក Yogi Adityanath បញ្ជាឱ្យមន្ត្រីរុះរើគ្រឹះស្ថាន និងផ្ទះខុសច្បាប់ណាមួយរបស់ប្រជាជនដែលរងការចោទប្រកាន់ថាមានជាប់ពាក់ព័ន្ធក្នុងកុប្បកម្មនៅក្នុងរដ្ឋកាលពីសប្តាហ៍មុន។
មេដឹកនាំគណបក្សប្រឆាំងនិយាយថា រដ្ឋាភិបាលរបស់លោក Adityanath កំពុងតែបន្តប្រើវិធីសាស្ត្រ មិនស្របតាមរដ្ឋធម្មនុញ្ញដើម្បីបំបិទមាត់បាតុករ។ រហូតមកទល់ពេលនេះ លោក ម៉ូឌី មិនទាន់ធ្វើអត្ថាធិប្បាយអ្វីទេជុំវិញភាពចលាចលក្នុងសហគមន៍។
នៅភាគខាងកើតរដ្ឋបេងហ្គាល់ខាងលិច អាជ្ញាធរអនុវត្តច្បាប់គ្រាអាសន្ន ដែលហាមឃាត់ការជួបជុំជាសាធារណៈនៅក្នុងសង្កាត់ឧស្សាហកម្ម Howrah រហូតដល់ថ្ងៃទី ១៦ ខែមិថុនា។ អភិបាលរដ្ឋពីបក្ស BJP កាលពីថ្ងៃអាទិត្យ បានធ្វើការតវ៉ាមួយ ហើយចោទប្រកាន់ប្រទេសជិតខាងបង់ក្លាដែស ពីបទញុះញង់ឱ្យមានអំពើហិង្សានៅក្នុងរដ្ឋ ខណៈមូស្លីមផ្ទុះការតវ៉ានៅរដ្ឋធានីដាកាប្រឆាំងនឹងការអត្ថាធិប្បាយរបស់មន្រ្តីឥណ្ឌា។
កាលពីសប្តាហ៍មុន បណ្តាប្រទេសដូចជាកាតា អារ៉ាប៊ីសាអូឌីត អារ៉ាប់រួម អូម៉ង់ អ៊ីរ៉ង់ ដែលជាដៃគូពាណិជ្ជកម្មសំខាន់របស់ឥណ្ឌា បានធ្វើការតវ៉ាការទូតដើម្បីទាមទារការសុំទោសពីរដ្ឋាភិបាលរបស់លោក ម៉ូឌី សម្រាប់ការលើកឡើងប្រមាថសាសនាពីមន្រ្តីរបស់ខ្លួន។
ប្រភព៖ Reuters
